Andam daw Kamo sa Medikal na Emerhensia?
An medikal na emerhensia puedeng mangyari nin bigla asin mayong patanid. (Sant. 4:14) Kun siring, an saro na madonong mag-aandam sagkod sa mapupuede. (Tal. 22:3) Nakapagdesisyon na daw kamo kun anong medikal na mga pagbolong asin prosedimiento an aakoon nindo, saka isinurat na daw nindo iyan? Tanganing matabangan kamo, ginibo an video na Transfusion-Alternative Health Care—Meeting Patient Needs and Rights, an ikaduwang presentasyon sa DVD na Transfusion-Alternatives—Documentary Series. Mantang nagdadalan o nagheheling kaiyan, probaran kun masisimbag nindo an minasunod na mga hapot. Huling an video na iyan may haralipot na eksena nin operasyon, maninigo na gumamit nin diskresion an mga magurang kun may kaibang saradit pang aki.
(1) Taano ta sinisiyasat giraray nin nagkapira sa medikal na propesyon an pagsasalin nin dugo? (2) Magtao nin tolong halimbawa nin komplikadong pag-operar na mayong pagsasalin nin dugo. (3) Taano ta andam an dakolon na doktor asin siruhano sa bilog na kinaban na bolongon an mga pasyente na mayong pagsasalin nin dugo? (4) Ano an ihinayag kan dai pa sana nahahaloy na mga pagsiyasat sa ospital manongod sa paggamit nin dugo? (5) Anong medikal na mga peligro an konektado sa pagsasalin nin dugo? (6) Ano an nagin kongklusyon nin dakol na eksperto mapadapit sa mga pakinabang kan mga alternatibo sa pagsasalin nin dugo? (7) Ano an dahelan nin kakulangan nin pulang selula kan dugo (anemia), asin ano an puedeng gibohon tanganing maremedyohan iyan? (8) Paano mapapadakol sa hawak nin pasyente an produksion nin pulang selula kan dugo? (9) Ano an mga pamamaagi tanganing malimitaran an pagkaubos kan dugo durante nin operasyon? (10) Magigin epektibo daw sa saradit pang aki o sa mga namemeligrong magadan an mga alternatibo sa pagsasalin nin dugo? (11) Ano an saro sa pangenot na moral na mga prinsipyo nin marahay na medikal na pag-asikaso sa salud?
Huling an pag-ako sa nagkapira sa mga pagbolong na itinampok sa video nakadepende sa konsensia nindo, dai na paghalaton na mapaatubang kamo sa emerhensia bago pag-adalan kun ano an aakoon nindo o dai. An kapitulo 7 kan librong “Pagkamoot nin Dios” asin an mga reperensiang sinambit dian saka an suplemento sa isyu kan An Satong Ministeryo sa Kahadean na Enero 2007 makakatabang sa saindo na magdesisyon basado sa nanodan nindo. Dangan, kun bautisado kamo, isurat an mga desisyon nindo sa DPA card asin darahon iyan sa gabos na panahon.
[Blurb sa pahina 3]
Nakapagdesisyon na daw kamo kun anong medikal na mga pagbolong asin prosedimiento an aakoon nindo saka isinurat na daw nindo ini?