Nakapagdemonstrar na daw Kamo nin Pag-adal sa Biblia sa Enot na Pagdalaw?

Kun inaalokan nin pag-adal sa Biblia, an nagkapirang kagharong nagsasabi na dai sinda interesado o na igwa sinda nin pag-adal sa Biblia sa saindang simbahan. Huling dai ninda aram kun paano kita nagkokondukta nin pag-adal sa Biblia, mayo sindang ideya dapit sa kaliwanagan asin kaogmahan na puedeng itao kaiyan. Kun siring, imbes na mag-alok sana nin pag-adal, taano ta dai idemonstrar sa laog nin pirang minuto an pag-adal sa Biblia sa enot na pagdalaw? Sa pag-ilustrar: Dai sana sabihon sa sainda na matibay kang paraluto asin mag-alok na bumalik na may darang pagkakan; panamiton na tolos sinda! Arog kaini an paggibo kaiyan sa pira sanang minuto, basado sa sarong suhestion sa pahina 6 kan Enero 2006 na An Satong Ministeryo sa Kahadean:

“Sa paghona daw nindo maabot pa an panahon na maootob an mga tataramon na ini? [Basahon an Isaias 33:24, asin pasimbagon.] Ipaheling ko tabi sa saindo an sarong interesanteng punto dapit sa temang iyan.” Pakapotan sa kagharong an librong Itinotokdo kan Biblia, asin itokdo sa saiya an parapo 22 sa pahina 36. Basahon an hapot sa ibaba kan pahina, asin pakiolayan an kagharong na hanapon an simbag mantang binabasa nindo an parapo. Dangan basahon giraray an hapot, asin maghinanyog sa komento kan kagharong. Magkaibanan na basahon an saro pa sa mga teksto. Magbangon nin hapot na sisimbagon sa sunod na pagdalaw, asin gumibo nin depinidong areglo na bumalik. Nakapoon na kamo nin pag-adal sa Biblia!