Pagtanom Asin Pagbaribi—Mga Tangga Pasiring sa Paggibo nin mga Disipulo
1 “Ako an nagtanom, si Apolos an nagbaribi, alagad an Dios iyo an nagpapatubo.” (1 Cor. 3:6) Sa siring isinabi ni apostol Pablo an tolong pundamental na tangga sa paggibo nin mga disipulo ni Cristo. An enot na duwang tangga, an pagtanom asin pagbaribi, pribilehiyo asin responsibilidad nin nagdusay, bautisadong mga lingkod nin Dios.
2 Ini nagkakaipo nin paghuhulit sa publiko asin sa harong-harong, sa impormal, asin sa iba pang paagi. Kalabot man dian an progresibong pagtotokdo sa mga tawo na otobon an gabos na ipinagboot ni Jesus. (Mat. 28:19, 20) An ikaduwang tanggang ini magigibo sana paagi sa pagdalaw liwat sa mga nagpapaheling nin interes, na kinakaolay sinda sa Biblia, asin inaadalan sinda sa Biblia. Pinatutunayan daw nindo na kamo maimbod na katabang, na nagkokooperar ki Jehova paagi sa pagtanom nin mga banhi nin katotoohan dangan sinusundan iyan kan kinakaipuhan na pagbaribi asin pagkultibar?—1 Cor. 3:9.
MIDBIDON AN POTENSIAL ASIN PANGANGAIPO
3 Digdi sa Pilipinas kan 1990 taon nin paglilingkod, nakawaras kita nin haros 900,000 na libro asin pulyeto saka harani sa 4.7 milyones na magasin! May nag-atender man na labing 317,000 sa Memorial, na labing marhay sa 100,571 promedyong parahayag sa laog kan taon. An pagwaras nin babasahon mahalagang kabtang kan pagtatanom sa satong gibohon. An mga banhi nin katotoohan na ikinakasabwag may dakulang potensial sa pagbunga nin bagong mga disipulo, alagad kita daw, bilang mga katabang nin Dios, napahihirong dalawon liwat an mga tawong ini asin pataluboon an saindang interes sa mga tema sa Biblia? An mga parahayag sa kongregasyon digdi sa Pilipinas ngonyan may promedyong 0.3 na pag-adal sa Biblia. Nananarig kami na malangkaw an promedyong ini kun an kada parahayag matuturotimbang nin mas tama an saiyang personal na paninimbagan na an gibohon labi pa sa enot na tangga nin pagtanom sana nin mga banhi nin katotoohan asin maghingoa na makagibo nin progresibong mga pag-adal sa Biblia. Minsan ngani an iba, huli sa laen-laen na limitasyon, tibaad dai makagibo nin saro o labi pang pag-adal sa Biblia, marahay na repasohon kan lambang saro an saiyang personal na kamugtakan.
4 Makawiwiling helingon an nangyayari sa nagkapirang lugar. An mga kongregasyon may mabungang mga teritoryo asin nagrereport nin promedyong saro sagkod sa duwang pag-adal sa Biblia kada parahayag. An pagdakol nin bagong disipulo proporsionado sa bilang nin ginigibong mga pag-adal sa Biblia. Ini maheheling paagi sa pagkokomparar kan promedyong bilang nin mga parahayag sa bilang nin mga pag-adal sa Biblia sa laen-laen na nasyon sono sa report sa 1991 Yearbook.
5 An motibasyon niato sa pangengenot sa mga pag-adal sa Biblia maninigo na an satong pagkamoot sa mga tawo na naghihimate sa mensahe kan Kahadean na ihinuhulit niato. Kaipuhan na odok man niatong namamatean an mamomoton na pagmakolog ni Jehova para sa mga tawo asin saboton na an saindang kaligtasan konektado sa espirituwal na pagtalubo. (1 Ped. 2:2) Siring sa literal na tanom na nagkakaipo nin tubig tanganing tumubo, an mga tawo na sa primero nagpaheling nin interes sa mensahe kan Kahadean sa parate dai mapoon na umatender sa pagtiripon kun dai regular na gigiyahan pasiring sa organisasyon nin Dios paagi sa mga pag-adal sa Biblia.
