An Pagpahiling nin Personal na Interes Nagdadara nin Panghabangbuhay na mga Bendisyon

Si Papa sarong elder sa United Church of Canada sa lugar mi, kaya kada semana pinapaatender niya kami kan tugang kong babayi sa Sunday school, pagkatapos kaiyan maiba na man kami sa saiya para sa church service pag alas 11 nin aga. Pagkahapon, nag-iiba kami ki Mama sa Kingdom Hall. Madali mi sanang nahihiling an pagkakaiba kan duwang relihiyon.

Sinabi man ni Mama an saiyang bagong mga paniniwala sa haloy nang mga amigo niya na si Bob saka si Marion Hutcheson, na nag-ako man kan katotoohan. Kan 1958, iiniba ako kan mag-agom na Hutcheson, kaiba kan tulong aki nindang lalaki, sa walong aldaw na Divine Will International Assembly sa New York City. Pag nagigirumduman ko idto, napag-isip-isip ko kun gurano kadipisil kaidto sa sainda na iiba ako, pero an asembleyang idto an saro sa dai ko malilingawan na mga pangyayari sa buhay ko.

AN PERSONAL NA INTERES NAKAIMPLUWENSIYA SA SAKONG PUTURO

Kan tin-edyer ako, nakaistar kami sa sarong farm kun sain ugmahon ako na mag-ataman nin mga hayop. Naisip kong magin sarong beterinaryo. Iinistorya iyan ni Mama sa sarong elder sa kongregasyon. Mabuot kaining ipinagirumdom sako na nabubuhay na kita sa “huring mga aldaw” asin hinapot ako kun paano puwedeng makaapektar sa sakong relasyon ki Jehova an pag-eskuwela sa unibersidad nin nagkapirang taon. (2 Tim. 3:1) Bilang resulta, nagdesisyon ako na dai na mag-eskuwela sa unibersidad.

Inisip-isip ko pa man giraray kun ano an gigibuhon ko pakagradwar sa hayskul. Maski ngani nakikikabtang ako sa ministeryo sa langtad kada katapusan kan semana, dai ako maugma sa ministeryo saka dai ko nahihiling an sadiri ko bilang sarong payunir. Kan panahon man na idto, dinadagka ako kan sakong ama saka tiyo na bakong mga Saksi na magtrabaho nin full-time sa dakulang insurance company sa Toronto. May halangkaw na posisyon diyan an sakuyang tiyo, kaya inako ko an trabaho.

Sa Toronto, an purupirmi kong pagpara-overtime sa trabaho saka an pakikiiba-iba sa bakong mga kapagtubod nakaulang sa sako na magin regular sa espirituwal na mga aktibidad. Kan inot, nakiistar ako sa harong kan sakong lolo na bakong Saksi, pero kan magadan siya, kinaipuhan kong maghanap nin ibang maiistaran.

An mag-agom na Hutcheson, na pig-iba ako sa kumbensiyon kan 1958, garo ko na man sana mga magurang. Inimbitaran ninda ako na mag-istar sa harong ninda asin tinabangan akong umuswag sa espirituwal. Nabawtismuhan ako kan 1960 kasabay kan aki nindang si John. Nagpayunir si John, asin nakadagka iyan sa sako na urog na makikabtang sa ministeryo. Narisa kan mga tugang an pag-uswag ko sa espirituwal, asin pag-abot nin panahon nagin akong lingkod sa Teokratikong Paadalan sa Pagmiministro.a

PAGKAIGWA NIN MAHUSAY NA PARTNER ASIN PAGIGIN SARONG PAYUNIR

Kan 1966, naagom ko si Randi Berge, sarong maigot na payunir na gustong-gustong maglingkod sa lugar kun sain mas dakula an pangangaipo. An samong nagbibiyaheng paraataman nagpahiling nin personal na interes sa samo, asin dinagka niya kaming magtabang sa kongregasyon sa Orillia, Ontario. Kaya tulos-tulos kaming nag-impake asin nagbalyo duman.

