Mga Paradara nin Liwanag sa Kataraed
1 Pakaatender sa pandistritong kombension sa taon na ini, namatean niato nin orog pa an pangangaipo na magin mga paradara nin liwanag sa satong kataraed. (Mat. 5:14) Mantang hinohorophorop niato an gabos na impormasyon na ipinahayag sa programa asin pinagmamaigotan na iaplikar iyan sa satuyang pan-aroaldaw na buhay, natatabangan kitang mas rumani ki Jehova sa tunay na pagsamba asin tabangan an iba na makanood dapit sa mga panuga ni Jehova.
2 Nadugangan an satong mga oportunidad na magdara nin liwanag kan iluwas, sa pagtatapos kan sesyon sa Biyernes na aga, an bagong tract na may titulong An Kinaban daw na Ini Magdadanay? An mga demonstrasyon kan Sabadong aga nakatabang nin marhay sa pagpapaheling kun paano puwedeng gamiton an tract na ini. Kaiba kaini, nagkaigwa nin anunsio na makukua man an tolo pang ibang tract. An mga ini may titulong Ranga Para sa mga May Depresyon, Maogma sa Buhay Pampamilya, asin Siisay an Tunay na Namomoon sa Kinaban? Itinao an pagpapakosog na darahon niato an mga ini tanganing magamit kun lumataw an mga oportunidad.
3 Sa katapusan kan pahayag na “Kaligtasan Kun Mahayag Na si Jesu-Cristo” kan Sabadong hapon, ilinuwas an marahay na bagong brochure na may titulong An Dios daw Talagang May Pagmakolog sa Sato? Sisimbagon kan magayonon an pagkailustrar na brochure na ini an kadakol na hapot nin mga tawo, arog baga kan: Taano daw ta tinotogotan nin Dios an kasakitan? Matatapos pa daw an kasakitan? Paano daw niato maaaraman na yaon na kita sa mga huring aldaw? Paano daw niato makakamtan an buhay na dai nin katapusan sa bagong kinaban nin Dios? Magigin ekselenteng instrumento an brochure na ini tanganing makapoon nin bagong mga pag-adal.
4 Makapasasalamat nanggad kita sa abundang espirituwal na pagkakan na inako sa “Mga Paradara nin Liwanag” na Pandistritong Kombension! Kita logod, bilang mga paradara nin espirituwal na liwanag nin Dios, magin determinado na iaplikar an satong nanodan asin mahigos na gamiton an marahay na bagong mga luwas na ini tanganing matabangan an mga tawo na mamidbid asin paglingkodan si Jehova.