Mga Naggraduwar sa Gilead Galagang Ipalakop an Maogmang Bareta
“AN PINAKAMAKANGANGALAS na bagay na puwede niamong imahinaron kasuarin pa man.” Iyan an namatean ni Anders asin Amalia Groth manongod sa saindang pagsasanay bilang mga misyonero. Ipinahayag ninda an mga saboot kan gabos na 48 naggraduwar sa ika-97 klase kan Paadalan sa Biblia kan Watchtower sa Gilead sa pagsabi pa: “Minotibar asin iinandam kami kan pagsasanay sa Gilead, kaya galaga kaming dumuman sa samong bagong mga asignasyon.”
Mamamatean niato an kagayagayahan na ini mantang nagkokomento an mga estudyante dapit sa programa sa graduwasyon; 6,420 an nagtiripon kan Setyembre 4, 1994, para sa programa.
“An programa binuksan ni Theodore Jaracz kan Namamahalang Grupo paagi sa pagpahayag sa temang ‘Tinotokdoan ni Jehova,’” an sabi ni David Abel asin kan saiyang agom, si Kelli. “An punto na dai niamo noarin man malilingawan iyo na kan si Tugang na Jaracz nagsabi: ‘Dapat niatong midbidon an sato mismong pagigin sadit kun ikokomparar ki Jehova,’ asin iinilustrar iyan paagi sa mapuwersang leksion na yaon sa Job kapitulo 38 asin 39. Idinoon ni Tugang na Jaracz na minsan ngani nadugangan mi an samong kaaraman sa Biblia paagi sa Paadalan nin Gilead, dai mi aram an simbag sa gabos na hapot. Kaipuhan niamong padagos na pag-adalan an Tataramon nin Dios.”
Si Christian asin Angele Coffy nagtaram ngonyan: “Naghanga kami sa pahayag ni Max Larson sa temang ‘Ano an Halaga kan Marahay na Pundasyon?’ Nagustohan mi an pagkomparar nia samo sa sarong edipisyo na nangangaipo nin hararom na pundasyon sa dasok na daga tanganing magdanay na pusog dawa kun may linog. Paagi sa maigot na pag-adal, makakapatalubo kami nin mas dayupot na relasyon ki Jehova asin ikakabasar an samong pagtubod sa hararom na kaaraman tanganing magdanay kaming marigon sa mga panahon nin kasakitan.”
“An pahayag ni Milton Henschel, an presidente kan paadalan, sa temang ‘Hinog na an mga Oma Tanganing Anihon’ magigirumdoman sa haloy na panahon,” an sabi ni Gary asin Lynn Elfers. “An pinakateksto, Juan 4:35-38, nagdoon kan samong pribilehiyo na paglaog sa sarong oma na tinanoman na kan naenot na mga trabahador. Mapahiro ini sa samo na magtrabahong may pakamate nin pagkaapurado.” Minaoyon digdi, si Jan asin Sirpa Vaahtola nagkomento: “Pinakosog ni Tugang na Henschel an samong pag-antisipar manongod sa pag-ani na kaipuhan pang gibohon paagi sa pagtao kan pinakahuring report hale sa mga Estadong Baltiko. An pagdakol sa Estonia 51 porsiento, sa Latvia 106 porsiento, asin sa Lithuania 51 porsiento. Nakaoogma nanggad! An mga tugang duman nakikimaherak sa Kagurangnan na magsugo nin dakol pang trabahador. Kami espesyalmenteng maogma na madangog ini, ta an samong asignasyon pa-Estonia!”
“Si Joel Adams an sunod na nagpahayag sa temang ‘Manarig ki Jehova,’” an paggirumdom ni Kevin asin Evelyn Cortina. “Hinatolan nia kami na dai kami noarin man maninigong mag-isip na kun beses puwede kaming manarig ki Jehova asin kun beses puwede kaming manarig sa samong sadiring pag-isip. Sa samong asignasyon mapapaatubang kami sa dakol na angat—salud, pagkakan, lenguahe, mga kaugalean, asin iba pa. Iyan gabos mangangaipo na dapat kaming manarig ki Jehova.”
Suminunod si Gerrit Lösch, sarong miembro kan Namamahalang Grupo, na ipinaliwanag an temang “Padagos na Ipabanaag an Pagkaherak ni Jehova.” Si Alen asin Ann Marie Gokavi nagsabi: “Idinoon nia na tanda nin Kristianong pagkamaygurang na magpaheling nin pagkaherak sa samong mga kapwa misyonero asin sa mga hinihirasan niamo kan maogmang bareta. An mga asignasyon sa ibang nasyon nangangahulogan nin atang, pero kun mayo nin pagkaherak, kun siring an samong atang magigin bakong gayo mahalaga.” (Mateo 9:13) Idinugang ni Peter asin Fleur Hupston: “Si Tugang na Lösch nagsabi na maninigo kaming magin maheherakon man sa satong mga tugang na lalaki asin babae, na garo baga hiniheling sinda sa ibong na poro nin teleskopyo, kaya an saindang mga sala mapapasadit imbes na mapapadakula.”
“Si Jack Redford, saro sa samong mga instruktor sa Gilead, sunod na nagtaram sa temang ‘Makaootob daw Kamo sa Pagsagwe?’” an paggirumdom ni Mickey asin Sherry Minsky. “Idinoon nia na pinadedepisil nin kapalangkawan na mag-ako nin pagsagwe asin na kun kami labi-labi kasensitibo sa hatol, dai kami makikinabang dian. Dangan nagtao sia nin nagkapirang praktikal na suhestion dapit sa pag-ako nin pagsagwe basado sa Lamentacion 3:27-31.” Idinagdag ni Charles asin Joan Held: “Parate na dai niamo naririsa an samong sadiring mga pagkukulang; kaya, dapat niamong mansayon an pagsagwe bilang paagi na iparisa sa samo an mga bagay na dai mi naririsa. An pagsagwe o hatol gikan ki Jehova ebidensia kan saiyang pagkamoot sa sato.”