Pakaabot mi tulos sa Orillia, nagregular payunir na man ako arog ni Randi. Naulakitan na niya ako kan entusiyasmo niya! Kan magpuon ako na gibuhon an pinakamakakaya ko sa pagpapayunir, naeksperyensiyahan ko an kaugmahan sa paggamit kan Bibliya saka an kaugmahan na mahiling an mga tawo na nasasabutan iyan. Sarong bendisyon nanggad na matabangan an sarong mag-agom sa Orillia na makagibo nin mga pagbabago sa saindang buhay asin magin mga lingkod ni Jehova.

PAGBABAGO NIN LENGGUWAHE ASIN NIN KAISIPAN

Kan magbisita ako sa Toronto, namidbid ko si Arnold MacNamara, na saro sa mga brother na nanginginot sa Bethel. Naghapot siya kun gusto ming magin espesyal payunir. Tulos-tulos akong nagsimbag: “Iyo po! Maski sain apuwera sa Quebec!” Naimpluwensiyahan ako kan negatibong sabuot kan mga nagtataram nin Ingles sa Canada manungod sa kariribukan sa sosyedad sa probinsiya nin Quebec, na diyan an mga tawo nagtataram nin French. Kan panahon na iyan, nagpoprotesta an mga tawo laban sa gobyerno asin gusto ninda na magin independiyente an probinsiya nin Quebec.

Nagsimbag si Arnold, “Sa panahon na ini, an Quebec man sana an pinapadarahan kan sangang opisina nin mga espesyal payunir.” Tulos-tulos akong nag-uyon na magduman. Aram kong interesado si Randi na maglingkod duman. Kan huri, narealisar kong ini an saro sa pinakamarahay na mga desisyon mi sa buhay!

Pakatapos nin limang semanang pagklase sa lengguwaheng French, nagpasiring kami ni Randi saka an saro pang mag-agom sa Rimouski, mga 540 kilometro sa norteng-sirangan kan Montreal. Dakul pa kaming kaipuhan na manudan, na nagin risang-risa iyan sa sarong pagtiripon kan basahon ko an nagkapirang paisi. Sinabi ko na sa maabot ming kumbensiyon, magkakaigwa kami nin dakul na “ostrits na mga delegado” imbes na “Austrian na mga delegado.”

Sa Rimouski, inibanan kaming apat nin apat na maiigot na daragang sister asin kan mag-agom na Huberdeau saka kan duwa nindang aking babayi. Binayadan nguna kan mag-agom na Huberdeau an arkila sa harong na may pitong kuwarto na dagusan kan mga payunir. Inapod mi iyan na White House huling an mga harigi kaiyan saka an atubangan kulor puti. Sa parati, nasa 12 sagkod 14 kaming nagdadagos diyan. Bilang mga espesyal payunir, naghuhulit kami ni Randi pag aga, hapon, asin banggi, kaya nagpapasalamat kami ta igwa kami pirming nakakaibanan sa paghuhulit—dawa sa mga banggi nin tiglipot.

Nagin dayupot kaming marhay sa maimbod na mga payunir na idto kaya garo na man sana kapamilya mi sinda. Kun minsan, iribanan kaming nagtuturukaw sa palibot nin campfire asin nagkakaigwa kami nin “pierogi day,” sarong aldaw kun sain gabos kami naggigibo nin mga dumpling na iba-iba an laog. Musikero an saro sa mga brother na kaibanan mi, kaya pag Sabadong banggi parati kaming nagkakaranta saka nagbabarayle.

Nagin mabunga nanggad an teritoryo sa Rimouski! Nakamati kami nin kaugmahan huling sa laog nin limang taon, nahiling mi an pag-uswag kan nagkapira sa mga Bible study mi sagkod na mabawtismuhan sinda. Nagdakul an parahayag sa kongregasyon sagkod na uminabot iyan sa 35.

Sa Quebec, nag-ako kami nin marahayon na pagsasanay bilang mga ebanghelisador. Nahiling mi kun paano kami tinabangan ni Jehova sa ministeryo asin sa materyal na mga pangangaipo mi. Apuwera kaiyan, nanudan mi man na mamutan an mga tawong nagtataram nin French, an lengguwahe ninda, asin an kultura ninda—na nagin dahilan para mamutan mi man an ibang kultura.—2 Cor. 6:13.

