Puwede daw Kamong Umiba Giraray sa Grupo nin mga Payunir?
1 Durante kan nakaaging limang taon, rinibong regular payunir an kinaipuhan na humale sa grupo nin mga payunir. Kamo daw saro sa sainda? Kun an salud, pinansial na mga problema, o mga obligasyon sa pamilya nagpangyari na kaipuhan nindong umontok, naliwat na daw an saindong mga kamugtakan? Puwede daw kamong gumibo nin nagkapirang pagliliwat tangani na makapagpayunir giraray? Napaghorophorop na daw nindo an dapit sa pag-aplay giraray?
2 Siring sa aram nindo, hinahagad an marahay na pag-organisar kun boot nindong magin mapanggana bilang payunir. Mantang mayo nin dakol na panahon para sa pag-aling-aling, an halipot na mga peryodo nin pagrelaks na ikinaoogma nindo parateng mas nakakakontento. (Tal. 19:17; Gibo 20:35) Paagi sa pagdadanay na sibot sa paglilingkod, napoprotehiran kamo sa makasadiring paagi nin pamumuhay kan kinaban. Nanuga si Jehova na payayamanon nia kamo sa espirituwal kun eenoton nindo an intereses kan Kahadean. Siertong makakaeksperyensia kamo nin tunay na kagayagayahan asin pagkakontento paagi sa pagigin bilog na puso sa paglilingkod ki Jehova.—Tal. 10:22; Col. 3:23, 24.
3 An pambilog na panahon daw na ministeryo sarong pribilehiyo na bukas sana espesyalmente sa nagkapira? Bako—iyan bukas sa gabos. Huli sa satong sumpa sa pagdusay, an lambang Kristiano maninigong magtao nin odok na pagkonsiderar sa pambilog na panahon na paglilingkod apuwera sana kun an mga kamugtakan ginigibo iyan na imposible.—Mar. 12:30.
4 Kun an saindong salud asin Makakasuratan na mga paninimbagan dai kamo tinotogotan na magpayunir sa presente, makakasierto kamo na si Jehova nakakaaram asin nakakasabot. Babalosan nia an ano man na nagigibo nindo. (1 Cor. 4:2; 2 Cor. 8:12) Pero, kun garo baga posible na ngonyan para saindo na magpayunir giraray, taano ta dai dumolok sa nangengenot na paraataman asin maghagad nin aplikasyon?
5 Makakatabang daw an Saindong Pamilya? Tibaad huminale kamo sa grupo huli ta kaipuhan nindong asikasohon an pampamilyang mga obligasyon. Posible daw na an ibang miembro kan pamilya nasa kamugtakan na ngonyan na magtao nin tabang na magpapangyari saindo na lumaog giraray sa pagpapayunir?
6 An marahay na kooperasyon asin dikit pang paghihingoa kan ibang miembro kan pamilya tibaad gibohon ining posible. An tabang puwedeng sa porma nin pagsustento sa mga gastos o transportasyon, siring man regular na mga pakikipag-olay na mag-ibahan sa paglilingkod. Kun an mga kamugtakan dai nagtotogot saindo na lumaog giraray sa pribilehiyong ini nin paglilingkod, tibaad an siring na tabang puwedeng ikatao sa saro pang miembro kan pamilya na makakagibo kaiyan.
7 Taano ta dai pag-olayan an bagay na ini bilang sarong pamilya? An mga linalaoman tibaad marahay kun gigibohon nindo iyan na proyekto nin nagkakasararong pamilya. Kun saro pang payunir an ikadudugang sa grupo, an bilog na pamilya tamang makakamate na igwa sinda nin kabtang. An siring kamatinaong espiritu dayupot na pagsasararoon an pamilya sa espirituwal.—Luc. 6:38; Fil. 2:2-4.