Ihulit an Paagi nin Dios sa Katoninongan Asin Katiwasayan
1 An mga tawo naggibo nin kadakol na plano para sa katoninongan asin katiwasayan, pero mayo sa mga ini an nakapagpanigo sa mga pangangaipo nin tawo sa bilog na kinaban. Minsan ngani an relihiyoso, rasyal, asin nasyonal na mga pagkaongis minalataw na pangenot na mga olang sa sarong matiwasay asin matoninong na kinaban, an tunay na mga Kristiano nakaaaram na an tunay na mga olang iyo si Satanas na Diablo asin an pagsayuma nin tawo na pumasakop ki Jehova Dios.—Sal. 127:1; Jer. 8:9; 1 Juan 5:19.
2 Sa Abril, hihingoahon niato na tabangan an satong kataraed na masabotan na an paagi nin Dios sa katoninongan asin katiwasayan an solamenteng paagi asin na si Jehova igwa kan ultimong solusyon sa gabos na problema nin katawohan.
3 Gamiton an Bagong mga Tract: Ikahihiras niato an nakaparirigon na mensaheng ini paagi sa paggamit kan bagong mga tract na ilinuwas sa satong “Mga Paradara nin Liwanag” na Pandistritong Kombension. An sarong simpleng demonstrasyon nagpaheling kun paano gagamiton an Tract Num. 19, An Kinaban daw na Ini Magdadanay?, na maponan an pag-orolay asin maggiya pasiring sa pag-adal sa Biblia. An nakapahihirong kaotoban kan hula ni Jesus manongod sa katapusan kan kinaban na ini seguradong makapupukaw sa atension nin dakol.
4 Minilyon na tawo ngonyan an namomondo, asin sinda nagmamawot nin panahon nin pagpaomay asin nin tunay na katoninongan asin katiwasayan. An Ranga Para sa mga May Depresyon (Tract Num. 20) puwedeng magin tunay na gikanan nin pagpakosog sa dakol.
5 An Tract Num. 21, Maogma sa Buhay Pampamilya, nagtatao nin praktikal na sadol sa kun ano an magiginibo na mapakarhay an buhay pampamilya minsan ngonyan mantang naghahalat nin sarong magayonon na ngapit sa bagong kinaban nin Dios.
6 An Tract Num. 22 nagtatao nin direktang simbag sa hapot na Siisay an Tunay na Namomoon sa Kinaban? Ini nagpapaliwanag kun taano an mga tawo ta naggamit kan pinakamakababaldeng paagi na pasakitan asin gadanon an lambang saro sa ibong kan pagmawot nin kadaklan na tawo para sa matoninong asin matiwasay na buhay. Igwa nin maraot na espiritung mga puwersa sa kaitaasan, asin an pinakatusong pandadaya ni Satanas papaniwalaon an dakol na sia asin an saiyang mga demonyo dai talaga nag-eeksister.
7 Pumoon nin mga Pag-adal sa Biblia: An pag-adal sa Biblia puwedeng ponan sa sarong tract, brochure, magasin, o libro. Kun an kagharong igwa na nin saro kan satong mga publikasyon, alokon na idemonstrar kun paano ini magagamit sa pag-adal sa Biblia. An bagong mga tract asin an bagong brochure na An Dios daw Talagang May Pagmakolog sa Sato? mga ekselenteng instrumento na magagamit sa pagpopoon nin mga pag-adal sa Biblia.
8 An tunay na katiwasayan magikan sana sa Kaglalang, si Jehova Dios. Gamiton logod niato nin marahay an mga pantabang sa pagtokdo na yaon sa sato na ihulit an paagi nin Dios sa katoninongan asin katiwasayan.—Isa. 2:3, 4.