Ihinahapot nin mga Hobenes . . .

Taano ta Maninigo Akong Mag-adal nin Maigot sa Eskuwelahan?

‘An kadaklan na nanonodan niato sa eskuwelahan teoriya sana man. Mayo dian nin talagang may praktikal na halaga.’

‘Dai akong interes sa leksion na pag-aadalan. Mas interesado ako sa ibang bagay, arog kan karawat asin pamamasyar kaiba kan mga amigo ko.’

‘Aram ko na malaog ako sa bilog na panahon na ministeryo, kaya taano ta magmamaigot pa ako sa eskuwelahan?’

AN MGA komentong arog kaini parateng sinasabi nin mga hobenes kun sinda nagtataram manongod sa eskuwelahan asin leksion na pag-aadalan. Tibaad iyan man an nasa boot nindo.

Totoo, kun papipilion sa pag-adal asin pag-aling-aling, an kadaklan na hobenes seguro pipilion an ikaduwa. An iba tibaad nagmamawot pa ngani na dai na sinda noarin man kaipuhan na mag-adal. Dai ninda isinasaboot an pag-adal; dai ninda maisip kun ano an halaga kaiyan sa saindang buhay. Sa ibong na lado, tibaad saro kamo na gustong umasenso sa eskuwelahan pero daing gayo nin gana sa saindong mga leksion. ‘Talagang bako akong mahilig mag-adal,’ an pangangatanosan nindo.

Ano man an saindong mga saboot, intereses, o abilidad, puwede nindong gibohon na mapanggana an saindong pag-eskuwela. Pero kaipuhan na mamotibar kamong gibohon iyan. Asin an pagsiyasat sa mga pakinabang na puwede nindong kamtan kun kamo magmamaigot sa pag-adal tibaad makapakosog sa saindong motibasyon.

Ehersisyo sa Hotok

An kadaklan na pinag-aadalan nindo sa eskuwelahan tibaad ngonyan garo daing halaga sa saindong buhay. Apuwera sana kun nagpaplano kamong magin karera an pagigin sientista, posible na daing gayo nindo magagamit sa ngapit an mga pormula sa pisika na tibaad ipinatuom saindo kan saindong maestro. Saro pa, harayo sa posibilidad na bilang nasa edad na kakaipuhanon nindo sa aroaldaw an pagsunodsunodon an mga porma nin mga berbo o kuwentahon an mga anggulo nin sarong trianggulong isosceles. ‘Kaya, ano an halaga nin pag-adal?’ an hapot nindo.

Primero, an eskuwelahan nagtatao saindo kan oportunidad na magkaigwa nin pankagabsan na kaaraman manongod sa kadakol na laen-laen na bagay, arog baga kan historya, literatura, siensia, geograpiya, asin matematika. An mahiwas na kaaraman na ini makadadagdag sa saindong pakasabot sa kinaban na nasa palibot nindo asin magseserbing pundasyon na dian ikadudugang an mas espisipikong impormasyon. “Sa tawong may pakasabot an kadonongan madali sana,” sabi kan Talinhaga 14:6.

Sa saiyang librong Savoir étudier (Pakanood Kun Paano Mag-aadal), ipinaliwanag pa ni Robert Bosquet na an potensial kan isip na makanood “kaipuhan na progresibong madiskobre asin makondisyon para sa pagtrabaho.” Idinugang pa nia: “Aram nin gabos na an sarong kampeon sa karawat makaaabot sana sa saiyang pinakamarahay na mga resulta pakalihis nin haloy na pagpraktis na sa panahon na iyan nadidiskobre nia kun paano lubos na gagamiton an saiyang mga abilidad. . . . Arog kaiyan an pakanood kun paano mag-aadal: paggamit kan saindong bilog na potensial, pakakua kan pinakamarahay na mga resulta, sa pinakakadikit na panahon asin paghihingoa.”

Kun siring an leksion na pag-aadalan puwedeng apodon na ehersisyo sa hotok. “An hotok . . . mahiwas na magkakakonektar na sistema,” sabi kan librong How to Study, “asin mientras na iyan mas komplikado asin magkakakonektar mas marahay an andar kaiyan.” An mga asignasyon sa eskuwelahan makatatabang saindo na mapatarom an saindong abilidad na magkonsentrar, magrason, magtuom, mag-analisar sa problema, asin gumibo nin lohikong mga konklusyon.

