“Maghingoa Kamo nin Maigot”
“Maghingoa kamo nin maigot na makalaog sa piot na tata, huli ta, sinasabi ko saindo, dakol an magmamawot na makalaog alagad dai makakahimo.”—LUCAS 13:24.
1. Ano an minamawot nin kadaklan?
HAPOTON nindo an sais anyos na si Robbie kun taano ta gusto niang magduman sa Kingdom Hall, asin an isisimbag nia: “Nakakanood ako manongod ki Jehova asin sa Paraiso na duman puwede akong mabuhay nin halawigon na panahon kaiba an maboboot na hayop.” An pinsan niang tres anyos, si Dustin, may pakarisa na sa kaugalean kan saiyang mga magurang tanganing maaraman nin eksakto kun noarin biglang makurahaw: “Maiba ako sa Kingdom Hall!” An ipinahahayag ni Robbie, asin an nanonodan na ipahayag ni Dustin, magugustohan nin kadaklan—buhay, buhay na daing katapusan. An mga tawo boot na “maligtas.” Alagad ta paano? Paagi sana daw sa pag-atender sa relihiyosong mga serbisyo?
2. (a) Taano ta dai puwedeng kamtan bilang kabayadan an kaligtasan? (b) Paano an mga tataramon ni Jesus sa Lucas 13:24 nagpapaheling kan kahagadan para sa kaligtasan?
2 An kaligtasan dai puwedeng kamtan bilang kabayadan paagi sa pag-atender sa mga pagtiripon o sa ano pa man na ibang paagi. Iyan daing bayad, sarong balaog hale sa Dios. Alagad, si Jehova Dios naghahagad man nin paghihingoa sa parte niato tanganing akoon niato an saiyang balaog na buhay na daing katapusan. (Roma 6:23) Ano iyan? An saro, maigot na paghihingoa sa paglilingkod sa saiya! An mga gibong ini kaipuhan na huli sa tunay na pag-apresyar. An Aki nin Dios, si Jesu-Cristo, sarong beses hinapot nin sarong tawo: “Kagurangnan, an mga maliligtas daw pipira sana?” An simbag ni Jesus ilinabot bako sanang an naghapot kundi pati an gabos na iba pa na interesado sa kaligtasan, kaiba na kita. Sia nagsimbag: “Maghingoa kamo nin maigot na makalaog sa piot na tata, huli ta, sinasabi ko saindo, dakol an magmamawot na makalaog alagad dai makakahimo.”—Lucas 13:23, 24.
3. (a) Taano ta pambihira an hapot kan tawo? (b) Paano kita ilinabot ni Jesus sa saiyang simbag?
3 Pambihira an hapot kan tawong dai nginaranan. Sia naghapot: “An mga maliligtas daw pipira sana?” bakong, “Makakabilang daw ako sa pipira sanang maliligtas?” o, “Paano daw ako puwedeng maligtas?” Seguro an Judiong pilosopiya na limitado sanang kabilangan nin mga tawo an magigin maninigo sa kaligtasan an dahelan kan saiyang nagbabanabanang hapot.a Ano man an pinaghalean kan saiyang pag-usyoso, listong dinara ni Jesus an hapot hale sa masakit saboton na teoriya pasiring sa praktikal na pag-aplikar—personal na pag-aplikar. Pinirit nia an naghapot na isipon kun ano an kaipuhan niang gibohon tanganing makaligtas. Alagad labi pa dian, mantang an mga tataramon ni Jesus na, “maghingoa kamo nin maigot,” nasa pormang plural, iyan maninigo man na makapahiro sato na horophoropon na gayo an satuyang paagi nin pagsamba.
4. Ano an kaipuhan na gibohon niato tanganing magkamit nin buhay na daing katapusan?
4 Kun siring, an buhay na daing katapusan bakong arog kapasil na kamtan sa tibaad iniisip nin nagkapira. Idinodoon ni Jesus an magabat na trabaho, daing ontok na paghihingoa, bilang an paagi na “makalaog sa piot na tata.” An daing kapagalan na paghihingoang ini gikan sa matagal na pagtubod, saro na napapasikad sa pagkuyog sa mga katokdoan ni Cristo. Kaya tanganing magkamit nin kaligtasan, dapat na an gibohon niato bako sanang ‘magdangog sa saiyang mga tataramon’; kita dapat na magpadagos sa ‘paggibo kaiyan.’—Lucas 6:46-49; Santiago 1:22-25.