6 An satuyang pagkuyog kalabot man. Sinabi ni Jesus na an mga nasa lado kan katotoohan naghihinanyog sa saiyang tingog. (Juan 18:37) Pinagbotan nia an saiyang mga disipulo na maghulit asin magtokdo, asin sinangkapan nia sinda sa pag-otob kan gibohon na iyan. Paagi sa saiyang pambihirang halimbawa bilang paratokdo asin sa saiyang hararom na pagmakolog sa mga tawo, tinawan kita ni Jesus nin arogan sa pagtabang sa iba. (Luc. 6:40; Juan 13:13; 14:12) An satuyang mga paghihingoa makakokontribuwir sa kaligtasan niato asin kan satuyang mga tinotokdoan.—1 Tim. 4:16.
MGA PANTABANG SA PAGPOPOON NIN MGA PAG-ADAL SA BIBLIA
7 Tanganing mahaman an saiyang trabaho, an ekspertong trabahador pinipili an saiyang kasangkapan sa laen-laen na magagamit nia. Bilang mga paratokdo, magagamit niato an kadakol na publikasyon, kabilang an mga brochure asin tract, na ginibo bilang mga kasangkapan na matabang sato na maabot an puso nin mga tawo na laen-laen an nagin buhay asin punto-de-vista.
8 An ibang parahayag nakaeksperyensia nin marahay na mga resulta sa paggamit nin mga tract asin brochure sa pag-introdusir kan pakikipag-olay sa Biblia. Halimbawa, an tract na Life in a Peaceful New World sinisitar o kinokotar an labing 20 laen-laen na teksto sa pagpaliwanag kan makangangalas na paglaom na ini. An mga tekstong ini magagamit sa pagbilog nin nagkapirang nakapupukaw na orolay sa Biblia. An satong mga brochure, sa nakaaakit asin simpleng paagi, puwedeng magpamidbid sa mga tawo kan pundamental na mga katotoohan sa Biblia asin dagkahon sinda na magsiyasat pa nin orog.
9 May midbid daw kamo na kadikit sana an inadalan o maluya an pagheling? Prinobaran na daw nindong gamiton an brochure na Enjoy Life on Earth Forever! tanganing magkaigwa nin progresibong pakikipag-olay sa Biblia sa siring na tawo? An brochure na “Uya!” saro pang marahay na kasangkapan na may pambukas na mga parapo na ekspertong ilinalabot an kagharong sa pag-adal manongod sa mga panuga nin Dios para sa ngapit. Asin tunay na an librong Puwede Kamong Mabuhay Sagkod Lamang sa Paraiso Digdi sa Daga, na ilinuwas kan 1982, nagin epektibo sa pagtabang sa kadaklan kan labing 1,700,000 na nabautismohan poon kaidto.
RESPONSABLENG PAGGAWE SA MGA INTERESADO
10 Tibaad makinabang kamo sa pagheling sa saindong Congregation’s Publisher Record card asin risahon kun pirang libro, pulyeto (kaiba an brochure), asin magasin an ikinawaras nindo sa nakaaging 12 bulan. An pagwaras daw na iyan iyo na mismo an satong katuyohan? O kamo daw guminibo nin labi pa sa tanggang pagtanom? Sa mga nagpaheling nin igong interes tanganing kumua kan satong babasahon, pira an binalikan tolos nindo? Nagbuwelta daw kamo tanganing helingon kun baga tuminubo an banhing saindong itinanom? Sinundan daw nindo iyan nin kinakaipuhan na pagbaribi dangan namibi ki Jehova na pataluboon logod iyan?—Ikomparar an Gibo 16:14 asin 2 Tesalonica 3:1.
11 Tibaad dai kamo nagdadalaw liwat o nangengenot sa pag-adal sa Biblia huli ta sa paghona nindo dai nindo kaya. Posible, an mas dakulang dahelan kaini iyo an saindong kaisipan imbes na kakulangan nin kakayahan. Dai isinugo ni Jehova an saiyang banwaan na gumibo nin sarong trabaho na dai sinda sinasangkapan asin kinakuwalipikar nin igo. Paagi sa saiyang banal na Tataramon asin organisasyon, inaandam nia kita para sa “lambang marahay na gibo.” (2 Tim. 3:16, 17; 2 Cor. 3:5, 6) Paagi sa banal na espiritu, inimprentang babasahon, asin berbal na pagtotokdo asin mga demonstrasyon sa plataporma, dai na baga sabihon an buhay na mga halimbawa nin eksperto asin maimbod na mga lingkod na andam na tumabang sa sato, itinatao Nia sato an kaipuhan niato. Dai niato kaipuhan an halangkaw na inadalan sa kinaban tanganing mangenot sa pag-adal sa Biblia. An kaipuhan niato maghimate sa superyor na espirituwal na pagtotokdo na itinatao paagi sa organisasyon ni Jehova.—Ikomparar an Gibo 4:13.
