Sarong Mapangganang Kampanya sa Kingdom News
“TAANO ta Pano-pano nin Problema an Buhay?—Posible daw an Sarong Paraiso na Mayo nin Problema?” Ini an titulo kan Kingdom News Num. 34, sarong apat na pahinang tract na idinistribwir sa bilog na kinaban sa 139 tataramon durante kan Abril asin Mayo kan nakaaging taon. “Saro sa mga tampok kan taon” an paglaladawan kan mga Saksi sa Jamaica sa kampanya nin paglilingkod na ini. “Sarong dakulang gikanan nin kagayagayahan para sa mga tugang,” an apod kaiyan kan mga Saksi sa Belgium. Sa Republikang Czech, ini an enot na pangyayari na an Mga Saksi ni Jehova nagkaoportunidad na makikabtang sa pagdistribwir nin Kingdom News. An sangang opisina nagreport: “An kampany nagbunga nin espiritu nin kaigotan asin entusiasmo.” An kaagid na mga saboot nadangog sa dakol na iba pang kadagaan.
An Kingdom News Num. 34 nagkaigwa nin espesyal na mensahe para sa mga nag-aaragagha asin nag-aaragrangay huli sa makababaldeng mga bagay na ginigibo sa ngaran nin relihion. (Ezequiel 9:4) Iyan nagtao nin karangahan sa mga may problema sa buhay huli sa “delikadong mga panahon na masakit pakibagayan” na dian mayo sinda nin kontrol. (2 Timoteo 3:1) Nagtotokdo sa Biblia, ipinaheling kan tract na an mga problema sa buhay mareresolberan sa dai na nanggad mahahaloy. An sarong paraiso na mayo nin problema segurado. (Lucas 23:43) An dakol na nakabasa kan Kingdom News naenganyar kan mensahe kaiyan. An sarong lalaki sa Togo nagsabi sa sarong Saksi: “An saindong sinabi dai makukustion.”
Dai maninigaran, an pagdistribwir kan Kingdom News na ini nakaakit nin bakong komon na atension. Sa Denmark an sarong kagharong nagsimbag sa sarong Saksi na nag-alok kan tract: “Naabot pa sana ako hale sa Estados Unidos. Bago ako naghale, may nag-alok sa sako kan saindong tract. Ngonyan naabot pa sana ako digdi, asin tolos-tolos an parehong tract dinadara sa lenguaheng Danes!”
Entusiastikong Suporta sa Kampanya
An Mga Saksi ni Jehova sa bilog na kinaban entusiastikong nakiayon sa pagdistribwir kan tract. An Austria, El Salvador, Haiti, Hungaria, Italia, New Caledonia, pira sana sa dakol na nasyon na nagreport nin pinakahalangkaw na mga peak nin parahayag durante kan mga bulan na idinidistribwir an Kingdom News.
Sa Zambia an sarong paraataman sa sirkito pinatood an saiyang tolong taon na aking babae, si Deborah, na mag-alok nin literatura sa harong-harong. Durante kan kampanya sa Kingdom News Num. 34, si Deborah nakapasakamot nin labing 45 kopya kan tract. An saiyang ina nakapoon nin mga pag-adal sa Biblia sa nagkapirang uminako kan Kingdom News hale ki Deborah.
Sa Aprika del Sur an sarong tin-edyer nag-alok kan tract sa sarong kaeskuela na an ngaran Cashia. Binasa ni Cashia an tract asin nagsabi: “Ini makangangalas na marhay—an mabuhay sagkod lamang sa sarong paraisong daga! Taano ta mayong nagsabi kaiyan sa sako kaidto?” Naponan an pag-adal sa Biblia. Mayo pang sarong semana si Cashia nakaresibi nin saro pang tract. An ikaduwa hale sa saiyang kasuratan na amigang Katoliko Romano, na nag-iistar sa Cyprus. Ipinaliwanag kan kasuratan na amiga ki Cashia kun taano an mga katokdoan kan Iglesia Katolika Romana ta falso asin sinabi sa saiya na sia may intension na mag-adal sa Biblia kaiba kan Mga Saksi ni Jehova. Siempre, iyan nakapakosog na marhay sa determinasyon ni Cashia na ipadagos an saiyang pag-adal.
