Gigibohon daw Niato Giraray Iyan?—Saro Pang Pangapodan Para sa mga Auxiliary Payunir
1 Ano an gigibohon ta giraray? Kita daw mag-o-auxiliary payunir durante kan panahon nin Memorial? An suplemento sa An Satong Ministeryo sa Kahadean na Pebrero 1997 kinua an satong atension paagi sa titulong darakula an letra na: “Kaipuhan—20,000 na Auxiliary Payunir.” Kompiado kami na hohorophoropon nindo nin seryoso an pangapodan na iyan. Kan kompilaron an Abril 1997 report sa paglilingkod, kami naogmang marhay na maaraman na 22,410 an nagpalista sa paglilingkod bilang auxiliary payunir! Kun idadagdag niato sa bilang na iyan an 14,869 regular payunir asin an 456 na espesyal payunir na nagreport kan bulan na idto, maheheling niato na 30 porsiento kan gabos na parahayag an nasa paglilingkod bilang payunir. Gigibohon daw niato giraray iyan ngonyan na panahon nin Memorial?
2 Mainit niamong kinokomendaran an gabos na naggibo nin dugang pang paghihingoa na dagdagan an saindang aktibidad sa paglilingkod sa langtad kan nakaaging taon. Malinaw nanggad, gabos kamo namotibar kan daing kapasloan na pagkamoot ki Jehova Dios asin sa saindong mga kataed. (Luc. 10:27; 2 Ped. 1:5-8) An mga parahayag na manlaenlaen an kamugtakan sa buhay tinawan nin lugar an pag-auxiliary payunir. Sa sarong kongregasyon, 51 parahayag an iribang nagpayunir kan iyo man sanang bulan, kabale an kadaklan kan kamagurangan, sarong ina na may aking babae na 15 bulan an edad, sarong tugang na babae na binayaan an saiyang trabaho asin nakanompong nin trabaho na por ora sana tanganing sia makapagpayunir, asin sarong mas maedad nang tugang na babae na nungka pang nakapagpayunir. An paraataman sa sirkito nagsurat: “Sarong pambihirang paghihingoa sa paghuhulit an pinonan. . . . Bako sanang may epekto ini sa teritoryo kundi an mga kongregasyon nagsusulwak an entusiasmo. Orog na namimidbid kan mga tugang an lambang saro saka nakaheheling nin marahay na mga resulta sa ministeryo.”
3 Kabale man an mga hoben kan nakaaging taon. An sarong 13 anyos na dai pa bautisadong parahayag haloy nang nag-aantisipar sa panahon na puede na niang simbolisaran an saiyang pagdusay ki Jehova. Pakatapos mabautismohan kan Pebrero, sia nagsurat manongod sa saiyang kamawotan na mag-auxiliary payunir sa Marso: “Mantang mayo na nin nakapopogol sa sako ngonyan, tolos-tolos kong isinumitir an sakong aplikasyon. . . . An dakol na makangangalas na eksperyensia na nakamtan niamo nungka kuta na nangyari kun bakong huli sa saindong mamomoton na pangagda na magpayunir. Nagpapasalamat ako ki Jehova sa pagkaigwa kan pribilehiong ini na makabilang sa mga . . . naghimate.” Inestablisar nia an pasohan na gibohon giraray iyan.
4 Tibaad kabale kamo sa 22,410 na nakikabtang sa aktibidad na pag-auxiliary payunir kan nakaaging Abril, o sa 13,690 kan Marso, o sa 14,332 kan Mayo. Gigibohon daw nindo giraray iyan sa taon na ini? Kun dai kamo nakapagpayunir kan nakaaging taon, magigibo daw nindo iyan ngonyan na taon? Puede ta daw lampasan an 22,410 ngonyan na Abril? Iyan an pinakahalangkaw na bilang nin nag-auxiliary payunir sa arin man na bulan sa sangang opisina digdi sa Pilipinas.
