Hapot
● Ano an mga katongdan kan mga naglilingkod bilang mga attendant sa mga pagtiripon kan kongregasyon?
An mga attendant maninigong magpaabot nin mainit na pataratara sa gabos na minadatong sa mga pagtiripon. Kairiba sa saindang mga katongdan an pagpatukaw sa mga nahuhuri, paglista kan bilang kan nag-atender, pagpadanay kan areglo, asin pangangataman sa bentilasyon kan Kingdom Hall. An mga attendant dapat na makikatood, responsableng mga tugang na igwa nin inisyatiba sa pangangataman sa saindang mga paninimbagan.—om p. 63-4.
An mga attendant dapat na magin alisto sa mga pangangaipo kan mga bagohan, ipamateng inaako sinda, asin tabangan sindang makanompong nin mga tukawan. Kun ginigiyahan an mga bagohan pasiring sa matutukawan, dapat na pagmaigotan kan mga attendant na dai maistorbo an mga nakatukaw na. Kun minsan tinatawan ninda an mga bagohan nin magasin na inaadalan.
An pagpapadanay kan areglo durante kan mga pagtiripon mahalaga. Mantang pinakokosog niato an mga magurang na iiba an saindang mga aki sa mga pagtiripon, magkakaigwa nin nagkapirang istorbo kun minsan. Alagad kun an mga aki padagos na magin pongot o maribok, an attendant dapat na magtao nin maboot na tabang, tibaad isuherir na iluwas nguna kan magurang sa tiriponan an aki nin dikit na panahon. Kun an mga magurang kairiba an sadit na mga aki magtukaw kun saen madali sindang makaluluwas kun kaipuhan, puwede ining gibohon na may dikit sanang istorbo sa iba.
Sa mga lugar na problema an seguridad, an mga attendant maninigong iasignar tanganing magprotehir tumang sa bandalismo o pag-istorbo kan mga paratumang. Kun an siisay man sa laog kan Kingdom Hall magprobar na ribokon an pagtiripon, kaipuhan siang pakiolayan na maghale. Kun habo nia asin padagos na manribok, puwedeng apodon kan kamagurangan an mga autoridad. Sa ibang lugar tibaad kaipuhan na mag-asignar nin mga tugang tanganing bantayan an mga lunadan na nakaparada sa luwas kan Kingdom Hall mantang nagpapadagos an pagtiripon tanganing malikayan an danyos o paghabon.
Kun binibilang an mga nag-atender, an gabos na adulto siring man an saradit na kaakian na naghihinanyog asin nakikinabang, minsan sa limitadong paagi, sa pagtiripon dapat na ibilang.—km 9/79, p. 4.