An sarong dies anyos na aking lalaki sa Switzerland nakikabtang kaiba kan saiyang ina sa pagdistribwir kan tract. Tinawan nia nin kopya an sarong hoben na babae asin pinarigon an saiyang boot na basahon iyan nin maingat. Hinapot kan hoben na babae an aki kun sia talagang nagtutubod sa iiniilustrar kan retrato sa tutob kaiyan—daing katapusan na buhay sa daga. An simbag kan aki? “Ay, iyo, segurado kong marhay.” Dangan ihinayag kan babae na sia naghahanap kan tunay na pagtubod huli ta kadakol nin dai pagkaoroyon sa saiyang relihion. Sa sarong pagdalaw liwat, naponan an pag-adal sa Biblia.
Insigidang mga Reaksion
Kun minsan an Kingdom News nagcausa nin insigidang reaksion sa mga nagbabasa kaiyan. Pakatapos basahon an tract, an sarong 11 anyos na aking babae sa Belgium nagtuga sa sarong Saksi ni Jehova na sia paraikit sa tindahan. An ina kan aki gustong itago an bagay, alagad an konsensia kan aki napahiro kan saiyang nabasa, asin nag-insistir sia na kaolayon an manedyer kan dakulang saodan. Sa katapustapusi tinogotan kan ina an saiyang aki na bumalik sa dakulang saodan kaiba an Saksi. An manedyer nasorpresa sa saiyang pagtuga. Kan maaraman kan manedyer na an Kingdom News an nagtulod sa saiya na humiro sa paaging ini, an manedyer nagkua nin sadiri niang kopya tanganing helingon kun ano an nasa laog kaiyan na mapuersang marhay. An aking babae ngonyan nag-ooswag sa pag-adal sa Biblia.
An sarong Saksi sa Cameroon nakapasakamot nin sarong kopya kan Kingdom News sa sarong lalaki asin nagsaysay: “Kan bumalik kami, nanompongan niamo na ginuritan nia na iyan asin igwa sia nin nagkapirang hapot. Pakatapos na umako nin nakakokontentong mga simbag, sia nagpahayag: ‘Tunay nanggad na an relihion nakakontribwir sa kamondoan nin katawohan. An saindong tract nakatabang sa sako na masabotan an dakol, alagad gusto kong makanood pa nin orog.’” Ngonyan sia nag-aadal na nin regular sa Biblia.
An sarong Saksi na naghaharongharong sa Uruguay nakapasakamot nin sarong tract sa sarong lalaki. An Saksi nagpadagos na maghulit sa harong-harong asin linibot an bilog na bloke sagkod sa makaabot sia sa likodan na pinto kan harong kan lalaki. Sia nasorpresa na maheling an lalaki na naghahalat sa saiya, kapot an tract. Binasa na nia iyan asin gusto pa nin dugang na impormasyon. An sarong pag-adal pinonan sa panahon man sanang iyan.
An Publiko Tuminabang sa Pagdistribwir
Sa Hapon an sarong hoben na Saksi dinolok an sarong lalaki na labi nang 50 asin iinintrodusir an tract sa saiya. An lalaki naghapot: “Ano an ginigibo nindo sa pulyetong iyan kun nakasosompong kamo nin mga tawong buta?” Inadmitir kan Saksi na dai nia aram. Sinabihan sia kan lalaki na maghalat nin halipot asin naglaog ini sa saiyang harong. Sia nagbalik dara an kopya kan Kingdom News asin nagsabi: “Nakaresibi na ako kan pulyetong iyan. Sa boot ko iyan igwa nin interesanteng marhay asin mahalagang impormasyon, kaya kinopya ko iyan sa Braille. Tabi gamiton nindo ini sa mga tawong buta.” An lalaki naggamit nin dakol na oras sa pagkopya kan Kingdom News sa Braille tanganing dai malihisan kan mga buta an laog kaiyan.
Sa Slovakia nagustohan na marhay nin sarong lalaki an tract kaya sia nagpaduplikar nin 20 kopya, asin idinistribwir nia mismo an mga potograpikong kopyang ini. An sarong parahayag sa Switzerland nagwalat nin Kingdom News sa sarong pamilya asin nagpadagos na maghulit sa itaas na mga eskalon kan edipisyo na iniistaran kan pamilya. Kan sia pababa na giraray, sia sinabat nin sarong aking lalaki na miembro kan pamilya, na huminagad nin 19 pang kopya kan tract. Sa eskuelahan kan aking lalaki, inasignaran an mga estudyante na magsurat manongod sa mga problema asin sa paghanap nin mga solusyon. Gusto niang magkaigwa nin kopya kan Kingdom News an kada saro sa saiyang mga kaklase.
