Mga Hoben na Naglilingkod sa Dios

SA PAGHONA daw nindo pambihira na may mga hobenes na idudusay an saindang panahon, na mayo nin suweldo, na dumanan kamo sa saindong harong tanganing makipag-olay manongod sa Dios? Makangangalas daw, sa panahon nin nag-oorog na kadaihan nin pagtubod, na an mga aki minaiba sa saindang mga magurang sa pakikipag-olay sa iba manongod sa makangangalas na mga panuga kan Biblia na maogmang ngapit?a

Sa kadaklan kan 60,000 asin labi pang kongregasyon nin mga Saksi ni Jehova sa bilog na daga, may manonompongan kamong dakol na hobenes. Dai sinda nag-aatender sa semanal na mga klase nin Sunday school o katesismo. Imbes, an mga hobenes na ini nakikinabang asin nagpapartisipar pa ngani sa mga pagtiripon kan kongregasyon. An mga saradit puwedeng magtao nin simpleng mga komento. An mga dai pa nagtitin-edyer nagpapartisipar sa Teokratikong Paadalan sa Pagmiministro. An dakol na tin-edyer ginagamit an mga bakasyon sa klase sa pagtabang sa pagtaraed na makanood manongod sa Dios asin sa saiyang makangangalas na mga panuga sa ngapit.

An totoo mayo man nin bago sa siring na aktibidad nin mga hobenes. An Biblia nagsasaysay manongod sa maimbod na mga soltero asin daraga, saka mga hobenes asin saradit na aki, na nagtatao nin pambihirang mga halimbawa sa paglilingkod sa Dios.

An libro sa Biblia na Mga Salmo naghula nin “grupo nin mga barobata,” na arog kanakarerepresko asin arog kadakol kan “ambon,” sa diosnon na paglilingkod. Iyan nagtataram man manongod sa “mga soltero” asin “mga daraga” na nag-oomaw sa ngaran nin Dios. (Salmo 110:3; 148:12, 13) Posible na may mga hobenes na kabilang sa mga presente kan an banal na espiritu nin Dios ibubo sa mga nagtutubod kan Pentecostes 33 C.E. Kan aldaw na idto mga 3,000 an nag-ako kan Tataramon asin nabautismohan. Sinabi ni apostol Pedro na an pambihirang pangyayaring ini kaotoban kan hula ni Joel: “An saindong mga aking lalaki asin mga aking babae maghuhurula asin an saindong mga barobata makakaheling nin mga bisyon asin an saindong mga gurang na lalaki mangangatorogan nin mga pangatorogan.”—Gibo 2:4-8, 16, 17, 41.

An iba pang halimbawa sa Biblia nin mga tawong naglingkod ki Jehova Dios kan sinda hoben pa iyo si Samuel, an matanos na si Hadeng David, an bantog na mga propeta sa Biblia na si Jeremias asin Daniel, saka an maimbod na si Timoteo. An luwas na ini may tolong artikulo manongod sa nagkapira sa mga halimbawang ini sa Biblia. Masasabotan nindo sa mga artikulo kun taano an mga hobenes, saka an mas may edad nang mga tawo, ta isinasaboot na gayo an paglilingkod sa Dios asin kun taano ta minagamit sinda nin kadakol na oras sa pagtabang sa saindang pagtaraed na gumibo man kaiyan.

[Nota sa Ibaba]