5 Magkonsentrar sa Abril Asin Mayo: Sa taon na ini, an Memorial natangod sa Sabado, Abril 11, na ginigibong ekselenteng bulan an Abril para sa dugang na aktibidad sa ministeryo. (2 Cor. 5:14, 15) Sa enot na 11 aldaw kan bulan, tatawan niato nin atension an pag-imbitar sa pinakadakol na interesado sagkod sa mapupuede na mag-atender sa Memorial. Kun kamo nagpaplano na mag-auxiliary payunir, tabi isumitir an saindong aplikasyon nin mas amay pa sa petsa na gusto nindong magpoon.—1 Cor. 14:40.
6 Mantang igwa nin limang bilog na semana an Mayo, an mga parahayag na may bilog na panahon na sekular na trabaho tibaad manompongan na mas pasil na mag-auxiliary payunir sa bulan na iyan. Paagi sa pag-iskedyul nin sampulong oras sa paglilingkod sa langtad sa kada saro kan limang katapusan kan semana, kaipuhan nindong mag-iskedyul nin dugang na sampulong oras na sana sa bulan tanganing maabot an kahagadan na 60 oras.
7 Kapwa sa Abril asin Mayo, iaatubang niato an mga suskripsion asin indibiduwal na mga kopya nin An Torrengbantayan asin Awake! bilang alok. Ini maninigong magparigon nin orog kan satong boot na maghingoa asin magpayunir. Taano ta nasasabi ta iyan? An mga magasin pasil na iatubang asin nakaoogmang gamiton sa ministeryo. Iyan tamang gamiton sa gabos na kabtang kan paglilingkod—sa harong-harong asin mga tindahan, siring man kun kita minadolok sa mga tawo na nasa tinampo, sa mga paradahan, asin sa mga parke. Pinakamahalaga, An Torrengbantayan asin Awake! paradepensa sa mga katotoohan nin Kahadean. Dinadara kaiyan an atension sa kaotoban kan hula sa Biblia, na pinatutunayan na an Kahadean nin Dios namamahala na. Nakaaapektar man iyan sa buhay nin mga nagbabasa paagi sa may pakasabot na pag-atubang sa tunay na mga pangangaipo nin mga tawo. Kun iisipon niato kun paano naapektaran kan mahalagang marhay na mga babasahon na ini an satong buhay, kita mamomotibar na makikabtang sa pinakamahiwas na paaging posible sa pagdistribwir kaiyan sa Abril asin Mayo.
8 Bilang pag-andam para sa pinahiwas na aktibidad na ini sa magasin, kamo makikinabang sa pagrepaso sa mga artikulong ini: “An Torrengbantayan Asin Awake!—Napapanahon na mga Magasin nin Katotoohan” (Enero 1, 1994 Torrengbantayan), “Gamiton sa Pinakamarahay an Satong mga Magasin” (Enero 1996 na An Satong Ministeryo sa Kahadean), asin “Mag-andam nin Sadiri Nindong Pag-atubang kan Magasin” (Oktubre 1996 na An Satong Ministeryo sa Kahadean).
9 Nangengenot an Kamagurangan: Tanganing tabangan an dakol na parahayag na nagpapayunir kan nakaaging taon, an kamagurangan sa sarong kongregasyon sinuportaran an sarong Sabado kan bulan bilang sarong espesyal na aldaw nin paglilingkod para sa bilog na kongregasyon. Ginibo an mga areglo na magtiripon sa pirang manlaenlaen na oras durante kan aldaw, na tinatawan nin oportunidad an gabos sa kongregasyon na makikabtang sa manlaenlaen na klase nin pagpapatotoo. Kabale digdi an paggibo sa mga lugar nin negosyo, pagpapatotoo sa tinampo, pagsongko sa harong-harong, mga pagdalaw liwat, pagsurat, asin pagpapatotoo paagi sa telepono. Marahayon an nagin resulta, na may 117 parahayag an nakikikabtang sa paglilingkod sa langtad sa bilog na aldaw. Sinda nagkaigwa nin total na 521 oras sa ministeryo asin nakapasakamot nin 617 magasin, brosyur, asin libro! An kaogmahan kan Sabadong idto nakaabot sagkod Domingo, na haros kapantay kan pinakahalangkaw na rekord nin nag-atender sa Pampublikong Pagtiripon asin Pag-adal sa Torrengbantayan.
