Pagpapayunir—Kapahayagan nin Pagkamoot
1 An pagkamoot ki Jehova asin sa satong kapwa iyo an nagpapahiro sato na makikabtang nin lubos sa gibohon na paghuhulit. Mantang nagtatalubo an satong pagkamoot ki Jehova asin sa mga tawo, nadadagka kitang magplano para sa mas dakula pang pakikikabtang sa ministeryo. Minahiwas an satong pagkamoot mantang dinudugangan niato an “tamang kaaraman” sa Tataramon nin Dios. (Fil. 1:9, 10) Mantang nakanonood kita nin dakol pa dapit sa kabotan ni Jehova, mas dakula an pagpapahalaga niato sa pagigin apretado kan mga panahon na kinabubuhayan ta. Pinaoorog kaini an satong pagmakolog sa iba. Dakol an nagpapahayag kan saindang mamomoton na pagmakolog paagi sa paglaog sa paglilingkod bilang payunir.
2 Makagigibo daw kamo nin kinakaipuhan na mga pagliliwat tanganing magin auxiliary o regular payunir? Totoo, bakong gabos sa sato nakapagpapayunir. Pero an kada saro sa sato maninigo na analisaron na may pagngayongayo an saiyang mga kamugtakan. Imposible na mangyari an paglaog sa auxiliary o regular na pagpapayunir kun tsamba sana. An positibong paghihingoa na naggigikan sa puso na may tamang motibo an magdadara kan bendisyon ni Jehova. Idolok ki Jehova an bagay na iyan sa pamibi. Ipahayag sa saiya an mawot kan saindong puso. (1 Juan 5:14; 1 Tes. 3:1) Gumibo nin sadiosan na pagsiyasat sa saindong mga kamugtakan tanganing maheling kun saen kamo makagigibo nin mga pagliliwat tanganing maotob an mga kahagadan.
3 Kakadikit na Kristiano an nakaheling na may dakol sindang libreng panahon tanganing magpayunir; kaya, kinaipuhan na ‘tuboson an panahon’ sa dai kinakaipuhan na mga bagay na sa presente naghahagad kan satong panahon. (Efe. 5:15-17) An satong pagkamoot sa Dios asin sa mga tawo kaipuhan na gibohon kitang andam na isakripisyo an iba sa satong personal na mga kamawotan asin kaginhawahan tanganing biyong ikapahayag an satong pagkamoot. (Mar. 12:33) Kadakol sa mga bagay na natitipon niato, asin tibaad namamatean na normal, an puwedeng mansayon bilang mga luho sa ibang kabtang kan kinaban.
4 Ano an magigibo nin mga magurang tanganing tabangan an saindang mga aki na mag-isip sa pamamaagi nin Dios? Kaipuhan na ibugtak nin mga magurang an teokratikong mga pasohan sa atubang kan saindang mga aki poon pa sa amay na edad. Mantang sinda nagdadangadang sa paggraduwar sa eskuwelahan, sinda daw nag-iisip nin sekular o espirituwal na mga pasohan? Boot niatong tabangan an satong mga hobenes na maheling an nagdadanay na mga pakinabang na naggigikan sa paglaog sa paglilingkod bilang payunir sa amay na edad. Ini pagtitipon nin mga kayamanan sa langit. (Mat. 6:19-21) Iyan nagpapaogma sa Dios asin nagtatao nin ebidensia kan satong kaimbodan asin debosyon sa saiya. Asin iliniligtas kaiyan an buhay nin iba.
5 An prangkang pakikipag-olay sa ibang payunir, sa saindong paraataman sa paglilingkod, o sa nangengenot sa saindong Pag-adal sa Libro puwedeng makatao nin nakatatabang na mga suhestion saindo. (Tal. 15:22; 16:3) Puwede man na makapakosog asin makasuportar an mga miembro nin pamilya sa saindong pagmawot na magin sarong payunir.
6 Kabotan nin Dios na an ‘gabos na klase nin tawo makaligtas.’ (1 Tim. 2:4) Puwede daw niatong ipaheling na ini man an satong kabotan? Puwede kun gikan sa boot niatong ibinubugtak na enot an intereses kan Kahadean. Magigibo man niato ini paagi sa pagkakaigwa nin kompiansa na itatao ni Jehova an mga pangangaipo sa buhay. (Mat. 6:31-33) Puwedeng grumabe an mga kamugtakan sa ekonomiya, alagad an panuga ni Jehova na atamanon kita nungka na nagliliwat.—Sal. 37:25.
7 Kapahayagan nin pagkamoot an pagmamaigot niato na makikabtang sa paglilingkod sa langtad sagkod na itinotogot kan satong mga kamugtakan. Para sa iba ini nangangahulogan nin pagigin regular payunir. Taano ta dai gibohon an gabos nindong makakaya tanganing makapoon sa Setyembre 1, 1992?