Pagpoon nin mga Pag-adal na Ginagamit an Mankind’s Search for God
1 Sinabi ni Jesus, “Sa gabos na nasyon an maogmang bareta kaipuhan na ikahulit nguna.” (Mar. 13:10) Ini nangangahulogan na an saiyang mga disipulo makanonompong nin mga tawo hale sa dakol na manlaenlaen na tataramon asin relihiyon.
2 An satong bagong librong Mankind’s Search for God makatatabang sato na maabot kan katotoohan an manlaenlaen na klase nin mga tawo. (Juan 4:21-24) Paano kita makapopoon nin mga pag-adal sa Biblia na ginagamit an publikasyon na ini?
KUN PAANO POPONAN AN PAG-ADAL
3 Sa saindong enot na pagdalaw, kan ipasakamot nindo an libro, tibaad itinokdo nindo sa kagharong an sarong kapitulo o parapo. An iyo man sanang punto an puwedeng gamiton bilang paghahalean nin pag-orolay na magiya pasiring sa pag-adal. Sa paggamit kan mga hapot sa ibaba kan pahina, igwa kamo nin basihan para sa nakakaanimar na pag-orolay. Baga man kita magpoon sa kapinonan kan libro o sa arin man na kapitulo, an satong katuyohan maninigong sa katapustapusi giyahan an tawo sa kapitulo 10, 15, asin 16. Taano ta siring?
4 An paghanap sa Dios maninigong paagi ki Cristo. Sinabi ni Jesus, “Ako iyo an dalan asin an katotoohan patin an buhay. Mayo nin makaduduman sa Ama kun bakong huli sa sako.” (Juan 14:6) An kapitulo 10 nagpapatunay na si Jesus tunay na persona, nagpapaheling kun paano sia ihinula, asin kun paano niato naaraman na igwa sia kan pag-oyon nin Dios. (Juan 6:44, 65) An kapitulo 15 asin 16 manongod sa “A Return to the True God” asin “The True God and Your Future.”
MANSAYON AN INDIBIDUWAL NA MGA PANGANGAIPO
5 Pakalihis nin nagkapirang pag-adal puwede niatong isipon na madonong na bumalyo sa mas pundamental na libro siring kan librong Mabuhay Sagkod Lamang. Mantang an librong Search for God dinisenyo tanganing dagkahon an mga tawo hale sa manlaenlaen na relihiyon pasiring sa Dios, bakong gabos na kapitulo makaaakit sa gabos na tawo. Kaipuhan niatong ibagay an satong presentasyon asin areglo sa pag-adal sa mga pangangaipo kan indibiduwal.—1 Cor. 9:19-22.
6 Halimbawa, tibaad nakawaras kita kan libro sa sarong tawo na naghihingakong Kristiano. Ngonyan an hapot sa pagdalaw liwat puwedeng, “Taano ta kadakol na gayong relihiyon an naghihingakong Kristiano?” Kaya, an kapitulo 11 manongod sa apostasiya asin an kapitulo 13 manongod sa Repormasyon puwedeng magin basihan sa pagpoon nin pag-adal. Matatabangan niato an tawo na magrason sa mga katokdoan kan Biblia na laen sa apostatang mga doktrina kan Kakristianohan. Linalaom niato na an katotoohan mabutas sa saiyang isip tanganing mapaoswag nia an relasyon ki Jehova. (Juan 8:31, 32) Dangan an pag-adal puwedeng ipadagos sa kapitulo 15 asin 16 o sa librong Mabuhay Sagkod Lamang.
PAG-ABOT SA MGA TAWO NA MAY BAKONG KRISTIANONG RELIHIYON
7 Sa pakikiadal sa mga tawo na may ibang relihiyon, an Kristianong pagkamoot asin taktika maninigong perming ipaheling. (Col. 4:6) Para sa mga Hindu puwede niatong ponan an pag-adal sa pahina 372 sa irarom kan subtitulong “A Promised New World.” Dangan magpadagos sa kapitulo 5 manongod sa Hinduismo.
8 An taktika nangorognang kaipuhan kun nakikipag-olay sa mga Muslim. (1 Ped. 3:15) Daing duwa-duwa na maaakit sinda sa kapitulo 12 manongod sa Islam. Sa kapitulong iyan, an mga teksto sa Biblia para sa pagkomparar iinintrodusir sa mga hapot, nangorogna magpoon sa parapo 23 padagos na dian kinokonsiderar an mga doktrina.
9 Girumdomon na mantang kita nagtatanom asin nagbabaribi, an Dios an nagpapatalubo kun angay an daga.—1 Cor. 3:6, 7; Mat. 13:18-23.