10 Sa kada Pagtiripon sa Paglilingkod sa Abril asin Mayo, an kongregasyon maninigong pagirumdomon kun noarin asin kun saen gigibohon an mga pagtiripon bago lumuwas para sa paglilingkod sa langtad sa maabot na semana, espesyalmente kun may ginibong dugang na mga areglo apuera sa regular nang nakaiskedyul. An mga regular payunir siring man an mga parahayag na bakong auxiliary payunir ineenkaminar na suportaran an pangrupong mga areglong ini sagkod na itinotogot kan saindang mga kamugtakan.
11 An paraataman sa paglilingkod kaipuhan na makipagmiting sa tugang na nag-aasignar kan mga teritoryo tanganing gibohon an mga areglo para sa paghuhulit sa mga dai parateng nakokobrehan. An dugang na atension puedeng itao sa mga dai nanompongan sa harong asin pagpatotoo sa mga tinampo asin sa mga tindahan. An pagpapatotoo sa banggi puedeng idoon. Maninigong pedidohon an supisyenteng suplay nin mga magasin kapwa para sa Abril asin Mayo bilang pag-antisipar sa dugang na aktibidad.
12 Dakol na Parahayag an Puedeng Makualipikar: An enot na sentence sa aplikasyon sa auxiliary payunir nagsasabi: “Huli sa sakong pagkamoot ki Jehova asin sa sakong pagmawot na tabangan an iba na makanood manongod sa saiya asin sa saiyang mamomoton na mga katuyohan, mawot kong dugangan an sakong kabtang sa paglilingkod sa langtad paagi sa pagpalista bilang auxiliary payunir.” An pagkamoot ki Jehova asin an pagmawot na tabangan an iba sa espirituwal pundamental sa satong pagdusay. (1 Tim. 4:8, 10) Tanganing makualipikar bilang auxiliary payunir, an saro dapat na bautisado, may marahay na kamugtakan sa moral, asin nasa kamugtakan na magdusay nin 60 oras sa ministeryo sa langtad durante kan bulan. Mantang ineestudyaran niato gabos an satong mga kamugtakan, puede daw na an nagkapira sa sato na dai pa noarin man nakapagpayunir magibo iyan ngonyan na taon sa Abril o Mayo?
13 An dakol sa kongregasyon tibaad marealisar na kaya man nindang magpayunir kun naheheling ninda an iba na nagpapalista na an mga kamugtakan kapareho kan sa sainda. An mga aking nag-eeskuela, may edad na, bilog na panahon na sekular na trabahador, kabale an kamagurangan asin mga ministeryal na lingkod, patin iba pa mapangganang nakapag-auxiliary payunir. An sarong misis sa harong asin ina nin duwang aki na nagtatrabaho nin bilog na panahon naabot an 60 oras, nakapasakamot nin 108 magasin, asin nakapoon nin 3 pag-adal sa Biblia sa sarong bulan na pag-auxiliary payunir. Paano nia iyan ginibo? Ginamit nia an oras nin pangodto sa trabaho tanganing magpatotoo sa karaning teritoryo, sia nagpatotoo paagi sa pagsurat, asin sia nakikabtang sa pagpapatotoo sa paradahan asin sa tinampo. Inaprobetsaran man nia an aldaw na mayong trabaho serosemana paagi sa pakikikabtang sa paglilingkod sa langtad kaiba an kongregasyon. Minsan ngani kan primero inisip nia na an pag-auxiliary payunir dai maaabot na pasohan, paagi sa pagparigon sa boot nin iba asin praktikal na iskedyul, napangganahan an mga olang.