Kamo Kaipuhan na “Maghimuyawot” Ngonyan
5. (a) Ano an ipinaririsa kan mga tataramon ni Jesus na, “Maghingoa kamo nin maigot”? (b) Paano an mga tataramon na iyan nakakadugang nin kahulogan sa saindong punto-de-vista manongod sa banal na paglilingkod?
5 Ano an boot sabihon kan mga tataramon na “maghingoa kamo nin maigot”? Sa orihinal na Griego, an ekspresyon a·go·niʹze·sthe, na kinua sa termino (a·gonʹ) na nangangahulogan “lugar nin paorumbasan.” An pagkasalin dian kan The Kingdom Interlinear Translation “padagos na maghimuyawot.” Kawiliwili nanggad, gikan sa iyo man sanang berbong Griegong ini kinua an termino sa Ingles na “agonize” o sa Bicol “magsakit.” Kaya imahinaron an sarong suanoy na istadyum asin an parakawat na ngonyan nagsasakit, o naghihingoa nin maigot sa bilog niang kosog, tanganing ganahon an premyo. Kaya, minsan ngani an berbong Griego na napapalabot digdi puwedeng magin sarong terminong teknikal para sa pakikipag-umbasan sa mga karawat sa Grecia, iyan nagdodoon kan sadol ni Jesus na gumibo nin bilog na kalag na paghiro. Dai nanggad puwede an trabahong kulang nin interes.—Lucas 10:27; ikomparar an 1 Corinto 9:26, 27.
6. Taano ta kaipuhan kitang maigot na maghingoa ngonyan?
6 Noarin asin gurano kahaloy na kita kaipuhan na “maghimuyawot na makalaog sa piot na tata”? (Lucas 13:24, The New English Bible) Maingat na siyasaton an mga tataramon ni Jesus sa Lucas 13:24 asin mangnohon kun paano nia ipinaheheling an pagkakalaen kan presente, “maghingoa kamo nin maigot,” sa maabot pa, “magmamawot.” Kaya, ngonyan na mismo an panahon na maghimuyawot. Maliwanag na, an mga dai pinalaog nagmawot na lumaog sa panahon na kombenyente sana para sa sainda. Alagad ta sa panahon na iyan huri na; an tata nin oportunidad pinintoan na asin barat na. Si Jesus nagpadagos na magsabi sa Lucas 13:25 na oras na pinintoan na kan kagharong an tata, may mga tawo na mapoon na tumuktok asin makimaherak: “‘Kagurangnan, bukasi kami.’ Alagad ta sa pagsimbag sia masabi sa saindo, ‘Dai ko aram kun mga tagasaen kamo.’” Kanigoan kamakamomondong resulta an naghahalat sa mga dai ginigibo an pagsamba ki Jehova na saindang pangenot na katuyohan sa buhay ngonyan!—Mateo 6:33.
7. Paano an Filipos 3:12-14 nagpaparisa nin padagos na paghihingoa, asin taano ta kaipuhan iyan?
7 An satong paghimuyawot nagpapadagos. Mayo sa sato an biyo nang nakalaog sa “piot na tata.” Aram ini ni Pablo. An saiyang pakipag-umbasan para sa buhay sarong masakit na pan-aroaldaw na paghihingoa. Sia nagsurat: “Bako na nakamtan ko na an gabos na ini, o na sangkap na ako, kundi ako naghihingoa na mapangaptan an bagay na huli kaiyan pinangaptan ako ni Cristo Jesus. Mga tugang, dai ko pa ibinibilang an sakong sadiri na nakapangapot na kaiyan. Alagad sarong bagay an ginigibo ko: Linilingawan an nasa hudian asin pinipirit na aboton an nasa enotan, ako nagpapadagos sa paghihingoa pasiring sa pasohan tanganing ganahon an premyo na para kaiyan ako inapod nin Dios palangit dian ki Cristo Jesus.” (Samo an italiko.)—Filipos 3:12-14, New International Version.
