Sadolon an Iba na Helingon nin Maingat si Jesus
1 Ekselenteng libro an The Greatest Man Who Ever Lived. Puwedeng sadolon kan 133 na kapitulo kaiyan an mga parabasa na helingon nin maingat si Jesus asin arogon an saiyang halimbawa. May nagsabi na kun pag-iribahon an gabos na hade na namahala kaidto pa, sinda gabos dai nakaapektar sa buhay nin tawo nin arog ni Jesus. An mga nagheheling nin maingat ki Jesus siertong makikinabang.
2 Tinokdoan ni Jesus an saiyang mga disipulo dapit sa saiyang Ama asin ipinaghalimbawa an mga kuwalidad nin Dios. Napahihiro an satong puso kun pinag-aadalan niato an ekselenteng abilidad ni Jesus bilang paratokdo, an saiyang daing takot na pangengenot, asin an saiyang maboot na pakikidamay. Kun satuyang ginigirumdom an saiyang mga tinios kan itao nia an saiyang buhay tanganing kita tuboson, napahihiro kita na magpasalamat! Makatatabang sa mga tawo an The Greatest Man Who Ever Lived na helingon si Jesus sa paaging ini.
3 Mag-andam nin Marhay: Magin preparadong marhay na makapoon nin pag-orolay sa Biblia na makasasadol sa iba na helingon nin maingat si Jesus. Puwedeng mag-ensayo nin iriba an mga pamilya asin an iba. Pagmaigotan na pukawon an interes asin pahiroon an mga tawo na basahon an librong Greatest Man. Kun limitado an enot na interes, puwede kitang magwalat nin sarong tract o tibaad brochure o magasin.
4 An satong pakikipag-olay sa harong-harong sa Enero isisentro ki Jesus asin dadagkahon an mga tawo na orog pa siang midbidon. Paagi sa pagtatampok kan mga punto sa librong Greatest Man, matatabangan niato an mga tawo na mansayon si Jesus, bako sanang bilang marahay na tawo, kundi bilang Aki nin Dios asin namamahalang Hade kan gobyerno na maresolber kan gabos na problema nin katawohan.
5 Paano niato madideterminaran kun baga an saro tunay na interesado? Kun an tawo maingat na naghihinanyog, naghahapot, o nagtatao nin partikular na atension sa binabasa niato sa Biblia, ini puwedeng tanda nin sinserong interes. Kun ipaheling niato an libro asin kinua nia tolos iyan, ini nagpapaheling nin tunay na interes na boot niatong kultibaron. Minsan ngani dai nia kuanon an libro, kun nagpaheling sia nin interes marahay na magwalat nin sarong tract, magpalataw nin hapot para sa sunod na pag-orolay, asin iareglo na madalaw liwat.
6 An sarong tawo na dai perming naoogmang bumasa nagpahayag nin apresasyon sa librong Greatest Man, na nagsasabing ginibo kaiyan na maogmahon an pagbasa sa katapusan kan saiyang aldaw. Tabangan niato an iba na mamatean an siring, na sinasadol sinda na helingon nin maingat si Jesus paagi sa pagbasa kan The Greatest Man Who Ever Lived.