12 Kaipuhan an personal na pag-aplikar kan itinatao sa An Satong Ministeryo sa Kahadean, Teokratikong Paadalan sa Pagmiministro, mga Pagtiripon sa Paglilingkod, asin iba pang paagi nin pagtotokdo. Prangkang sinabihan ni apostol Pablo an mga Kristianong Hebreo: “Huli ta, sa katotoohan, minsan ngani kaipuhan na kamo mga paratokdo na huli sa panahon, nangangaipo pa giraray kamo nin may magtokdo sa saindo poon sa kapinonan kan simpleng mga bagay kan banal na mga kapahayagan nin Dios.” (Heb. 5:12) An saro na pira nang taon sa sarong trabaho linalaoman na eksperto na sa paggamit kan saiyang mga kasangkapan. An pag-oswag sa pakanood kun paano makikipag-olay sa Biblia maririsa kun kita magpapaheling nin odok na interes asin magibo nin maimbod na paghihingoa.—Tal. 12:24; 22:29.
13 An pagdalaw liwat asin dugang pang pakikipag-olay sa mga tema sa Biblia sa mga nagpapaheling nin interes sa mensahe kan Kahadean pinagkakagastusan nin panahon asin kosog. Alagad maninigo niatong saboton na an satong pagkanasa katotoohan kapahayagan kan pagkamoot asin dai na kutana maninigong kabootan ni Jehova. Ini ipinahayag paagi sa saro na uminubos nin dakol na oras sa mapasensiang pagtotokdo sato kan katotoohan. Siring man, an pagkamoot maninigong magtulod sato na tubuson an kinakaipuhan na panahon asin idusay iyan sa mas mahalagang gibohon na ini na paggibo nin mga disipulo.—2 Cor. 5:14, 15; Efe. 5:15, 16.
14 Dakol na kongregasyon an nagkuyog sa suhestion kan Sosyedad na gumibo nin mga areglo para sa paghuhulit sa banggi. An amay pang banggi parateng marahay na oras sa pagdalaw liwat sa mga nagpaheling nin interes. An house-to-house record, na nagtatao nin mahalagang impormasyon manongod sa mga tawong tinawan nin patotoo, kaipuhan sa epektibong pagdalaw liwat asin pagpopoon nin orolay sa Biblia. Dai ipaipit an siring na mga rekord sa libro o Biblia dangan lingawan na. An dai pakagirumdom na dumalaw liwat sagkod na makalihis an pirang taon na kamo yaon na naman sa lugar na iyan ibinubugtak an tawo sa peligro na masongko kan mga ahente ni Satanas, na ogmahon na agawon an tibaad ikinatanom na sa puso kan tawo. (Luc. 8:12) Oolangon daw nindo an mga taktika ni Satanas paagi sa pagbuwelta tolos? Kun namamatean nindo an saindong paninimbagan asin pinahahalagahan an saindong pribilehiyo, mabuwelta tolos kamo, sagkod sa mapupuwede.—1 Cor. 9:16, 23.
KUN PAANO POPONAN AN PAG-ADAL SA BIBLIA
15 An pagpopoon nin pag-adal sa Biblia bako man na depisil, komplikadong bagay. An iba tibaad umako tolos sa saindong direktang alok na makipag-adal sa sainda sa Biblia. Minsan siring, an dakol na parahayag mas gustong dai sambiton an pag-adal kundi giyahan sana an orolay sa Biblia pasiring dian.