“An saro pang instruktor, si Ulysses Glass, nagpahayag sa temang ‘Magkaigwa kan Praktikal na Kadonongan na Minagiya Pasiring sa Buhay.’ Naghapot sia: ‘Ano an gigibohon nindo sa saindong mga nanodan?’” an sabi ni Kenneth asin Lisbeth Ardkäll. “Dangan nagtao sia nin ilustrasyon basado sa Talinhaga 30:24-26 manongod sa sadit na tejon sa gapo asin kun paano iyan biyong sinangkapan ni Jehova tanganing mabuhay. Kami, sa ibong na kampi, bakong natural na madonong, kaya kaipuhan kaming magmaigot sa pagkua nin kadonongan. Sinangkapan kami ni Jehova kan gabos na kaipuhan niamo tanganing magibo iyan. Sagkod na dayupot kami ki Jehova asin sa lambang saro sa pagkamoot, dakol an samong magigibo.”
Pangenot na Pahayag
“Si Tugang na Karl F. Klein, sarong miembro kan namamahalang grupo, maogmang ipinaliwanag sa samo an ika-19 Salmo sa saiyang pahayag na ‘Sarong Alahas sa Tahaw nin mga Alahas,’” an sabi ni Jay asin Gwen Abraczinskas. “Itinampok nia an hararom na pag-apresyar ki Jehova kan salmistang si David asin an saiyang pagkawili sa Tataramon nin Dios.” “Binanga ni Tugang na Klein an salmo sa tolong kabtang,” sabi ni Keith asin Donna Hornback. “An kabtang 1 (bersikulo 1-6) nagpapaheling kan pag-apresyar ni David sa mga linalang nin Dios, an kabtang 2 (bersikulo 7-10) nagpapahayag kan saiyang pag-apresyar sa mga pagboot nin Dios, asin an kabtang 3 (bersikulo 11-14) nagpapagirumdom samo na arog ki David, maninigong mawoton mi na magkaigwa nin marahay na relasyon ki Jehova.”
“Ikinaogma niamo an punto na mahalaga an pagkatakot ki Jehova kun boot ming likayan an maraot. Minagiya ini sa samo na gibohon an dalisay sa saiyang mga mata,” an sabi ni David asin Raylene Long. Uminoyon si Frank asin Vibeke Madsen. “An mga komento ni Tugang na Klein manongod sa kun gurano kapakipakinabang an mga pagirumdom, pagboot, asin mga togon ni Jehova sinumaryong marhay an samong mga nanodan sa Gilead,” an sabi ninda. “Pinangyari kami kaiyan na magin orog pa nganing determinado na magdanay sa Tataramon nin Dios sa ngapit asin ibilang iyan na siring sa lalagan nin kayamanan na mga alahas.”
Kasunod kan pangenot na pahayag, inako kan mga estudyante an saindang mga diploma, asin iinanunsiar an saindang mga asignasyon sa ibang nasyon. Pakatapos kan sesyon para sa pagkakan, an gabos nagtiripon giraray para sa sesyon sa hapon. An mga naggraduwar nagpartisipar sa pagsimbag sa mga hapot na kinonsiderar durante kan pinahalipot na Pag-adal sa Torrengbantayan.
“Dangan suminunod an programa kan mga estudyante na ‘Sinanay na Magin mga Parabalangibog kan Kahadean sa Bilog na Daga,’” an paggirumdom ni Bob asin Shannon Lakatos. “An enot na kabtang kan programa nag-atubang kan mga eksperyensia kan mga estudyante sa paglilingkod sa langtad durante kan samong limang bulan na kurso. Iyan nakasentro sa ekspertong paggamit nin mga hapot sa samong ministeryo. An kabtang sa pag-interbio nagpaheling nin positibong mga paagi sa pag-atubang sa mga angat asin pagliliwat nin mga kamugtakan sa buhay bilang misyonero. An tolong presentasyon sa slide, kan Costa Rica, India, asin Malawi, nagtao samo nin patanaw sa pambilog na kinaban na organisasyon ni Jehova.”
“An kasunod na drama, na Magin Teokratiko, Bakong Kinabanon, nag-ilustrar kan puwedeng magin maraot na epekto kan nagkapirang kinabanon, independiente an kaisipan na mga paryentes,” an sabi ni Jesse asin Michelle Duncan. “Ipinaheling kaiyan na dapat na midbidon kan mga Kristiano an mga paggiya asin pagdirehir nin Teokrasya na kaipuhan asin kapakipakinabang,” an idinugang ni Wenzel asin Kelly Koula.
Tinapos nin ultimong kanta asin pamibi an maogmang programa. Mantang pahale an mga naggraduwar na nag-aantisipar sa saindang paglarga pasiring sa mga asignasyon sa ibang nasyon sa 18 kadagaan, an saindang kaisipan ipinahayag na marhay kan pamamaaram na komentong ini ni Tommi asin Jael Kauko: “Galaga kaming marhay na dumuman sa samong asignasyon asin isagibo an samong mga nanodan. Kadakol kan samong inako—ngonyan kami naman an matao.”
[Ritrato sa pahina 26]
Ika-97 Klase na Naggraduwar sa Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.
(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.