An Punto-de-Vista kan Biblia
Para daw sa Pulpito an mga Babae?
“AN KADAKLAN na ordinaryong Kristiano dai nakasasabot kun taano ta, kun an mga babae puwedeng magin reyna, primer ministra, huwes, siruhano, sientista, sinda kaipuhan na olangon sa pagsolemnisar kan Sagrado Komunyon asin mga kasal,” an isinurat kan klerigo kan Iglesya nin Inglaterra na si Nicholas Stacey sa The Times nin Londres.
Minsan ngani tinotokdoan kan Iglesya nin Inglaterra an mga babae para sa espesyal na paglilingkod, sagkod ngonyan dai kaiyan tinotogotan an mga babae na maglingkod bilang mga padi tanganing mamahala sa mga sakramento kaiyan. Oyon daw kamo sa paninindogan kan iglesya, o naniniwala daw kamo na an mga babae maninigong tumindog sa pulpito?
Puwedeng Bangaon an Iglesya
An isyu nin mga babae bilang klero nagin singal sa pag-oltanan nin mga miembro kan iyo man sanang relihiyon. An Iglesya nin Inglaterra pasil sanang mabanga sa duwang magkasuhay na institusyon huli sa isyu, an patanid ni Dr. Graham Leonard, Obispo sa Londres, an pangenot na klerigo na kontra sa pag-ordenar sa mga babae. An iba binabasol an salang paghona sa dai pagtogot sa mga babae na tumindog sa pulpito, alagad ta bako sana iyan an kalabot.
Sa dakol nang dekada, an Iglesya nin Inglaterra naghihingoa na mahusay an dai kaiyan pagkasinabotan saka kan Roma. Alagad sa bago pa sanang surat sa Arsobispo sa Canterbury, sinabi kan papa na an pag-ako nin mga babae sa pagpapadi magigin “sa mata kan Iglesya Katolika, nag-oorog na seryosong kaolangan sa pag-oswag na iyan.”
Alagad, may sarong mahalagang elemento na liningawan sa debateng ini—an Biblia. Paano naglingkod an mga babae sa enot na kongregasyon Kristiano, asin ano an maninigong magin papel ninda ngonyan?
Pantay Alagad Magkalaen
Sa pagkamundag kan kongregasyon Kristiano kan taon 33 C.E., an mga babae kaiba nin mga lalaki nag-ako kan banal na espiritu. Ini arog nanggad sa ihinula ni propeta Joel mga siglo bago pa, an paliwanag ni apostol Pedro.—Gibo 1:13-15; 2:1-4, 13-18.
Dangan, lubos na narealisar ni Pedro an saro pang mahalagang katotoohan: “An Dios dai nagpapalaen.” (Gibo 10:34) Sa literal, an tekstong iyan nangangahulogan na an Dios bakong “parapili nin lalauogon.” An “parapili nin lalauogon” nagpapaheling nin pagmidbid asin pabor sa iba. Kan suanoy na mga panahon, an dakol na huwes pinapaboran an mayaman kisa pobre. O itinatao an desisyon basado sa nasyonalidad, sosyal na ranggo, pamilya, o pagkakatood imbes na sa mga katunayan. Alagad ta kabaliktaran an ginigibo ni Jehova. Pinapaboran nia sana an mga natatakot sa saiya asin naggigibo nin katanosan. Pag-abot sa kaligtasan, dai ipinaoorog nin Dios an ‘lalauogon’ nin lalaki sa ‘lalauogon’ nin babae. Pareho sinda pantay sa atubangan nia.—Gibo 10:35.
Kun siring, an Kasuratan nagtatao sa Kristianong mga lalaki asin babae nin pantay na onra bilang mga miembro kan kongregasyon. Si apostol Pablo nagsurat sa mga Kristiano sa Galacia na “mayo nin oripon o talingkas, mayo nin lalaki o babae; huli ta kamo gabos sarong persona na kasaro ni Cristo Jesus.” An gabos igwa nin independienteng espirituwal na kamugtakan sa atubang nin Dios; pero an gabos sararo bilang sarong grupo kan saiyang mga lingkod. An gabos parareho sa pamilya nin Dios.—Galacia 3:26-28.