16 Kaipuhan an pagkamoot sa mga tawo asin an odok na pagmawot na tabangan sinda. Kaipuhan man an marahay na pag-andam. Maninigong kaiba digdi an pagrepaso sa mga notang tibaad ginibo na nindo manongod sa kun ano na an ipinakipag-olay nindo sa tawo asin pagdesisyon sa gigibohon nindong paagi sa dugang pang pakikipag-olay sa Biblia. Isaisip an pankagabsan na direksion kan saindong mga komento. Mapili daw kamo nin pira pang dugang na teksto sa temang pinag-olayan nindo kan enot? O puwede daw nindong buksan an tract o libro na kinua kan tawo asin pag-olayan an pira sa enot na mga parapo kaiba nia? Puwede nindong pilion an tema na dian sia nagpahayag nin interes. Sa primero, makipag-olay sana nin mga 10 o 15 minutos. Puwedeng luway-luway na palawigon an oras, depende sa rarom nin interes na ipinaheheling. An marahay nindong paghusgar maninigong makatabang saindo na mamansayan kun ano an saindong gigibohon asin kun gurano kamo maghahaloy.
17 Kadakol na nakatatabang na suhestion an itinao sa nag-aging mga taon tanganing makatabang saindo sa paggibo nin progresibong mga tangga pasiring sa paggibo nin mga disipulo. Bilang kabtang nin sarong serye, an luwas na Nobyembre asin Disyembre 1990 kan An Satong Ministeryo sa Kahadean may nakatatabang na mga artikulo na may titulong “Taruson an Puso Paagi sa Epektibong mga Pag-adal sa Biblia” asin “Paggiya sa mga Inaadalan sa Biblia Pasiring sa Organisasyon ni Jehova.” An Abril 1987 An Satong Ministeryo sa Kahadean igwa kan artikulong “Pag-andam Para sa Asin Paggibo nin mga Pag-adal sa Biblia.” An madalian na pagheling sa Index sa irarom kan “Bible Studies” madara saindo sa dugang pang nakatatabang na impormasyon.
18 Bilang modelo sa kun paano pangengenotan an pag-adal, mag-atento sa ginigibo sa Pag-adal sa Libro kan Kongregasyon. Siyempre, sa pag-adal sa Biblia, mayo nin dati nang nakaasignar na lawig nin pag-aadalan. Kaya maninigo na ibagay nindo an rikas kan pag-adal sa kakayahan asin mga pangangaipo kan inaadalan. Saro pa, an paraataman sa paglilingkod asin an iba pang eksperyensiadong parahayag asin payunir maoogmang marhay na umiba sa saindo asin tumao nin praktikal na mga suhestion sa pangengenot sa epektibong mga pag-adal sa Biblia.
19 Sa pakaaram na si Jehova an may pangenot na kabtang sa satong mga paghihingoa na tumabang sa mga tawo, maninigo niatong ipamibi bako sanang an pakanompong nin saro na aadalan kundi siring man an pag-oswag nin mga interesadong nanompongan niato. An kaisipan asin saboot niato maninigo na kapareho kan ki apostol Pablo kan sia nagpapatotoo ki Hadeng Agripa: “Inaarang ko sa Dios na baga man sa halipot na panahon o sa halawig na panahon bako sanang ika kundi siring man an gabos na nakakadangog sa sako ngonyan magin arog sa sako.” (Gibo 26:29) Boot ni Pablo na an mga nagdadangog sa saiya magin tunay na mga disipulo ni Cristo, baga man iyan nagkakaipo nin halipot na panahon o nin mas haloy na personal na pagtabang.
20 An pangengenot sa mga pag-adal sa Biblia nagpapangyari sato na “lubos na magpatotoo sa maogmang bareta manongod sa dai na kutana maninigong kabootan nin Dios.” (Gibo 20:24) An dai masabing kabilangan tibaad madara pa hale sa kadikloman pasiring sa liwanag asin hale sa kapangyarihan ni Satanas pasiring sa Dios. (Gibo 26:18) Kamo, an indibiduwal na dusay, bautisadong lingkod ni Jehova, kaipuhan na gibohon an saindong kabtang paagi sa pagtanom nin mga banhi nin katotoohan dangan pag-ataman kaiyan paagi sa kinakaipuhan na pagbaribi paagi sa mga pakikipag-olay sa Biblia asin regular na pag-adal sa Biblia. Sa siring makakamate kamo nin dakulang kagayagayahan sa pakaheling sa mga tawo na nagigin mga disipulo asin minaiba sa saindo sa pagtabang sa iba pa na magin mga disipulo ni Jesu-Cristo.