Seguradohon na Dumalaw Liwat
1 An pagdalaw liwat mahalagang kabtang kan satong paggibo nin mga disipulo. (Mat. 28:19, 20) Nasasabotan niato na mga buhay an napapalabot, kaya ginigibo niato an gabos na paghihingoa na pataluboon an ipinaheling na interes.
2 Maninigo niatong ibilang na angay sa pagdalaw liwat an kada indibiduwal na nagpaheling nin interes, baga man may kinuang babasahon o mayo. Dakol an gustong makipag-olay sa mensahe kan Biblia pero nagsasayuma sa babasahon. Kaya kun may narisang interes, maninigo kitang dumalaw liwat asin pagmaigotan na pataluboon iyan.
3 Pagsongko sa mga Nawarasan nin Babasahon: Mantang an ikinawaras na mga babasahon labing marhay sa mga pagdalaw liwat, may dakulang potensial sa pag-oswag. An sarong payunir nakapasakamot nin libro pero kakadikit na interes an narisa sa kagharong. Sarong hapon pakadalawa kan gabos na iba pa, nagdesisyon an tugang na dalawon an tawong ini. Naponan an pag-adal sa Biblia.
4 An sarong tugang nakawaras nin duwang magasin sa sarong tawo pero nalingawan na sia, sa paghona na bako siang interesado. Pakalihis nin pirang aldaw, an tawo nagsurat sa lokal na kongregasyon sa paghagad nin bautismo. An sarong tugang na misyonera hinapot kun ano an dahelan na natabangan nia an 74 katawo na magin parahayag. Sabi nia: “Dakol kaming ginigibong pagwaras nin magasin, asin padagos kong dinadalaw liwat an mga nag-ako nin magasin sagkod na maponan ko sinda nin pag-adal sa Biblia.”
5 Kun beses tibaad tract sana an ikawalat niato sa enot na pagsongko. An sarong paraataman sa sirkito, kaiba an saro pang parahayag, nakawalat nin sarong tract sa sarong babae. Sinadol nia an tugang na dumalaw liwat. Duminalaw liwat an tugang asin tolos na nakapoon nin pag-adal sa Biblia.
6 Kun May Ipinaheling na Interes: Kun dai kumua nin babasahon an kagharong, ini dai perming nangangahulogan na sia bakong interesado. Narisa nin sarong espesyal payunir na may kadikit na interes an sarong babae na perming nagsasayuma sa mga magasin. Sinaray kan payunir an mga magasin, asin nagusto an babae na makipag-olay sa pirang parapo sa sarong pulyeto. Pakalihis nin pira pang pagsongko, duwang beses na sa laog nin semana an saiyang pag-adal sa Biblia.
7 Mantang dayaday niatong dinadalaw liwat an gabos na nagpaheling nin interes, mag-aani kita nin bunga na magtatao nin nagsosopay na mga bendisyon sa sato ‘asin sa mga naghihinanyog sa sato.’—1 Tim. 4:16.