14 Sinierto ni Jesus sa saiyang mga disipulo: “An sakong sakal maboot asin an sakong pasan magian.” (Mat. 11:30) Iyan an titulo nin sarong nakaparirigon sa boot na artikulo sa Torrengbantayan na Agosto 15, 1995. Iyan nagsasaysay manongod sa sarong tugang na babae na may masakit, bilog na panahon na sekular na trabaho. Nagsaboot daw sia na an pag-auxiliary payunir bako nanggad para sa saiya? Dai. Sa katunayan, sia nakapag-auxiliary payunir bulan-bulan. Taano? Huli ta namate nia na an pagpayunir talagang nakatabang sa saiya na papagdanayon an saiyang pagigin balanse. An pagtabang sa mga tawo mantang pinag-aadalan ninda an katotoohan sa Biblia asin an pakaheling sa sainda na liniliwat an saindang buhay tanganing kamtan an pag-oyon nin Dios iyo an pinakadakulang gikanan nin kagayagayahan sa saiyang sibot na buhay.—Tal. 10:22.
15 An ano man na personal na mga sakripisyo asin pagliliwat na kaipuhan na gibohon nin saro tanganing makapagpayunir lubos na binabalosan paagi sa mga bendisyon na nakakamtan. An sarong tugang na babae nagsurat kan saiyang eksperyensia sa pag-auxiliary payunir: “Iyan nagtabang sa sako na intindihon bako sana an sakong sadiri asin magkonsentrar nin orog sa pagtabang sa iba. . . . Irinerekomendar ko iyan sa mga kayang gibohon iyan.”
16 Kaipuhan an Marahay na Iskedyul: Sa huring pahina kan suplementong ini, rineprodusir niamo an sampol na mga iskedyul na nasa An Satong Ministeryo sa Kahadean na Pebrero 1997. Tibaad an saro kaini tama sa saindong mga kamugtakan. Mantang rinerepaso nindo iyan, estudyaran an saindong normal na pinagkatodan na aktibidad bulan-bulan. Anong mga proyekto sa harong an puedeng gibohon nin patienot sa pagpayunir nindo o puedeng ipagilid nguna nin temporaryo sagkod na matapos? Puede daw na haleon an nagkapirang panahon na ginagamit nindo sa pag-aling-aling, dibersion, o iba pang mga klase nin paglilibang? Imbes na konsideraron an 60 oras na kaipuhan, planohon an saindong iskedyul nin aldawan o semanal. Duwang oras kada aldaw o 15 oras kada semana sana an kaipuhan tanganing makapag-auxiliary payunir. Helingon an sampol na mga iskedyul, asin paagi sa paggamit nin lapis, helingon kun ano an magagamit nindo sa personal na iskedyul sa paglilingkod na pinakaangay sa saindo asin sa saindong pamilya.
17 An marahay na simbag asin dugang na suporta na ipinaheling kan kongregasyon para sa ministeryo kan nakaaging taon nagparigon kan entusiasmo nin sarong regular payunir na nagsurat: “Salamat na marhay sa saindong mamomoton na pagparigon sa boot na dugangan an paghihingoa na suportaran an pag-auxiliary payunir. . . . An saindong isinuherir na mga iskedyul nakatabang sa dakol na nungkang nakapagpayunir na rekonoseron na kaya nindang gibohon iyan. . . . Naoogma akong marhay na magin kabtang kan organisasyon ni Jehova asin sunodon an maogmang mamomoton na paggiya kan fiel asin madonong na oripon.”
18 Sinisierto sa sato kan Talinhaga 21:5: “An mga plano kan mahigos siertong pasiring sa pakinabang.” An Talinhaga 16:3 pinaririgon an satong boot: “Ipamahala mo ki Jehova an saimong mga gibo asin an saimong mga plano mapaparigon.” Iyo, paagi sa mapagngayongayong pag-ayon ki Jehova sa satong desisyon asin marigon na pagsarig sa saiya na tatabangan kita na magin mapanggana, kita puedeng magin positibo manongod sa satong mga plano na mag-auxiliary payunir. Tibaad pakatapos na maheling kun gurano kamapanggana kan satong iskedyul sa laog nin saro o duwang bulan na pag-auxiliary payunir, kaya ta nang markahan an kahon sa aplikasyon sa auxiliary payunir na nagsasabi: “Bugtakan nin tsek digdi kun gusto nindong padagos na mag-auxiliary payunir sagkod na boot nindo.” Sa ano man na kamugtakan, puede kitang makalaom na mag-auxiliary payunir giraray sa Agosto, na igwa nin limang bilog na Sabado asin Domingo. Mantang tinatapos niato an taon nin paglilingkod sa Agosto, magkakaigwa nin sararong paghihingoa tanganing an gabos makapartisipar nin biyo sa ministeryo sagkod sa mapupuede.
