Magpatotoo Saen Man May mga Tawo
1 Minimidbid an kabtang kan espiritu nin Dios sa saiyang ministeryo, si apostol Pablo nagsabi: “An Dios iyo an nagpapatubo.” Inadmitir man nia: “Kami mga katabang nin Dios.” (1 Cor. 3:5-9) Marahayon na pribilehio ini. Paano niato ikapaheheling sa publiko na pinahahalagahan niato an pagigin mga katabang nin Dios? Paagi sa pagpahayag kan maogmang bareta sa gabos na nanonompongan niato sa pagharongharong asin sa gabos na lugar.
2 Pinagbobotan kita na ‘gumibo nin mga disipulo sa mga tawo.’ (Mat. 28:19) Kun pipira sanang tawo an kakaolayon niato kun kita nakikikabtang sa ministeryo, tibaad madesganar tolos kita asin makamate na kakadikit kan satong nagibo. Sa ibong na kampi, ikinaoogma niatong marhay an satong ministeryo kun nakanonompong kita nin dakol na tawo asin nakakaolay sinda. Ini puedeng magin angat nanggad, huling nangangaipo iyan nin pagsadiring boot sa satong kabtang na dumuman saen man may mga tawo tangani na makaolay niato sinda.
3 Praktikal na mga Halimbawa: Puede kitang magpatotoo sa mga tawo sa mga saod, parke, paradahan, asin istasyon nin auto. Kun naglulunad kamo sa pampublikong mga sasakyan, andam daw kamong magpatotoo mantang nagbibiahe? An duwang Saksi na nakalunad sa sarong surusoan na auto pasiring sa saindang pagtiripon bago maglingkod nag-olay dapit sa retratong Paraiso sa librong Kaaraman. Siring kan linalaoman nindang mangyari, an sarong hoben na lalaki na nakatindog sa harani nagdangog asin naghanga sa saiyang nadangog. Bago lumusad sa auto, nag-ako sia nin sarong libro asin hinagad na may dumalaw sa saiyang harong.
4 Dakol na parahayag an nakanompong nin kagayagayahan sa impormal na pagpapatotoo. An sarong tugang na babae nagduman sa lokal na pamakalan sarong hapon asin dinolok an mga tawo na nakapamakal na alagad malinaw na dai naghihidale. Ikinapasakamot nia an gabos na literatura nia sa saiyang bag. An sarong lalaki na naghahalat sa saiyang kotse maogmang nag-ako sa saiya nin mga magasin. Nakaatender na sia nin mga pagtiripon kan enot, asin an saindang pag-orolay nakapukaw liwat kan saiyang interes.
5 Sarong pribilehio na pamurawayon an ngaran ni Jehova. Paagi sa pagpaheling kan satong kaigotan sa paghuhulit, ipinaheheling niato na dai niato nalipasan an katuyohan kan dai na kutana maninigong kabootan nin Dios para sa sato. Huli ta “ngonyan na an espesyalmenteng panahon” na tabangan an iba, dumuman kita saen man may mga tawo asin magpatotoo sa sainda manongod sa “aldaw nin kaligtasan” ni Jehova.—2 Cor. 6:1, 2.