Pagpauswag kan Satong Kakayahan sa Ministeryo—Paggibo nin Rekord kan mga Interesado

“Pirmi mong tawan nin atensiyon an saimong sadiri asin an saimong pagtutukdo.” (1 Tim. 4:16, NW) An ipinasabong na konsehong ini ni Pablo ki Timoteo nagpaparisa na maninigo kitang maghinguwang umuswag bilang ebanghelisador, baga man kita baguhan o eksperyensiyado na. Para matabangan kitang magibo iyan, sarong bagong serye an maluwas sa An Satong Ministeryo sa Kahadian na may titulong “Pagpauswag kan Satong Kakayahan sa Ministeryo.” Tutukaron sa kada artikulo an sarong simple pero mahalagang kakayahan. Matao man iyan nin nagkapirang suhestiyon. Durante kan bulan, dinadagka an gabos na pauswagon an kakayahan na iyan. Pagkatapos kan bulan na iyan, sa sarong kabtang sa Pagtiripon sa Paglilingkod magkakaoportunidad kita na makapagkomento kun paano kita nakinabang asin makakapagsaysay nin mga eksperyensiya. Sa bulan na ini, dinadagka kita na hinguwahon na gumibo nin rekord kan mga nagpahiling nin interes.

Kun Taano ta Mahalaga Iyan: Para mautob an sugo sa sato, bako sanang paghuhulit an dapat tang gibuhon. Dapat tang balikan an mga interesado asin tukduan sinda, na garo binabaribian an mga banhi nin katotoohan na naitanom niyato. (Mat. 28:19, 20; 1 Cor. 3:6-9) Nangangaipo ini na hanapon giraray an tawong iyan, ipakipag-ulay an mga ikinakahadit niya, asin ipadagos an napag-ulayan kan nakaagi. Kaya, kun makanumpong kita nin interesado, kaipuhan tang irekord iyan.