Pag-andam Liabe sa Kapangganahan
1 An patienot na pag-andam matabang na mapangganahan an ano man na pagkanerbios na tibaad mamatean nindo dapit sa pakikikabtang sa paglilingkod sa langtad. Mantang nagdadangadang kamo sa mga pinto, maaaraman nindo an boot nindong sabihon sa mga kagharong. Dai kamo kaipuhan na mahandal dapit sa pagsimbag sa mga pagkontra. Iyo, an maingat na pag-andam iyo an liabe sa pagpatarom kan satong mga abilidad sa paghuhulit asin pagtotokdo.
2 Dinagka kita ni Pablo na ‘sapinan an satong bitis kan kasangkapan kan maogmang bareta nin katoninongan!’ (Efe. 6:15) Kabale digdi an pag-andam sa satong isip asin puso patin pagkaigwa nin positibong pagmansay. Kun andam kita, babalosan kita nin mga bunga kan Kahadean, na nagpapaogma sa sato.—Gibo 20:35.
3 Kun Paano Maandam Para sa Paghuhulit: Maninigo kitang pumili nin pag-atubang na pamugtak kita, tibaad an mga nasa librong Reasoning, o an mga nasa huring pahina kan An Satong Ministeryo sa Kahadean. Maingat na isip-isipon an teksto na plano nindong gamiton, na inaaram kun anong mga tataramon o frase an idodoon nindo sa pagpalataw kan saindong pangenot na punto. Bakong marahay na tuomon an pag-atubang; imbes, pinakamarahay na girumdomon an ideya asin sabihon iyan sa saindong sadiring mga tataramon sa nakaaakit na paagi.
4 Siyasaton an publikasyon na plano nindong ialok, asin pumili nin mga punto na namamatean nindong magigin interesante para sa mga tawo sa saindong teritoryo. Pag-isipan kun paano nindo puedeng liwaton an saindong pag-atubang para sa laen-laen na kagharong—sarong lalaki, babae, gurang, o sarong hoben.
5 Nagprobar na daw kamong gumibo nin mga pag-ensayo? Magtiripon kaiba kan mga miembro nin pamilya o iba pang parahayag tangani na pag-olayan kun anong mga pag-atubang an puedeng magin epektibo, dangan ensayohon iyan nin iriba tangani na magirumdoman iyan nin marhay kan gabos. Pagmaigotan na gumamit nin aktuwal na mga situwasyon asin pagkontra na nanonompongan sa teritoryo. An siring na pag-ensayo paooswagon an saindong abilidad sa pagtaram, paoorogon an saindong pagkaepektibo sa paghuhulit, asin pasasarigon an saindong kompiansa.
6 Dagdag pa sa pag-andam asin pag-ensayo kan saindong pag-atubang. maninigo man nindong hapoton an saindong sadiri, ‘An gubing daw na pinaplano kong suloton angay para sa ministeyo? Igwa daw ako sa sakong bag kan kakaipuhanon ko, kabale na an literatura na plano kong gamiton? Marahay pa daw iyan? Dara ko daw an sakong librong Reasoning, mga tract, house-to-house record, asin lapis?’ An maingat na pagplano nin patienot makakokontribwir sa mas mabungang aldaw sa paglilingkod.
7 Pakatapos na magibo niato an satong pinakamakakaya sa pag-andam kan satong sadiri, maninigo kitang mamibi para sa espiritu ni Jehova na tabangan kita na magin mapanggana. (1 Juan 5:14, 15) An pagtaong atension sa pag-andam maresulta sa pakanompong nin orog kadakulang kagayagayahan sa satong gibohon, mantang kita ‘lubos na nag-ootob kan satong ministeryo.’—2 Tim. 4:5.