19 Si Jesus naghula: “An minatubod sa sako, an saro man na iyan magibo kan mga gibo na ginigibo ko; asin magibo sia nin mga gibo na orog pa kaini.” (Juan 14:12) Magayagayang pribilehio niato na maglingkod bilang mga katabang nin Dios mantang an hulang ini nagkakaigwa kan dakulang kaotoban kaiyan. Ngonyan na an panahon na ihulit an maogmang bareta na may pinakamakosog na puersa kisa kasuarin man, na tinutubos an panahon tanganing mahaman an gibohon na ini. (1 Cor. 3:9; Col. 4:5) An pakikikabtang nin parate sagkod sa mapupuede sa paglilingkod bilang auxiliary payunir sarong marahayon na paagi na gibohon an satong kabtang bilang mga parabalangibog kan Kahadean. Kita odok na naghahalat na maheling kun gurano kadakula kan awit nin pag-omaw sa panahon na ini nin Memorial hale sa mga auxiliary payunir. (Sal. 27:6) Hinohorophorop an mga resulta kan nakaaging tigsoli, kita nag-iisip, ‘Gigibohon daw niato giraray iyan?’ Kita kompiado na magigibo ta iyan!
[Kahon sa pahina 3]
Kaya daw Nindong Mag-auxiliary Payunir?
“Ano man an saindong personal na mga kamugtakan, kun kamo bautisado, may marahay na kamugtakan sa moral, ikaaareglo na maabot an kahagadan na 60 oras sa sarong bulan sa ministeryo sa langtad asin naniniwala na kaya nindong maglingkod nin saro o duwang bulan bilang auxiliary payunir, an mga magurang sa kongregasyon maoogmang konsideraron an saindong aplikasyon para sa pribilehiong ini nin paglilingkod.”—Organized to Accomplish Our Ministry, pahina 114.
[Kahon sa pahina 6]
Mga Iskedyul Para sa Auxiliary Payunir
Mga Sampol sa Pag-iskedyul nin 15 Oras sa Paglilingkod sa Langtad Kada Semana
Mga Aga—Lunes Sagkod Sabado
An Domingo puedeng isalida sa arin man na aldaw
Aldaw Peryodo Oras
Lunes Aga 2 1⁄2
Martes Aga 2 1⁄2
Mierkoles Aga 2 1⁄2
Huebes Aga 2 1⁄2
Biernes Aga 2 1⁄2
Sabado Aga 2 1⁄2
Total na Oras: 15
Duwang Bilog na Aldaw
Puedeng pumili sa arin man na duwang aldaw sa laog nin semana
Aldaw Peryodo Oras
Mierkoles Bilog na Aldaw 7 1⁄2
Sabado Bilog na Aldaw 7 1⁄2
Total na Oras: 15
Duwang Banggi Asin Sabado Patin Domingo
Puedeng pumili sa arin man na duwang banggi sa ordinaryong mga aldaw
Aldaw Peryodo Oras
Lunes Banggi 1 1⁄2
Mierkoles Banggi 1 1⁄2
Sabado Bilog na Aldaw 8
Domingo Kabangang Aldaw 4
Total na Oras: 15
Mga Hapon sa Ordinaryong mga Aldaw Asin Sabado
An Domingo puedeng isalida sa arin man na aldaw
Aldaw Peryodo Oras
Lunes Hapon 2
Martes Hapon 2
Mierkoles Hapon 2
Huebes Hapon 2
Biernes Hapon 2
Sabado Bilog na Aldaw 5
Total na Oras: 15
An Sakong Personal na Iskedyul sa Paglilingkod
Magdesisyon sa bilang nin oras para sa kada peryodo
Aldaw Peryodo Oras
Lunes
Martes
Mierkoles
Huebes
Biernes
Sabado
Domingo
Total na Oras: 15