Kun Paano Sasanayon an mga Bagohan na Maghulit
1. Ano an namatean nindo kan enot kamong makikabtang sa ministeryo?
1 Nagigirumdoman daw nindo kan enot kamong makikabtang sa ministeryo sa harong-harong? Posibleng marhay na ninerbios nanggad kamo. Kun kaiba nindo kaidto an nagtotokdo sa saindo sa Biblia o an saro pang parahayag, daing duda na naogma kamo na yaon sia tanganing tumabang. Ngonyan na nagkaigwa na kamo nin eksperyensia bilang ministro, nasa kamugtakan kamong tumabang sa pagsasanay sa mga bagohan na maghulit.
2. Ano an kaipuhan na manodan nin bagohan na mga parahayag?
2 Kaipuhan kan bagohan na mga parahayag na makanood kun paano mapoon nin pakikipag-olay sa kagharong, paano gagamiton an Biblia sa may pinto, paano magibo nin mga pagdalaw liwat, asin paano mapoon saka makondukta nin mga pag-adal sa Biblia. Maninigo man sindang makanood kun paano maghulit sa manlaenlaen na paagi, siring kan pagpapatotoo sa tinampo asin pagdalaw sa mga tawo sa mga lugar nin negosyo. Matatabangan nindo sinda na umoswag sa mga pamamaaging ini paagi sa saindong halimbawa sagkod mga suhestion.
3. Paano niato matatabangan an iba paagi sa satong halimbawa?
3 Magtokdo Paagi sa Halimbawa: Idinemonstrar ni Jesus sa saiyang mga disipulo kun paano maghulit. (Luc. 8:1; 1 Ped. 2:21) Kun iinaareglo nindo na makaibanan an sarong bagohan na parahayag, mag-andam nin simpleng presentasyon na puedeng arogon kan parahayag, na tibaad ginagamit an sarong sampol sa saro sa mga publikasyon niato. Dangan, mag-alok na kamo an makikipag-olay sa enot na saro o duwang kagharong tanganing madangog kan parahayag an sasabihon nindo. Mantang pasiring sa sunod na harong, puede nindong hagadon an mga obserbasyon kan parahayag dapit sa pagkaepektibo kan saindong presentasyon. Matatabangan sia kaini na maheling an kahalagahan kan paghuhulit na may kaibanan, asin magigin mas madali para sa saiya na akoon an ano man na suhestion na itatao nindo pagkatapos kan saiyang presentasyon.
4. Paano niato matatabangan an sarong bagohan na parahayag pagkatapos na madangog an saiyang presentasyon?
4 Magtao nin mga Suhestion: Nagtao man si Jesus nin mga instruksion sa saiyang mga disipulo kun paano maghulit. (Mat. 10:5-14) Puede nindong tabangan an bagohan na parahayag sa kaagid na paagi. Kun turno na niang magtaram, maingat na maghinanyog. Dangan pakahale nindo sa harong, magin andam na magtao nin espesipiko asin sinserong komendasyon, dawa kun naobserbaran nindo na may mga kaipuhan na paoswagon sa saiyang presentasyon. Bago magtao nin suhestion, puede nindong helingon nguna kun baga napaoswag nia an aspektong iyan sa sunod na harong. Tibaad ninenerbios sana sia. Tandaan man na bakong parareho an abilidad kan mga parahayag, asin sa parate may iba pang tamang paagi sa paggibo nin sarong bagay.—1 Cor. 12:4-7.
5. Ano an puede niatong sabihon kun nagtatao kita nin mga suhestion?
5 Kun beses, mahagad sa saindo nin mga suhestion an sarong bagohan na parahayag. Alagad kun dai, magsadiring boot na tabangan sia. Paano ini magigibo sa mataktikang paagi? An nagkapirang eksperyensiadong parahayag naghahapot sana nin, “Puede daw akong magtao nin suhestion sa saimo?” o, “Ano an masasabi mo sa presentasyon mo kasubago?” An saro pang opsion iyo an pagsabing, “Kan ako bagohan na parahayag, nasakitan ako na . . . , alagad nakatabang ini sa sako. . . . ” Kun beses, kapakipakinabang na magkaibanan na kumonsulta sa librong Reasoning. Tanganing dai man nindo sia mabigla, magtao nin mga suhestion sa saro sanang aspekto kan saiyang presentasyon.
6. Kun mapadapit sa ministeryo, paano ‘an batbat minapatarom sa batbat’?
6 An Batbat Minapatarom sa Batbat: Dinagka ni Pablo si Timoteo, sarong eksperyensiadong ebanghelisador, na padagos na magmaigot sa pagtotokdo asin sa pag-oswag. (1 Tim. 4:13, 15) Minsan ngani tibaad dakol nang taon an nakaagi kan enot kamong makikabtang sa ministeryo, maninigo na nungka kamong pumondo sa paghihingoang paoswagon an saindong mga abilidad. Makanood sa mga parahayag na nakakaiba nindo sa paghuhulit, dawa sa mga bako pa gayong eksperyensiado sa ministeryo, asin magin alisto na maboot na tabangan an iba, lalo na an mga bagohan, na magin ekspertong mga ministro kan maogmang bareta.—Tal. 27:17.