Ihiras an Tamang Kaaraman sa Pebrero
1 Sa satong paglilingkod sa langtad sa Pebrero, itatampok niato an librong Mabuhay Sagkod Lamang. Ano an saindong sasabihon tanganing makapoon nin napapanahon na pag-orolay sa Biblia, asin paano nindo iiintrodusir an marahay na babasahon na ini?
2 Paggamit kan Satong Bagong mga Tract: An ibang parahayag nakanompong nin kapangganahan sa paggamit nin mga tract tanganing mapukaw an interes nin saro, bago mag-alok nin ibang babasahon. Paano daw kita matatabangan na magibo ini? Paagi sa pagtatampok kan satong bagong tract na An Kinaban daw na Ini Magdadanay?
Pakatapos nin angay na pataratara, puwede nindong sabihon:
◼ “Hinahapot mi an mga tawo kun naghohona sinda na igwa nin paglaom para sa sarong mas marahay na buhay. Ano daw sa paghona nindo? [Pasimbagon.] Mangnoha an sinasabi digdi sa Biblia sa Juan 17:3. [Basahon.] An Dios asin si Jesu-Cristo sana an makaaalok sato nin buhay na dai nin katapusan. [Buksan an pahina 3 kan tract.] Ilinadawan ni Jesus an mga mangyayari bago an katapusan kan kinaban. Pero sinabi nia sa saiyang mga disipulo na maggayagaya huli ta an mga pangyayaring ini mangangahulogan na an kaligtasan naghaharani na.” Dangan puwede nindong ipaheling an nagkapirang retrato sa kapitulo 19 kan librong Mabuhay Sagkod Lamang tanganing ipaheling an nagkapirang bendisyon kan pamamahala kan Kahadean.
3 Puwedeng gamiton nin sarong hoben o bagong parahayag an mga ilustrasyon sa tract bilang introduksion.
Sa paggamit kan tract na “An Kinaban daw na Ini Magdadanay?,” puwedeng buksan nin sarong parahayag an pahina 3 asin 4 asin magsabing:
◼ “Helinga an duwang retratong ini, an saro eroplanong naghoholog nin mga bomba sa panahon nin guerra asin an saro nagugutom na aki. [Buksan an pahina 5.] Helinga an mga retratong ini nin linog asin nin sarong naghehelang na lalaki sa ospital. [Pumondo nin kadikit.] Ipinaheheling kan Biblia na an siring kagrabeng mga bagay tatapuson sa dai na mahahaloy.”
4 Kun interesado an tawo, basahon an Kapahayagan 21:3, 4 magsalang sa Biblia o sa tract sa pahina 6. Dangan puwede nindong ipaheling an angay na kabtang sa librong Mabuhay Sagkod Lamang, arog baga kan mga ilustrasyon sa pahina 9 asin 11-13.
5 Itogdok an Pundasyon Para sa Masunod na Pagdalaw: Siyempre, baga man kita nakawalat nin sarong tract, o nakapasakamot nin librong Mabuhay Sagkod Lamang, o nagkaigwa sana nin maogmang pakipag-olay, puwede niatong sabihon: “Sa sunod kong pagdigdi, boot ko na ihiras saimo an sarong interesanteng punto dapit sa mga hula sa Biblia na nagpapaheling na kita nabubuhay na ngonyan sa mga tata nin sarong bagong kinaban.” Siertohon na maingat na isurat an pagdalaw asin an ipinaheling na interes, asin dumalaw tolos tanganing makultibar an interes asin tibaad makapoon nin pag-adal sa Biblia.
6 Nag-aalok an Kahadean kan solamenteng tunay na paglaom para sa katawohan. Ipaheling niato an satuyang odok sa boot na pagmawot na ihiras sa gabos na nanonompongan niato an “tamang kaaraman manongod sa banal na hilom nin Dios.”—Col. 2:2.