Patamaon sa Madonong na Paagi an mga Suntok Nindo
1. Paano aplikado sa ministeryo an 1 Corinto 9:26?
1 Si apostol Pablo nagsurat: ‘Ako nagdadalagan nin bakong siring sa daing pasohan; siring man ako nakikisuntokan, bakong siring sa nagsusuntok sa doros.’ (1 Cor. 9:26) An sinasabi digdi ni Pablo iyo an manongod sa saiyang pagigin determinado asin konsentrado nanggad sa pag-abot sa espirituwal na mga pasohan. Minsan siring, an prinsipyo sa mga tataramon na ini aplikado man sa ministeryo. Gusto tang patamaon sa madonong na paagi an mga ‘suntok,’ o paghihingoa niato tanganing magibo an pinakamarahay. Paano?
2. Paano niato maaarog si Pablo asin an iba pang ebanghelisador kan enot na siglo sa pagpili kun noarin asin kun saen mahulit?
2 Magduman Saen Man May mga Tawo: Si Pablo asin an iba pang mga ebanghelisador kan enot na siglo naghulit saen man may inaasahan sindang mga tawo. (Gui. 5:42; 16:13; 17:17) Kaya, kun an dakol na tawo sa teritoryo niato nasa harong na kun banggi, puedeng ini an pinakamarahay na panahon na magharongharong. Dakol daw nin tawo an istasyon nin bus o tren sa teritoryo nindo, kun amay na aga asin kun pabanggi na, huling pasiring sa trabaho o papuli na an mga tawo? Anong mga oras pano nin tawo an mga shopping area sa teritoryo? Sa mga oras na ini puedeng pinakamabunga an paghuhulit sa tinampo.
3. Paano niato mapapatama sa madonong na paagi an mga suntok niato kun dapit sa pagkobre kan satong teritoryo?
3 Kobrehan an Teritoryo sa Madonong na Paagi: Maninigo man na magin maingat tanganing mapatama sa madonong na paagi an mga suntok niato kun dapit sa pagkobre kan satong teritoryo. Halimbawa, imbes na iasignar an dakulaon na grupo sa saro sanang lugar, kun saen kaipuhan an dakol na panahon asin paghihingoa tanganing mapagdanay iyan na organisado asin okupado, mas marahay na barangaon an grupo. Sa kaagid na paagi, kun naghuhulit sa mga baryo, mas madali tang makokobrehan an teritoryo asin mas dakol kitang makakaolay kun bakong gayong dakula an mga grupo. Puede daw kitang maghagad nin personal na teritoryo na harani sa harong niato tanganing mabawasan an oras na kaipuhan sa pagbiahe?
4. Ano an makakatabang sa sato na magin mapangganang mga ‘parasira nin mga tawo’?
4 An mga ebanghelisador iinagid ni Jesus sa mga ‘parasira nin mga tawo.’ (Mar. 1:17) An obheto nin parasira bako sanang manira kundi makadakop nin sira. Kun siring, an mapangganang mga parasira naninira kun saen asin kun noarin may inaasahan sindang madadakop, dangan daing pag-atraso sindang minapoon na manira. Iyo, ginagamit ninda sa madonong na paagi an saindang panahon asin kosog. Logod na magpaheling man kita nin parehong kahigosan sa ministeryo niato.—Heb. 6:11.