Daing Nalihisan
Pinagmaigotan na marhay kaidtong mga nakikabtang sa kampanya na daing malihisan. Sa New Caledonia an duwang Saksi nagbibiahe pasiring sa teritoryo nin sarong harayong tribo tanganing ikadistribwir an Kingdom News. Mantang nagbibiahe, nakaheling sinda nin sarong dalan na garo dai inaagihan, alagad sinda nagdesisyon pa man giraray na aramon kun may nag-iistar sa poro kaiyan. Binayaan an kotse, sinda naglakaw sa dalan, nag-agi sa katubigan sagkod na sinda makanompong nin sarong harong. Mag-agom na dai pa nakadangog manongod sa Mga Saksi ni Jehova an nag-iistar duman, asin sinda nag-ako nin sarong kopya kan Kingdom News. Sa huri an mga parahayag nagdalaw liwat asin sinda nasorpresa kan maheling ninda na pinakarhay kan mag-agom an tinampo asin pirang tulay-tulay tanganing ikaabante kan mga Saksi an saindang kotse sagkod sa harong. Naponan an sarong regular na pag-adal sa Biblia.
Sa Polandia an sarong Saksi nangaipong umagi sa sarong lugar nin konstruksion tanganing ikaalok an sarong kopya nin Kingdom News sa sarong kagharong. An mga trabahador nagmamasid kan sia umagi pabalik sa lugar nin konstruksion. Katapustapusi, an sarong trabahador inapod sia, na hinahagad saiya na dai sinda lingawan. Kan sia dumolok sa sainda, sinda nagpondo asin maingat na naghinanyog sa pag-atubang kan tract. Sinda uminako nin mga kopya kan Kingdom News patin mga magasin asin kan huri, sa sarong pagdalaw liwat, mga libro.
Ginatos na milyon na Kingdom News Num. 34 an ikinadistribwir sa dakol na tataramon. An mensahe kaiyan nagkaigwa na nin mapuersang epekto. Dakol an nakanood na posible an sarong paraiso na mayo nin problema. Kita namimibi na an mga may matanos na puso padagos na maghimate asin katapustapusi magin kaiba kan “mga mahoyo” na “magmamana kan daga, asin . . . magkakararanga nin labi-labi sa nagsosopay na katoninongan.”—Salmo 37:11.
[Kahon sa pahina 31]
Padagos na Idistribwir an mga Magasin!
Kan Abril asin Mayo 1995 nagkaigwa nin mapangganang marhay na kampanya sa pagdistribwir kan Kingdom News Num. 34. Durante kan duwang bulan na idto, nagkaigwa man nin ekselenteng pagdistribwir kan mga magasin na Torrengbantayan asin Awake! Halimbawa, an sarong tugang na lalaki sa Republikang Czech nagreport na kan Abril sia nakapasakamot nin 250 kopya kan Kingdom News asin 750 magasin. Sa Guadeloupe, pinili an Sabado, Abril 15, na espesyal na aldaw nin pagmamagasin. Haros gabos na parahayag sa nasyon nakikabtang sa ministeryo sa aldaw na iyan! An Slovakia nagkaigwa nin bagong peak sa pagdistribwir nin mga magasin kan Abril. Naresibi an kaagid na mga report hale sa dakol na iba pang nasyon.
Kaya taano ta dai nindo gibohon na ekselenteng bulan an Abril asin Mayo 1996 sa pagdistribwir nin magasin? Puedeng organisaron kan mga kongregasyon an espesyal na mga aldaw sa pagmamagasin. An mga indibiduwal puedeng makikabtang sa pag-auxiliary payunir. Sa paaging ini asin iba pa, puedeng parigonon an boot sa pagdistribwir nin magasin, asin an mahalagang mensahe na ipinahayag sa Kingdom News Num. 34 padagos na ikalalakop. Dangan, siring sa nangyari kan nakaaging taon, seguradong bebendisyonan ni Jehova an maigot na espiritu na ipinaheheling niato.—2 Timoteo 4:22.