Dangan dai mi inaasahan, sinabi samo kan sangang opisina na magbalyo kami sa banwaan nin Tracadie, sa sirangan na baybayon kan New Brunswick. Nagin angat ini sa samo huling kakapirma mi lang nin kontrata sa pag-arkila sa sarong apartment saka may kontrata man ako sa school board bilang part-time na paratukdo. Saro pa, an pira sa mga Bible study mi bago pa sanang magin mga parahayag asin nasa kasagsagan kami nin pagtugdok nin Kingdom Hall.

Bilog na weekend ming pigparapamibi iyan asin binisita mi an Tracadie, na naiibang marhay sa Rimouski. Pero nagdesisyon kami na mantang gusto ni Jehova na magduman kami, maduman kami. Pinurbaran mi si Jehova asin nahiling mi kun paano niya hinali an kada saro sa mga ulang. (Mal. 3:10) Arog kan dati, an makusog na espirituwalidad ni Randi, an pagigin mapagsakripisyo niya, asin an pagigin mapagpangisi niya nakatabang samo para daing gayo magin angat an pagbalyo mi.

Saro lang an elder sa bagong kongregasyon mi, si Robert Ross. Nagpayunir siya duman kaiba an saiyang agom na si Linda, asin nagdesisyon sinda na magdanay duman pagkatapos na mamundag an inot nindang aki. Dawa may inaataman sindang sadit na aki, napakusog ninda kaming marhay ni Randi kan saindang mamumuton na pag-ako, determinasyon, asin kaigutan sa ministeryo.

AN MGA BENDISYON NIN PAGLILINGKOD KUN SAIN MAY PANGANGAIPO

Pagkatapos nin duwang taon na pagpapayunir mi sa Tracadie, nakaresibi giraray kami nin dai inaasahan na surpresa—sarong imbitasyon para maglingkod sa pansirkitong gibuhon. Pitong taon kaming naglingkod sa mga sirkito na Ingles an lengguwahe, dangan inasignar kami na maglingkod sa sirkito sa Quebec na French an lengguwahe. Kinokomendaran ako sa sakong mga pahayag kan samong paraataman nin distrito sa Quebec na si Léonce Crépeault. Pero pakatapos kaiyan pirmi niyang ihinahapot, “Paano daw magigin mas praktikal an mga iyan?”b An pagpahiling na iyan nin personal na interes nakatabang sako na gibuhon na mas espesipiko asin madaling masabutan an sakong paagi nin pagtutukdo.

An saro sa pinakadai ko malilingawan na asignasyon ko iyo idtong kan 1978 na “Victorious Faith” na Internasyonal na Kumbensiyon sa Montreal. Na-assign ako sa Food Service. An inaasahan ming maatender 80,000 katawo, asin sarong bagong areglo sa pagpakakan an pig-implementar. Bago an equipment, bago an menu, saka bago man an paagi nin pagpreparar nin mga pagkakan—gabos talaga bago. Igwa kami nin mga 20 darakulang repridyeretor, na paminsan-minsan dai naggagana. Bago magpuon an inot na aldaw kan kumbensiyon, dai pa kami puwedeng maglaog sa istadyum sagkod sa matangang banggi para andamon an mga bagay-bagay dahil may nainot sa samo na sporting event na naggamit kan istadyum. Tapos kaipuhan mi pang painiton an mga oven bago magliwanag an aldaw para magluto nin pamahaw! Pagalon kami, pero dakul akong nanudan sa kahigusan, pagigin maygurang, asin sa pagigin mapagpangisi kan kaibanan kong mga boluntaryo. Marahay su pag-iribanan mi, asin sagkod sa ngunyan mag-aramigo kami. Nakakaugma nanggad na maeksperyensiyahan an makasaysayan na kumbensiyon na ini sa Quebec, an mismong probinsiya na nagkaigwa nin grabeng persekusyon kan mga dekada nin 1940 asin 1950!

Dakulon akong nanudan sa kapwa ko mga overseer sa panahon kan samong darakulang kumbensiyon sa Montreal. Si David Splane, na miyembro ngunyan kan Namamahalang Grupo, sarong taon na naglingkod bilang convention overseer. Pagkatapos, sa sarong kumbensiyon, kan naasignaran man ako na gibuhon an asignasyon na iyan, lubos na nakikooperar si David.

