Dati Ka daw na Regular Payunir?
1. Anong pribilehio an nakakamtan nin dakol, alagad ano an kaipuhan na gibohon nin nagkapira?
1 Sa nag-aging mga taon, rinibo an nagkakapribilehio na ‘magtokdo asin magpahayag kan maogmang bareta’ bilang bilog na panahon na mga ministro. (Gibo 5:42) Minsan siring, kinaipuhan nin nagkapira na magpondo sa pagpayunir huli sa manlaenlaen na dahelan. Kun ika dating regular payunir, siniyasat mo na daw an kamugtakan mo sa presente tanganing maheling kun puede kang magpayunir giraray?
2. Taano ta maninigong siyasaton kan mga nagpayunir kan nakaagi an mga kamugtakan ninda sa presente?
2 Nagbabago an mga Kamugtakan: Posibleng mayo na an dahelan kan pagpondo mo sa pagpayunir. Halimbawa, kun nagpondo ka sa pagpayunir huling dai mo naaabot an kahagadan na 90 oras kada bulan, puede ka daw na magpayunir giraray ngonyan na ibinaba na iyan sa 70 oras? Nainaan na daw an pangangaipo na ika magtrabaho o an paninimbagan mo sa pamilya poon kan magpondo ka sa pagpayunir? An sarong tugang na babae na nagpondo sa pagpayunir huli sa problema sa salud nakapagpayunir giraray sa edad na 89. Labing sarong taon na siang dai naoospital, kaya an pagmate nia makakaya na kan salud nia na magpayunir giraray!
3. Paano makikikooperar an magkakapamilya tanganing matabangan an saro sa sainda na makapagpayunir?
3 Tibaad bako ka man dating payunir, alagad saro sa kapamilya mo an nagpondo sa pagpayunir tanganing atamanon an saro sa kapamilya nindo, arog baga nin nagkakaedad nang magurang. (1 Tim. 5:4, 8) Kun iyo, puede daw na ika o an iba sa kapamilya mo gumibo nin orog pa tanganing makatabang? Taano ta dai iribang pag-orolayan an mga bagay na iyan? (Tal. 15:22) Kun makikikooperar an mga magkakapamilya tanganing makapagpayunir an saro sa sainda, an gabos tama sanang makamate na igwa sinda nin kontribusyon dian.
4. Paano kun dai mo kayang magpayunir giraray ngonyan?
4 Dai madesganar kun an kamugtakan mo sa presente dai nagtotogot sa saimo na makapagpayunir giraray. An pagigin andam mo na gibohon iyan nakakapaogma ki Jehova. (2 Cor. 8:12) Gamiton sa ministeryo mo sa presente an mga nanodan mo kaidtong payunir ka pa. Ipamibi mo an pagmawot na iyan, asin magin alerto sa mga oportunidad na bagohon an saimong kamugtakan. (1 Juan 5:14) Tibaad pag-abot nin panahon, bukasan ni Jehova para sa saimo an “sarong dakulang pinto na pasiring sa gibohon” tanganing maeksperyensiahan mo giraray an kagayagayahan nin pagigin regular payunir!—1 Cor. 16:9.