Minsan siring, may pagkakalaen an mga lalaki asin babae sa kongregasyon. Alagad kun paanong an natural na pagkakalaen nin lalaki asin babae bakong kaolangan sa pagigin komplemento ninda sa lambang saro, an laen-laen man na pribilehiyo nin mga lalaki asin babae sa Kristianong kongregasyon dai maninigong magin kaolangan sa pagkaoroyon kan kongregasyon. Ano an mga pagkakalaen na iyan?
Mga Paratokdo—Noarin Asin Kiisay?
An mga pagkakalaen nasisentro sa pagtotokdo asin autoridad. An mga babae pinagbabawalan na maglingkod sa opisyal na katongdan nin pagtotokdo sa kongregasyon asin sa pagkapot nin espirituwal na autoridad sa mga kapwa miembro kan kongregasyon. Sa saiyang surat ki Timoteo sa paggiya sa kongregasyon, malinaw na sinabi ni Pablo: “Dai ako minatogot na an babae magtokdo, o magkapot nin autoridad sa lalaki, kundi dai maggirong.”—1 Timoteo 2:12.
Sumunod sinabi ni Pablo an pasisikadan sa dai pagtogot sa mga babae na magin mga paratokdo—an ibinugtak nin Dios na relasyon sa pag-oltanan nin lalaki asin babae. “Huli ta si Adan an enot na linalang, dangan si Eva,” an isinurat nia. (1 Timoteo 2:13) Puwede kutanang dungan na linalang nin Dios si Adan asin Eva, pero dai nia ginibo iyan. Si Adan nabuhay nin harohalawig na panahon bago si Eva. Bako daw na ipinaheheling kaini an katuyohan nin Dios na si Adan an mangenot, magin payo, imbes na si Eva? (1 Corinto 11:3) Asin an pagtotokdo garo man sana pagigin kagurangnan, o namomoon, sa mga tinotokdoan. An mga tinotokdoan naghihinanyog asin daing girong na nakakanood. Kaya, sa kongregasyon mga lalaki sana an dapat na magin mga paratokdo asin paraataman.
Kaipuhan daw na ikadisganar asin ipagsentir an bagay na an mga babae dai nagtotokdo sa kongregasyon? Dai. An mga babae libreng magtokdo nin Kristianong doktrina asin inaagdang gumibo kaiyan. Sa anong situwasyon asin sa irarom nin anong mga kamugtakan? An gurang na mga babae puwedeng magin “mga paratokdo kan marahay” sa mas hoben na mga babae. Asin kun paanong si Eunice asin an ina niang si Loida nagtokdo ki Timoteo, an mga Kristiana sagkod ngonyan nag-aarog sainda sa pagtotokdo sa mga aki sa “Dalan” kan katotoohan.—Tito 2:3-5; Gibo 9:2; 2 Timoteo 1:5.
Ngonyan, inaarog man nin mga Kristiana an halimbawa ni Euodias asin Sintique paagi sa paghuhulit kan maogmang bareta sa publiko. (Filipos 4:2, 3) Puwede sindang magin mga paratokdo paagi sa pakikipag-adal sa mga interesado sa Biblia. (Mateo 28:20) An ginatos na ribong babae nakakanompong nin espirituwal na pagkakontento sa apretadong gibong ini na paghuhulit asin pagtotokdo. Itinotokdo ninda an iba sa pag-establisar nin sarong kinaban nin katanosan asin katoninongan sa paghade ni Jesu-Cristo—sarong paglaom na nasa sainda kapareho kan saindang Kristianong mga tugang na lalaki.—Salmo 37:10, 11; 68:11.
[Blurb sa pahina 16]
An isyu nin mga babae bilang klero nagin singal sa pag-oltanan nin mga miembro kan iyo man sanang relihiyon