Pagtabang sa Iba Mantang Nasa Paglilingkod sa Langtad
1 Magpoon sa mismong kapinonan kan Kristianong kongregasyon, personalmenteng tinokdoan ni Jesus an saiyang mga disipulo sa gibohon na paghuhulit asin “pinonan niang sugoon sinda na manduwaduwa.” (Mar. 6:7; Luc. 8:1) Sinambit ni apostol Pablo an saiyang “mga katuwang” sa Filipos na ‘nagpagal sa kaibanan nia sa maogmang bareta.’ (Fil. 4:3) Minsan ngani bako perming kaipuhan na magkaigwa nin kaiba sa ministeryo, an kadaklan sato nag-aapresyar na ibanan nin iba. (Ecl. 4:9) Paano, kun siring, kita makakapagpakosog asin makatatabang sa iba mantang kita naghuhulit?
2 An saro sa mga katuyohan kan satong pagtiripon bago maglingkod iyo an pagtabang sa bagohan na mga parahayag. (om p. 77, 97) Maski an bagong ninombrahan na mga payunir magmamawot na maghulit kaiba nin mas eksperyensiadong mga parahayag o nin sarong magurang o ministeryal na lingkod, sa siring nakatatao nin “pagriribayan nin pagpakosog.”—Roma 1:12.
3 Para sa panseguridad na mga rason, tibaad pinakamarahay sa mga parahayag na maghulit nin iriba sa ibang lugar. O tibaad kun minsan hagadon sato na maghulit kaiba nin dikit an eksperyensia na yaon sa pagtiripon bago maglingkod. Kun hahagadan kitang gibohon an siring, dalan nin pagkamoot na “tabangan an mga maluya,” maski ngani natood kitang may laen na kaiba.—Gibo 20:35.
MAGHULIT NA MAY PAGKAOROYON
4 Kun naghuhulit na may kaiba, boot niatong maghulit na may pagkakaoyon. (Ikomparar an 1 Corinto 3:6, 9.) An duwa puwedeng makikabtang sa pagpatotoo, tibaad nagsasarusalida sa pagpoon nin pakikipag-olay. An marahay na ugale nangangaipong magdangog kita nin atento mantang nagtataram an satong kaiba.
5 Minsan ngani kun minsan tibaad angay na makiiba sa pag-orolay kun an satong kaiba an nangengenot, ini nangangaipo nin marahay na paghusgar. Habo niatong olangon an epektibong dalagan nin pangangatanosan sa kagharong. Siyempre, kun an dikit an eksperyensiang parahayag nagkakaigwa nin kasakitan sa pag-atubang sa pagtumang, daing duwa-duwa na aapresyaron nia an tabang.—Ecl. 4:12.
6 Puwede niatong gamiton nin marhay an panahon sa pag-oltanan nin mga harong tanganing pag-olayan an mga paagi na mapaoswag an satong presentasyon, tibaad ginagamit an introduksion sa librong Reasoning. An paghuhulit na magkaibanan nakatatabang man sato na mamidbid nin orog an kada saro, na nagpapakosog sa bogkos kan satong Kristianong pagkamagturugang.
7 Mantang kita nag-iiribaiba sa paglilingkod, puwede niatong maparigon sa kada saro an hararom na apresasyon sa satong mahalagang ministeryo. (2 Cor. 4:1, 7) Kadungan kaiyan mag-aako kita nin panpakosog, makanonood sa kada saro, asin mapaparigon an pagkasararo nin magturugang.—Sal. 133:1.