8. (a) Ano an nakaoolang sa “dakol” na magkamit nin buhay na daing katapusan? (b) Anong patanid an itinatao kaini sa sato?
8 Siisay an “dakol,” asin taano ta dai sinda nakakalaog? An “dakol” iyo an Kakristianohan, nangorogna an klero kaiyan. Sinda nagsasagin dayupot na nakakamidbid ki Jesus, na kabtang kan saiyang pamilya, paagi sa paghihingako na sinda ‘nagkakan asin nag-inom kaiba nia.’ Alagad huli ta boot ninda nin kaligtasan sa sadiri nindang kondisyon, bakong sa Dios, prangkang ninigaran ni Jesus na midbid nia sinda asin ibinilang sinda na “mga paragibo nin katampalasanan.” (Lucas 13:26, 27) Puwedeng makabilang sa mga dai pinalaog sa buhay na daing katapusan an mga nanluya sa saindang banal na paglilingkod ki Jehova asin ngonyan may kaisipan na dai pakaigot sa tunay na pagsamba. An saindang kaigotan para sa intereses kan Kahadean nagin gabinhod. (Kapahayagan 3:15, 16) Totoo, tibaad sinda igwa pa nin ‘sarong porma nin diosnon na debosyon’—paramas sanang paglilingkod sa langtad asin pag-atender sa mga pagtiripon—alagad mayo kan ebidensia sa klase nin pagtubod na iyo an tunay na nagmomotibar sa purong pagsamba. (Ikomparar an 2 Timoteo 3:5.) Dai ninda narerealisar na an pagmawot sana na makalaog sa “piot na tata” bakong igo. An saro kaipuhan na maghimuyawot na makalaog.
Kun Taano ta sa “Piot na Tata”
9. Taano ta nagkakaipo nin maigot na paghihingoa an paglaog sa piot na tata?
9 An piot na tata pasiring sa kaligtasan bukas para sa gabos. Alagad ta an “dakol” habong maghimuyawot na makalaog. Ano an nagkapirang bagay manongod sa paglaog sa piot na tata na nagkakaipo nin maigot na paghihingoa? An saro kaipuhan ngunang magkamit nin tamang kaaraman sa katotoohan kan Biblia, asin mamidbid si Jehova Dios asin si Cristo Jesus. (Juan 17:3) Ini nangangahulogan kan pagsikwal sa mga tradisyon asin gibo nin kinabanon na mga relihiyon, kaiba na an sa Kakristianohan. Iyan naghahagad nin pag-otob sa kabotan nin Dios, arog kan pagkaotob dian ni Jesus kan nasa daga pa. (1 Pedro 2:21) Bilang nagdusay, bautisadong Kristiano, kaipuhan na likayan man nin saro an materyalismo, an inmoralidad, asin an karigsokan kan kinaban. (1 Juan 2:15-17; Efeso 5:3-5) An mga ini kaipuhan na haleon asin salidahan nin mga kuwalidad na arog-Cristo.—Colosas 3:9, 10, 12.
10. Ano an koneksion kan pagpopogol sa sadiri sa satong pagkakamit nin buhay na daing katapusan?
10 An “pipira sana” nakakaaram kan halaga nin kaigotan sa ministeryo, na may kaibang pagpaheling kan mga bunga kan espiritu, kaiba na an pagpopogol sa sadiri. (Galacia 5:23) Sa tabang kan banal na espiritu ni Jehova, sinda naghihingoa na makontrol an saindang hawak asin giyahan iyan pasiring sa pasohan na buhay na daing katapusan.—1 Corinto 9:24-27.
Ano an Kahulogan Para sa Saindo kan mga Tataramon ni Jesus?
11. (a) Sa anong mga parte nin buhay tibaad kaipuhan na maigot na maghingoa an nagkapira, asin taano? (b) Sa anong aktibidad na an gabos puwedeng maigot na maghingoa?
