Hapot

◼ Tama daw na mag-ambag para sa transportasyon na itinatagama nin iba?

An iba sa sato nagkakaipo na dumepende sa iba para sa tabang sa regular na pag-atender sa mga pagtiripon asin pakikikabtang sa paglilingkod sa langtad. Dakol na tugang na lalaki asin babae an mamomoton na naggagamit kan saindang panahon, mga sasakyan, asin iba pang kayamanan tangani na magtagama nin transportasyon para sa sato. Maski ngani tibaad kaipuhan nindang mag-andam nin mas amay kisa sa gusto ninda asin naaatraso sinda sa pagpuli, itinatagama ninda an transportasyon na may boluntad na espiritu. Siring sa gabos na iba pang kabtang kan satong Kristianong ministeryo, minaaplikar an prinsipyo na yaon sa Galacia 6:5: “An lambang saro magpapasan kan saiyang sadiring pasan.“ Kun siring, kun igwa nin saro na regular na nagtatagama sa sato nin transportasyon, maninigo niatong ipaheling an satong pag-apresyar bako sanang paagi sa satong mga tataramon kundi paagi man sa rasonableng ambag tangani na makatabang para sa mga gastos na kalabot kun kaya man sana niato.—Mat. 7:12; 1 Cor. 10:24.

Dawa kun an saro na naggagamit kan saiyang sasakyan dai naghahagad nin pinansial na tabang asin garo baga dai nangangaipo kaiyan, an odok sa boot na pag-alok nin ambag perming pinahahalagahan. Tibaad magsayuma an drayber na umako nin ano man; asin, siempre, desisyon nia iyan. Alagad tama sana na kamo an mag-alok. Kun dai pa kamo makaaambag sa panahon na iyan, puede nindong girumdomon iyan; tibaad may ikaaalok na kamo sa masunod na paglunad nindo.—Luc. 6:38.

Mamomoton na gayo para sa mga may sasakyan na magtagama nin transportasyon para sa iba na mayo. (Tal. 3:27) Kadungan kaiyan, mamomoton man para sa mga nakikinabang sa siring na kabootan na magpahayag nin pasasalamat paagi sa pag-ambag sono sa saindang mga kamugtakan.—Col. 3:15.