Padagos na Magtaram Dapit sa mga Bagay na Saindong Naheling Asin Nadangog
1 Minsan kan inuma nin mga pagpakol asin pagkabilanggo, sinabi kan mga apostol sa mga tumang sa sainda: “Dai kami puwedeng mag-ontok sa pagtaram dapit sa mga bagay na samong naheling asin nadangog.” (Gibo 4:20) Inapresyar ninda an halaga kan mga gibo asin katokdoan ni Jesus.
2 An maogmang bareta dapit ki Jesus asin sa saiyang Kahadean importante man para sa mga tawo ngonyan arog kaidto. Kaya, kaipuhan na hanapon ta an gabos na oportunidad na magtaram manongod sa satong naheling asin nadangog sa Tataramon nin Dios.
3 Mga Hobenes, Magtaram sa Eskuwelahan: Kadakol na hoben na Saksi an inaaprobetsaran an mga oportunidad na makapatotoo sa mga kaklase asin maestro. An sarong hoben na Saksi na perming nagmamaigot na magin alisto sa presenteng topikong pinag-oolayan nin mga kaklase inaprobetsaran an sarong situwasyon sa eskuwelahan asin dinolok an mga maestro asin kaklase na dara an angay na publikasyon. An resulta? Nakapasakamot sia nin 35 libro sa sarong aldaw! Mantang kadakol ngonyan an nahahadit dapit sa katoninongan, bako daw magigin marahay na paaramon an mga kaklase asin maestro kun paano si Jesus bilang namamahalang Hade makariresolber sa mga problema sa kinaban?—Ikomparar an Lucas 2:14.
4 Kun an saindong dai pakikabtang sa selebrasyon kan Navidad kan nakaaging Disyembre nagpalataw nin nagkapirang hapot, puwede nindong sabihon:
◼ “Dai ako nakikabtang sa kaorogmahan kan Navidad huli ta an siring na mga selebrasyon dai nagtataong onra ki Jesus bilang an satong solamenteng paagi nin kaligtasan asin an solamenteng makatatapos sa guerra. [Kotaron o basahon an Gibo 4:12.] Si Jesus bako nang omboy kundi namamahala nang Hade. An librong ini, The Greatest Man Who Ever Lived, naglalaman kan gabos na tokdo asin milagro ni Jesus asin nagpapaheling kun paano nia tatapuson an kasakitan nin tawo.” Dangan ipaheling an ilustrasyon sa kapitulo 133, asin basahon an ikaduwang parapo sa sunod na pahina. Ipaheling an iba pang punto na hinohona nindong makaaakit sa tawo asin ialok an libro.
5 Makipag-olay sa mga Katrabaho: An sarong tugang na lalaki nakapasakamot nin 63 na libro paagi sana sa pagbugtak nin kopya kan librong Greatest Man sa ibabaw kan saiyang lamesa. An magayon na itsura kaiyan asin an mismong titulo nakapupukaw nin mga hapot. Puwedeng simple nindong hapoton an sarong katrabaho: “Siisay an sasabihon nindong pinakadakulang tawo na nabuhay kasuarin pa man?” Dangan idugang: “Naglalaman an librong ini nin detalyado kan bilog na buhay ni Jesus, nagpapaliwanag kan gabos na pahayag na itinao nia, nagsisimbag kan mga hapot nin dakol dapit sa saiyang mga milagro, asin nagtatao nin iba pang interesanteng detalye. Iyan maingat na pagrepaso sa itinotokdo kan Biblia dapit ki Jesus asin pinatutunayan na daing pagduda na si Jesu-Cristo an pinakadakulang tawo na nabuhay kasuarin pa man.” Dangan basahon an komento ni Napoléon manongod ki Jesus na kinotar sa ikatolong parapo kan introduksion sa libro.
6 Tibaad lumataw an kaagid na mga oportunidad na makapatotoo sa mga kataed o dai nagtutubod na mga paryentes. Ipamibi na tawan kamo ni Jehova nin kosog nin boot asin abilidad na magtaram sa tamang panahon. (Gibo 4:29, 31) Ano daw an maorog pang eksperyensia niato kisa sa pagtabang sa sarong kaklase, katrabaho, kataed, o paryente na makaabot sa dalan pasiring sa buhay na daing katapusan?—Juan 14:6.