Paggamit kan Librong Mabuhay Sagkod Lamang sa mga Pagdalaw Liwat
1 Iinagid ni apostol Pablo an mga nagpaheling nin interes sa katotoohan sa bagong mga pananom, na nangangaipo nin regular na pagbaribi asin pangataman. (1 Cor. 3:6-9) Siring man ngonyan, nangangaipo an mga interesado nin mamomoton na pangataman na itinatao niato kun kita nagdadalaw liwat tanganing kultibaron an saindang espirituwal na pagtalubo.
2 Sa parate kinakaipuhan kan mga indibiduwal na satong sinosongko an mga pagirumdom tanganing matabangan sindang magirumdoman an mga puntong pinag-olayan niato kan nakaaging pagdalaw. Kaya sa kada pagdalaw liwat marahay na repasohon sa halipot kun ano an pinag-olayan nindo kan nakaagi.
3 Sa pagdalaw liwat, baga man ikinapasakamot o dai an librong “Mabuhay Sagkod Lamang,” tibaad boot nindong gamiton an direktang pag-atubang na ini tanganing makapoon nin pag-adal:
◼ “Kadakol kan nakakaolay niamo na nakanompong nin mga simbag sa saindang mga hapot sa Biblia paagi sa paggamit kan librong ini.” Dangan mantang binubuksan an mga laog, puwede nindong ihapot: “Arin na tema digdi an interesado kamong marhay?” Buksan sa kapitulo na interesado sia asin ipaheling sa kagharong kun paanong an kada parapo may numero asin igwa nin katangod na hapot sa ibaba kan pahina. Pag-olayan sana an nagkapirang punto asin gumibo nin depinidong areglo sa pagsongko liwat.
4 An saro pang pag-atubang puwedeng:
◼ “Talagang naogma ako sa satong pag-orolay kan nakaaging semana. Kadakol kan naghahapot kun taano ta padagos kaming nagdadalaw sa saindang harong. Naisip ko na magkakainteres kamo sa komento na sinabi sa pahina 29 kan librong ini. [Basahon an parapo 11 kan librong Mabuhay Sagkod Lamang.] Basado sa sinasabi digdi, ano an kinakaipuhan tanganing an satong pagsamba oyonan nin Dios? [Pasimbagon.] Kaidto pang kaaldawan ni Jesus, igwa nin mga naghona na an saindang relihiyon inooyonan nin Dios. Mangnoha an sinabi manongod sainda sa parapo 2 kan kapitulong ini.”
5 Sa pagbabalik sa ikinawalat na librong “Mabuhay Sagkod Lamang,” puwede nindong sabihon:
◼ “Kan nakaaging pagdigdi ko, pinag-olayan niato an mga kamugtakan sa kinaban na nangangaipo nin pagliliwat. Napaghorophorop na daw nindo kun taano ta tinotogotan nin Dios an karatan?” Pasimbagon asin buksan an pahina 99, parapo 2, na iiniiba an mga hapot sa pag-adal. Basahon asin pag-olayan an parapo, na binabasa an mga kasuratan. Puwede nindong dugangan ini paagi sa pagbukas sa mga ilustrasyon sa libro, halimbawa, sa pahina 78, 84-5, 119, 147, 149-53, asin 156-8.
6 Sa Nawalatan nin Sarong Tract: Kun minsan ikinawawalat an sarong tract sa enot na pagdalaw. Sa pagbalik nindo, puwede nindong ipakipag-olay an saro o duwang parapo sa tract kaiba an mga kasuratan na sinitar. Dangan ipaheling kun paano an saro sa mga kasuratan ipinaliwanag nin mas detalyado sa librong Mabuhay Sagkod Lamang.
7 Mantang maimbod niatong inaataman paagi sa pagbaribi an bagong mga pananom nin Kristianong pagtubod na nasa satong pangataman, patataluboon iyan nin Dios para sa saiyang sadiring ikaoomaw asin ikamumuraway.—1 Cor. 3:7.