11 Baga man kita bagong mabautismohan o dakol nang taon na aktibo sa organisasyon ni Jehova, dai puwedeng magluya an satong paghihingoa na mapaogma sia. Arog kan maliwanag na ipinaririsa kan mga tataramon ni Jesus, kaipuhan na kita bilog na kalag sa satong debosyon ki Jehova, na andam na lumaog sa piot na tata ano man an mangyari. Minsan ngani an sinasabi ni Jesus bako sanang mga pagrahay asin pag-oswag sa satong paglilingkod sa Dios, para sa nagkapira sa sato, kaipuhan an maigot na paghihingoa tanganing mapakarhay an satong mga gawe o mahale an maraot na mga bisyo tanganing kita ‘sa ano man na paagi dai magbugtak nin masisingkogan.’ (2 Corinto 6:1-4) An iba sa sato kaipuhan na magtao nin padagos na atension sa sarong kompletong programa nin personal na pag-adal tangani na an satong “pagkamoot mag-oswag nin orog sa tamang kaaraman asin lubos na pagmansay.” (Filipos 1:9-11) An iba man kaipuhan na gumibo nin orog na paghihingoa na makaatender asin makikabtang nin regular sa mga pagtiripon kan kongregasyon, kaiba na an Pag-adal sa Libro kan Kongregasyon. (Hebreo 10:23-25) Alagad kita gabos puwedeng siyasaton an satong sadiring ministeryo sa langtad tanganing helingon kun baga talagang kita maigot na naghihingoa sa paggibo kan “gibohon nin sarong paraebanghelyo.”—2 Timoteo 4:5.
12. Tanganing masiyasat kun gurano an satong espirituwal na paghihingoa, ano an puwede niatong mga ihapot?
12 Para sa nagdadakol, an pag-oswag sa saindang maigot na paghihingoa na makapaogma ki Jehova nagkuwalipikar sa sainda sa pag-auxiliary payunir, pagregular payunir, o paglilingkod sa Bethel. Alagad kumusta man kamo? Kun kamo parahayag kan Kahadean, puwede daw kamong mag-auxiliary payunir makapira sa laog nin sarong taon o magregular payunir pa ngani? Kun kamo dati nang auxiliary payunir, hinihingoa daw nindong makapagregular payunir? Kun dai, taano ta dai horophoropon an paggibo kaiyan? Sa paaging ini magkakamit kamo nin bendisyon sa pagkultibar sa orog pang dayupot na relasyon ki Jehova Dios asin ki Jesu-Cristo.—Salmo 25:14.
Puwede daw Kamong Maghingoa Tanganing Makapagpayunir?
13. (a) Kun boot nindong magpayunir, anong duwang bagay an kaipuhan? (b) Tanganing makapagpayunir, sa anong mga parte sa buhay tibaad kaipuhan na gibohon an mga pagliliwat?
13 Kun kamo puwedeng magregular payunir alagad ta kamo bako, puwede daw kamong “maghimuyawot” na gumibo nin mga pagliliwat sa saindong buhay tanganing makapagpayunir? Duwang bagay an kaipuhan. Enot, kaipuhan na kamo igwa kan pagmawot. Ikaduwa, kaipuhan na igwa kamo kan tamang mga kamugtakan. Kun mayo kamo kan pagmawot, ipamibi iyan. Makipag-olay sa mga payunir. Dugangan an saindong presenteng aktibidad bilang parahayag sa kongregasyon. Makipartisipar sa pag-auxiliary payunir basta mapupuwede. Kun an saindong mga kamugtakan dai minatogot sa siring na paglilingkod ngonyan, helingon kun baga may magigibong pagliwat. An nagtatrabahong agom na babae tibaad dai man kaipuhan na magtrabaho. An saro na lihis na sa edad nin pagretiro tibaad dai man kaipuhan na magpadagos sa pagtrabaho. An halangkaw na pamantayan nin pamumuhay, magastos na mga bakasyon, pinakabagong modelong mga kotse, asin an kaagid kaiyan, bakong kaipuhan sa buhay.—Lucas 12:15; 1 Juan 2:15-17.
14. (a) Taano an sarong mag-agom ta dai nakontento na magdanay na mga parahayag sa kongregasyon? (b) Anong pasohan an ibinugtak ninda para sa saindang mga aki?
