Pagsunod sa Satong Arogan Bilang mga Paradara nin Liwanag
1 Nagsabi si Jesus: “Ako iyo an ilaw kan kinaban.” Paagi sa pagsunod sa saiyang halimbawa, an mga disipulo ni Jesus nagin man “ilaw kan kinaban.” (Mat. 5:14) Nagsabi si Jesus na an gabos na nagsusunod sa saiya magkakaigwa kan “ilaw nin buhay.”—Juan 8:12.
2 Sinasanay kita kan organisasyon ni Jehova na magin epektibong mga paradara nin liwanag. Kun susunodon niato nin estrikto an giya na satong inaako, mapaliliwanagan niato an gabos na klase nin tawo. (1 Tim. 4:6) An paglilingkod bilang mga paradara nin liwanag kalabot bako sanang an pagtaram manongod sa katotoohan sa lambang oportunidad kundi an pagpadanay man kan marahay na paggawe. An paggawe kan satong Arogan mayong katuyawan. Bilang saiyang mga parasunod, kaipuhan tang ipaheling na an Kristianismo iyo an satong aroaldaw na pamumuhay. (Efe. 5:9; Tito 2:7, 8, 10) Dapat kitang magpaluwas nin mararahay na gibo na maheheling nin iba, na pinahihiro sinda na magpamuraway sa Dios.—Mat. 5:16.
3 An sarong Saksi napaatubang sa sarong pambihirang kahagadan mientras na naghaharongharong. An sarong mag-agom grabe an helang, pero kaipuhan nindang magdeposito nin kuwarta sa bangko. Hinapot ninda kun magigibo iyan kan Saksi. Uminoyon sia asin tinawan nin $2,000 na kuwarta tanganing darahon sa bangko! Kan sia bumalik, naghapot sia: “Paano nindo ako napagtiwalaan na dai ngani nindo ako midbid?” An simbag: “Aram mi, asin aram nin gabos, na an mga Saksi ni Jehova iyo sana an mapagtitiwalaan.” Kanigoan an satong pasasalamat na an satong pagkuyog sa moral na mga prinsipyo sa Biblia nagpoprodusir nin siring karahay na mga gibo!
4 An sarong maestra sa enot na grado nagpaliwanag sa saiyang klase kun taano an sarong sais anyos an edad na estudyanteng Saksi ta dai nakikikabtang sa pagkolor nin mga retrato sa Pangangalag. Nagsabi an maestra na ipinag-oorgolyo nia sia huli sa pagkaigwa kan kapusoan na mapalaen. Kun marigon niatong tinutubod an sarong bagay, nagsabi an maestra, maninigo kitang magkaigwa nin kapusoan na manindogan dian. Kan bangging iyan siniyasat kan maestra an saiya mismong mga paniniwala asin inadmitir na dai sia nakapaheling nin kaparehong kapusoan na manindogan sa saiyang mga kombiksion. Kan sumunod na aldaw iinanunsiar nia na dai na nia ilalabot an saiyang klase sa ano man na selebrasyon sa ngapit, na an nagkapira kaiyan dai nia mismo tinutubod!
5 An banwaan ni Jehova galagang pasirangon an saindang ilaw, saen man sinda. An arogan na paggawe kan mga hobenes sa eskuwelahan hinangaan nin mga kaklase asin maestro. An adultong mga Saksi na nagpapaheling nin marahay na paggawe sa kataraed nagigin dahelan na an iba magtaram nin marahay manongod sa mensahe kan Kahadean. An impormal na pagpapatotoo nakakaakit sa sinserong mga tawo na boot na makanood nin dakol pa. Dawa an satong kahigosan asin pagkasadiosan sa sekular na trabaho nagtatao nin patotoo.
6 Paagi sa pagsunod nin estrikto sa satong dakulang Arogan, makakapadagos kita na magin eksperto sa satong mga abilidad bilang saiyang mga disipulo. An pag-arog sa saiyang halimbawa sisiertohon na an satong ilaw “nakakaliwanag sa gabos.”—Mat. 5:15; 1 Ped. 2:21.