Kan 2011, pagkatapos nin 36 na taon na paglilingkod mi sa pansirkitong gibuhon, naimbitaran ako na maglingkod bilang instruktor kan Paadalan Para sa mga Elder sa Kongregasyon. Sa laog nin duwang taon, 75 lain-lain na higdaan an naturugan mi ni Randi, pero sulit an gabos na pagsasakripisyo. Sa katapusan kan kada semana, nagpapasalamat na marhay an mga elder huling nahiling ninda kun gurano nagmamakulog an Namamahalang Grupo sa saindang espirituwalidad.

Pag-abot nin panahon, nagtukdo ako sa School for Kingdom Evangelizers. Sa parati pagalon saka nahahadit an mga estudyante dahil sa sibot na iskedyul: mga pitong oras na nakatukaw kada aldaw, tulong oras na naggigibo kan homework burubanggi, asin nagkakaigwa nin apat o limang kabtang kada semana. Ipinaliwanag mi kan kaiba kong instruktor na dai ninda magigibo iyan kun mayo an tabang ni Jehova. Dai ko malilingawan kun gurano napapangalas an mga estudyante na mahiling na paagi sa pagsarig ki Jehova, nakakaya nindang makagibo nin mga bagay na labi pa sa hinuhuna ninda.

AN PAGPAHILING NIN PERSONAL NA INTERES NAGTATAO NIN NAGDADANAY NA MGA BENDISYON

An pagpahiling ni Mama nin personal na interes sa iba nakatabang sa mga Bible study niya na mag-uswag asin natabangan pa ngani kaiyan si Papa na mabago an pagmansay kaini sa katotoohan. Tulong aldaw pagkagadan ni Mama, sinurpresa kami ni Papa paagi sa pag-atender niya sa sarong pampublikong pahayag sa Kingdom Hall, asin padagos siyang nag-atender sa mga pagtiripon sa suminunod na 26 na taon. Dawa ngani dai nabawtismuhan si Papa, sinabi sa sako kan mga elder na pirming si Papa an inot na minaabot sa mga pagtiripon kada semana.

Marahayon man na halimbawa si Mama sa mga aki niya. An gabos na tulong tugang kong babayi saka an mga agom ninda maimbod na naglilingkod ki Jehova. An duwa sa sainda naglilingkod sa mga sangang opisina—an saro sa Portugal saka an saro man sa Haiti.

Sa ngunyan, naglilingkod kami ni Randi bilang mga espesyal payunir sa Hamilton, Ontario. Kan yaon pa kami sa pansirkitong gibuhon, nauugma kaming ibanan an iba sa mga pagdalaw liwat saka mga Bible study ninda. Pero ngunyan, nauugma kami na mahiling an mga Bible study mi na nag-uuswag sa espirituwal. Asin mantang nagigin mga amigo mi an mga tugang sa samong bagong kongregasyon, napapakusog kami na mahiling kun paano sinda tinatabangan ni Jehova sa marahay asin masakit na mga panahon.

Mantang ginigirumdom mi an nakaagi, dakulon an nagpahiling sa samo nin personal na interes, asin naaapresyar niyamo iyan na marhay. Huli kaiyan, hininguwa mi man na magpahiling nin “udok na pagmalasakit” para sa iba, na dinadagka sinda na gibuhon an gabos na magigibo ninda para sa espirituwal na mga bagay. (2 Cor. 7:6, 7) Halimbawa, may sarong pamilya na an agom na babayi, an aki nindang lalaki saka babayi gabos nasa bilog na panahon na paglilingkod. Hinapot ko an agom na lalaki kun napag-isipan man lamang niya an pagpapayunir. Sinabi niya na igwa siyang tulong payunir na sinusuportaran. Kaya hinapot ko siya, “Mas masusuportaran mo daw sinda kisa sa magigibo ni Jehova na pagsuportar sainda?” Dinagka ko siya na i-enjoy kun ano an ine-enjoy ninda. Pakalihis nin anom na bulan nagpayunir na man siya.

Padagos ming sasabihon ni Randi sa “sunod na henerasyon” an manungod sa “makangangalas [na] mga ginibo” ni Jehova, asin naglalaom kami na ikakaugma man ninda an paglilingkod sa saiya arog mi.—Sal. 71:17, 18.