14 An ama nin tolong aking lalaki, na an duwa bako pang tin-edyer, nagpoon na magpayunir kaidtong anom na taon na an nakaagi. Taano? “Boot kong gumibo nin orog pa,” an paliwanag nia. “Kun ako puwedeng magregular payunir asin ako bako, dai ko inootob an sakuyang pagdusay.” An saiyang agom nagpoon man na magregular payunir. Taano? “Dayaday akong nag-o-auxiliary payunir sa laog nin apat na taon asin sa katapustapusi narealisar ko na idto pasil na,” sabi nia. “Boot kong magkaigwa nin mas lubos na kabtang sa dai na noarin man maootrong gibohon na ini asin magtao kan tamang halimbawa sa sakong mga aki.” An mag-agom na ini pareho nakanood kan katotoohan pakapag-adal sa unibersidad. “Inobligar kami kan samong mga magurang na magkolehiyo sa laog nin apat na taon,” sabi kan ama. Kaya, anong pasohan an ibinugtak ninda para sa saindang mga aking lalaki? “Ipinaaaram ko sa sakong mga aki na boot mi na sinda magpayunir asin kisuerra apat na taon na maglingkod sa Bethel.”
15. (a) Huli sa anong mga dahelan na an nagkapira naghingoa na maglingkod bilang mga regular payunir? (b) Huli sa anong dahelan na kamo magmamawot na mapasa bilog na panahon na paglilingkod?
15 An minasunod mga dahelan kun taano an iba ta nagdesisyon na magregular payunir:
“Daing nangyayari sako sa espirituwal, na ikinahadit ko.” (Robert H.)
“Dai ako noarin man nakontento bilang regular na parahayag.”(Rhea H.)
“An pagpapayunir nagtatao nin direksion asin katuyohan sa sakong buhay.” (Hans K.)
“Boot kong lubos na maglingkod ki Jehova, asin an pagpapayunir iyo an paagi ko na magibo iyan.” (Charanjit K.) “Pagbabasolan ko kun dai ko ginamit an sakong kosog, bagsik, asin pagkabarobata tanganing makikabtang sa dakulang gibohon na ini.” (Gregory T.)
“An binibendisyonan sana ni Jehova paghihingoa. Kaipuhan na tawan ko sia nin mabebendisyonan.” (Graceann T.)
“An pagpapayunir nakatatabang sako na ikapahayag kun ano an saboot ko manongod ki Jehova.” (Marco P.)
“An bilog na panahon na paghahanapbuhay dai nagtao sako kan kaogmahan na namasdan ko sa mga payunir.” (Nancy P.)
Anong mga dahelan an ikakadagdag nindo sa listahan na ini?
Ginigibo daw Nindo an Bilog Nindong Makakaya?
16. An mga payunir sana daw an maigot na naghihingoa? Ipaliwanag.
16 An nagkapirang Saksi ni Jehova sadiosan asin may pagngayongayong siniyasat an saindang personal na kamugtakan asin nadiskobre na ginigibo na ninda an bilog nindang makakaya sa saindang presenteng kamugtakan. Seguro saro kamo sa sainda. Kun iyo, dai kamo panluyahan nin boot. Si Jehova asin an saiyang Aki may pagmakolog sa saindo asin tunay na inaapresyar an saindong bilog na kalag na paglilingkod. (Ikomparar an Lucas 21:1-4.) Halimbawa, huli sa maraot na mga kamugtakan sa politika o ekonomiya, sa nagkapirang nasyon an satong mga tugang kaipuhan na magtrabaho nin siyam na oras aroaldaw, lima o anom na aldaw kada semana, tangani sanang makamtan an mga pangangaipo sa buhay. Sa sarong nasyon na an gibohon kan mga Saksi ni Jehova nasa irarom nin estriktong pangangalad kan gobyerno, an mga nagpapayunir—asin sa mga nasyon na ini nagdadakol an mga payunir—parate na an mga retirado, mga hobenes na an trabaho sa banggi, asin mga ina (na may mga aki) na dai na pinapagtatrabaho kan Estado.