Emosyonal Asin Espirituwal na Pagtalubo

An mga taon nindo sa eskuwelahan panahon man nin emosyonal asin espirituwal na pagtalubo. Kinukultibar nindo an mga ugale asin kaisipan na sa dakulang paagi madeterminar kun magigin ano kamong klaseng adulto. Kamo daw magigin mahigos, maimbod, disiplinado, asin matibay​—saro na magugustohan na kuanon na trabahador nin sarong among? An pagpraktis nindo ngonyan na magkaigwa nin marahay na mga ugale sa pagtrabaho asin pag-adal magkakaigwa nin parasiyempreng mga pakinabang. (Ikomparar an Talinhaga 22:6.) Kabilang sa ibang mga bagay, tibaad magkaigwa iyan nin dakulang epekto sa saindong magigin kabuhayan asin trabaho sa ngapit. An dakol na kompanya ginagamit an rekord kan grado sa eskuwelahan nin saro bilang tanda kan magigin abilidad sa pagtrabaho kan aplikante.

An saindong mga ugale sa pag-adal nakaaapektar man sa saindong espirituwal na pagtalubo. Itinokdo ni Jesus na an saro maninigong sumamba sa Dios sa ‘bilog niang isip.’ (Marcos 12:30) Ipinaririsa kaini na an mga lingkod nin Dios, hoben asin gurang, kaipuhan na maigot na gamiton an saindang isip sa pagkua kan kaaraman na itinatao sa sainda ni Jehova asin saboton kun paano iyan iaaplikar sa saindang buhay.​—Juan 17:3; 1 Timoteo 4:7.

“Naheheling ko iyan sa ibang hobenes na kaedad ko,” an komento ni Sylvie, sarong daragita sa Pransia. “An ugale ninda sa pag-adal sa eskuwelahan nakaolakit sa saindang ugale sa personal na pag-adal sa espirituwal na mga bagay. An mga dai nakanood na magustohan an pag-adal sa eskuwelahan dai man na gayo nagkainteres sa personal na pag-adal sa Biblia.” An Talinhaga 10:4 nagsasabi: “An saro na nagtatrabahong may hugakon na kamot magigin dukha, alagad an kamot kan mahigos iyo an magpapayaman sa saiya.” Ini nagkatotoo ki Sylvie sa espirituwal na sentido. Huli sa saiyang marahay na mga ugale sa pag-adal nagin mas pasil para sa saiya na pararomon an saiyang pakasabot sa Biblia. Inandam sia kaini para sa saiyang karera bilang bilog na panahon na paraebanghelyo.​—Ikomparar an Salmo 1:​2, 3.

Adalan Kun Paano Mag-aadal

Alagad ano kun kamo daing hilig na mag-adal? Aramon na an pangenot na pagkakalaen nin marahay na estudyante asin maluyang estudyante sa parate kahigosan​—bakong intelihensia. “Mayo ako nin dakol na natural na abilidad arog nin ibang estudyante,” an inadmitir ni Sylvie. “Tanganing magin matibay sa klase, talagang kinaipuhan kong magtrabaho nin igo tangani sanang makakua nin marahay na grado.” Minsan ngani dai nagin pasil para sa saiya an pag-eskuwela, ginibo ni Sylvie an mahigos na mga paghihingoa; nakanood sia bako sanang kun paano mag-aadal kundi kun paano ikaoogma iyan. “Huli ta iyan nakaugalean ko na,” sabi nia, “bako nang dakulang trabaho an pag-adal o pagsiyasat sa sarong tema. Nakanood akong gibohon iyan na garo kanaturalan sana.”

Sa saiyang librong How to Study, si Harry Maddox nagsasabi: “An abilidad sana bakong igo. An dakol na intelihenteng estudyante dai nakapapasar . . . huli ta dai sinda naghihingoa nin igo, o huli ta dai sinda noarin man nakanood kun paano mag-aadal nin epektibo.” Idinugang nia: “An marahay na mga paagi sa pag-adal marahay na manodan bako sanang para sa saindong presenteng mga katuyohan sa pag-adal, kundi huli ta an saindong mga ugale sa pagtrabaho magdadanay sa saindo sa bilog nindong buhay.”

