Hapot
◼ Tama daw na magreprodusir nin mga publikasyon kan Sosyedad tanganing idistribuwir sa iba?
Sa nag-aging mga taon, an Sosyedad nag-imprenta nin kadakol na publikasyon manongod sa haros gabos na kabtang nin kaaraman sa Biblia. An mga indibiduwal na nakanood kan katotoohan sa nakaagi pa sanang mga taon puwedeng maghona na nasayang ninda an mga pakinabang nin materyal na ipinublikar kaidto pa asin dai na makukua sa Sosyedad. An nagkapira naghingoang gayo na makakua nin mga kopya kan daan na mga publikasyon, asin an iba mismo rineprodusir an mga publikasyon kan Sosyedad asin ilinuwas iyan sa laen-laen na paagi. Kaiba digdi an aktuwal na pag-imprenta giraray nin mga publikasyon siring man an pagreprodusir paagi sa komputer. Sa nagkapirang kaso, ginibo ini para sa pinansial na ganansia.
An maimbod na “oripon” nakaiisi kan satong espirituwal na mga pangangaipo asin naggigibo nin mga probisyon “sa igong panahon.” (Mat. 24:45) Kun may pangangaipo para sa pagluwas giraray nin materyal na ipinublikar kaidto pa, an Sosyedad naggibo nin mga areglo para dian. Halimbawa, an mga tomo nin The Watchtower poon 1960 sagkod 1985 inimprenta giraray asin makukua na. Alagad, kun an mga indibiduwal iyo na mismo an magreprodusir asin magdistribuwir kan siring na materyal, an dai kinakaipuhan na mga problema puwedeng mangyari.
An seryosong mga problema nangyayari kun an materyal na ini rinireprodusir asin idinidistribuwir para sa pinansial na ganansia. An “Hapot” sa Agosto 1977 na An Satong Paglilingkod sa Kahadean nagsabi: “Pinakamarahay na likayan an pag-aprobetsar sa teokratikong pagtiripon paagi sa pag-introdusir o pag-anunsiar sa pagtinda nin ano man na produkto o serbisyo para sa pagnegosyo sa Kingdom Hall, sa mga pag-adal sa libro kan kongregasyon asin sa mga asamblea kan banwaan ni Jehova. Matatabangan kita kaini na tawan nin lubos na atension an espirituwal na intereses asin papagdanayon na nasa tamang lugar an pagnenegosyo.” Kun siring, importante na likayan niato na magin makiganansia kun mapadapit sa pagnegosyo kan Tataramon nin Dios o mga bagay na konektado dian.