17. Paano ipinaheheling kan kaso ni Epafrodito na dai sinosokol ni Jehova kun gurano an satong paghihingoa basado sana sa kun gurano an ginigibo niato sa paglilingkod sa saiya?
17 Alagad ta tibaad kamo magsabi, ‘Kutana mas makosog ako sa pisikal. Kun mapupuwede sanang ako magin hoben giraray!’ Alagad ta dai kamo panluyahan nin boot. An satong paghihingoa dai sinosokol basado sa kun gurano an ginigibo niato sa banal na paglilingkod sa Dios. Nagigirumdoman nindo si Epafrodito? Kan sia naghehelang, an kadakolan kan maigot na aktibidad na kaya nia sa “gibohon kan Kagurangnan” dai makakakomparar sa ginibo nia kan sia makosog. Pero inomaw sia ni Pablo para sa saiyang paghihingoa. Sa katunayan, arog kan ipinarisa ni Pablo, maninigo na ‘padagos niatong kamotan an siring na mga lalaki asin babae.’—Filipos 2:25-30.
18. (a) Paano puwedeng ibantog kan mga may nakapopogol na kamugtakan an bilog na panahon na paglilingkod sa kongregasyon? (b) Ano an magigibo nindo tanganing mapakosog an espiritu nin pagpapayunir sa saindong kongregasyon?
18 Minsan siring, may magigibo kamo tanganing ibantog an bilog na panahon na paglilingkod sa kongregasyon. Ano iyan? Kamo maigot na maghingoa sa pagpaheling kan espiritu nin pagpapayunir. Halimbawa, kun sa ngonyan dai kamo puwedeng magpayunir huli sa mga obligasyon sa pamilya, puwede daw na an iba sa saindong pamilya—an saindong agom na babae, mga aki, tugang na lalaki, o tugang na babae—gibohon nindong libreng makapagpayunir? An mga may maluyang salud o may kaolangan puwedeng magpaheling nin tunay na interes sa mga nakakapagpayunir, na iniibanan sinda sa paglilingkod sa langtad sagkod sa itinotogot kan kamugtakan. (Ikomparar an 1 Corinto 12:19-26.) Sa paaging ini an gabos sa kongregasyon puwedeng maghingoa sa pagdodoon sa bilog na panahon na paglilingkod. An resulta puwedeng magin nakapagpapakosog sa gabos!
19. Ano an maninigong magin determinasyon niato?
19 Ano an kahulogan sa saindo kan maigot na paghihingoa? Iyan daw nangangahulogan nin pag-oswag pasiring sa bautismo? Paghale sa sarong maraot na bisyo? Pagpakosog sa saindong relasyon ki Jehova sa sarong paagi? Puwede daw iyan na mangahulogan nin pag-auxiliary payunir? Pagregular payunir? Paglilingkod sa Bethel? Ano man an hinahagad sa saindo tanganing umoswag sa espirituwal, dakula an pakinabang sa maigot na paghihingoa ngonyan. Kun siring, kita logod gabos magpadagos na maghimuyawot na makalaog sa piot na tata na pasiring sa buhay na daing katapusan!
[Mga Nota sa Ibaba]
a An kabilangan kan mga maliligtas sarong teolohikong problema na pinagdedebatihan na gayo kan mga rabbi. An sarong libro na reperensia sa Biblia nagkokomento: “Kabilang sa pambihirang mga ideya kan hilom na mga doktrina kan mga Rabbi, an saro iyo an pagprobar na aramon an kabilangan kan mga maliligtas paagi sa numerikong kahulogan kan mga letra kan tekstong ini o iyan.”
Mga Puntong Hohorophoropon
◻ Ano an boot sabihon ni Jesus kan sia magsadol, “Maghingoa kamo nin maigot”?
◻ Noarin asin paano aplikado sa saindo an mga tataramon ni Jesus?
◻ Taano an “dakol” ta dai nakakalaog sa piot na tata?
◻ Paano puwedeng maghingoa an may nakapopogol na mga kamugtakan?
◻ Gurano kita kahaloy na kaipuhan na maghimuyawot na makalaog sa piot na tata?