An mga tawo sa parate naoogmang gibohon an dian sinda matibay​—asin may tendensia sindang likayan an mga bagay na dian sinda maluya. Kun siring, tibaad hinahaboan nindo an pag-adal sa leksion ta dai nindo nakultibar nin igo an saindong abilidad sa pag-adal tanganing gibohon na makaoogma an saindong trabaho. Kun siring, taano ta dai magkonsentrar sa pag-adal kun paano mag-aadal? An nakatatabang na impormasyon itinatao sa kapitulo 18 kan librong Questions Young People Ask​—Answers That Work.a

Tanawon an Lihis Pa sa mga Taon kan Saindong Pag-eskuwela

An dakol na estudyante napababayaan an saindang pag-eskuwela huli sana ta mas gusto nindang gumibo nin iba​—arog baga kan pag-oroogma. Alagad an Talinhaga 21:17 nagpapatanid: “An namomoot sa kasingawan magigin dukha.” An pag-aling-aling asin pagpahirohingalo may tamang lugar. (Eclesiastes 3:​1, 4) Minsan siring, mantang kamo nag-eeskuwela, an pag-adal maninigo na saro sa mga inienot nindo. An mga resultang makakamtan nindo sa kadaklan depende sa kun guranong paghihingoa an andam nindong gibohon. “Sa gabos na gibo may pakinabang,” an sabi kan Talinhaga 14:23.

Dai ini nangangahulogan na magugustohan nindo an kada klase o asignasyon sa eskuwelahan na aakoon nindo. Alagad puwede nindong pagmaigotan na mansayon an saindong edukasyon bilang positibong paagi pasiring sa sarong katuyohan​—an pagkakamit nin kaaraman asin mga abilidad na makatatabang saindo na magkaigwa nin kapakipakinabang asin mabungang buhay. Totoo, an mga kahagadan sa edukasyon asin mga kamugtakan sa ekonomiya nagkakaralaenlaen na marhay sa laen-laen na nasyon. Pero, an dakol na hobenes minahale sa pag-eskuwela na dai man lamang nakanood minsan kan pinakapundamental na abilidad sa pag-adal; nadidiskobre ninda na sinda bakong preparado o kuwalipikado para sa kadaklan na trabaho. Asin taano? Huli ta dai sinda nagmaigot kan sinda nag-eeskuwela.

Dai kamo maholog sa siod na ini! Tumanaw nin lihis pa sa mga taon kan saindong pag-eskuwela asin magplano na masustentohan an saindong sadiri pagkatapos nindong mag-eskuwela. Pag-abot nin panahon tibaad magkaigwa kamo kan paninimbagan na buhayon an sarong pamilya. (1 Timoteo 5:8; ikomparar an Talinhaga 24:27.) Kapareho nin dakol na hobenes sa mga Saksi ni Jehova, tibaad nagpaplano man kamo nin karera bilang pambilog na panahon na paraebanghelyo. Kaipuhan pa man giraray na buhayon nindo an saindong sadiri asin tibaad pati an sarong pamilya. Kaya isipon an nasa enotan. Haloy pa bago maggraduwar, pagmaigotan na aramon kun anong klaseng trabahong por ora an makukua sa saindong lugar. An pagmamaigot sa saindong leksion makatatabang saindo na mapatalubo an mga abilidad na kaipuhan tanganing makua an siring na mga trabaho.

Ano man an plano nindo sa ngapit, madonong an pag-adal nin maigot sa eskuwelahan. Dai, tibaad dai man kamo magprimera sa saindong klase. Pero puwede kamong makanood na kamotan an pag-adal. Mas marahay pa, mapatatalubo nindo an kaaraman, mga abilidad, asin ugale na mapakikinabangan nindo sa bilog nindong buhay.

[Nota sa Ibaba]

[Ritrato sa pahina 11]

An mga abilidad sa pag-adal na napatalubo nindo sa pag-eskuwela mapakikinabangan nindo sa bilog na buhay