Nagigirumdoman daw Nindo?

Nanompongan daw nindo na may praktikal na halaga sa saindo an dai pa sana nahahaloy na mga luwas kan An Torrengbantayan? Kun siring taano ta dai baloon an saindong memorya paagi sa minasunod na mga hapot:

◻ Anong leksion an manonodan niato sa pagbagsak kan mga Amonita? (Sofonias 2:​9, 10)

Bakong magian na bagay ki Jehova an pagbalos nin kaanggotan sa saiyang kabootan, asin sa saiyang itinalaan na panahon, sia mahiro giraray, arog kan ginibo nia kan suanoy na mga panahon. (Ikomparar an Salmo 2:​6-12.)​—12/15, pahina 10.

◻ Sa anong mga paagi na igwa nin katoninongan an mga Kristiano?

Enot, igwa sinda nin ‘pakipagkatoninongan sa Dios paagi sa saindang Kagurangnan na si Jesu-Cristo.’ (Roma 5:1) Ikaduwa, igwa sinda nin katoninongan sa tahaw ninda mismo paagi sa pagpatalubo kan “kadonongan na hale sa itaas,” na “enot sa gabos malinig, dangan matoninong.” (Santiago 3:17)​—1/1, pahina 11.

◻ Sa anong nagkapirang bagay iinaagid an Tataramon nin Dios, asin paano ini nakatatabang sa sato?

An Tataramon nin Dios iinaagid sa masustansiang gatas, matagas na kakanon, nakarerepresko asin nakalilinig na tubig, sarong salming, asin matarom na minasbad. An pakasabot sa kahulogan kan mga terminong ini nakatatabang sa sarong ministro na ekspertong gamiton an Biblia.​—1/1, pahina 29.

◻ An timbang na sekular na edukasyon maninigong makatabang sa sato na gibohon an ano?

Bumasa nin marahay, sumurat nin malinaw, umoswag sa isip asin moral, asin kumua nin praktikal na pagpatood na kaipuhan para sa aroaldaw na pamumuhay asin epektibong banal na paglilingkod.​—2/1, pahina 10.

◻ Anong mahalagang marhay na leksion mapadapit sa edukasyon an manonodan niato ki Jesus?

An edukasyon maninigong gamiton, bakong sa pagpamuraway sa satong sadiri, kundi sa pagtao nin kaomawan sa pinakadakulang Edukador, si Jehova Dios. (Juan 7:18)​—2/1, pahina 10.

◻ Ano an Kahadean nin Dios?

An Kahadean sarong langitnon na gobyernong tinindog nin Dios na nagpapangyari kan kabotan nin Dios na haleon an mga epekto nin kasalan asin kagadanan asin ibalik an matanos na mga kamugtakan digdi sa daga. (Daniel 2:44; Kapahayagan 11:15; 12:10)​—2/1, pahina 16.

◻ Paano itinatao kan Biblia an edukasyon na kaipuhan sa permanenteng pagtapos sa kadahasan?

Paagi sa saiyang Tataramon, an Biblia, tinotokdoan ni Jehova an mga tawo na magin mamomoton sa katoninongan asin magin matanos. (Isaias 48:​17, 18) An Tataramon nin Dios may puersa na aboton asin pahiroon an puso nin sarong tawo, na binabago an saiyang pag-iisip asin paggawe. (Hebreo 4:12)​—2/15, pahina 6.

◻ Sa anong paagi masasabi na igwa nin tolong kaotoban an hula sa Isaias kapitulo 35?

An hula ni Isaias nagkaigwa nin enot na kaotoban kan an mga Judio bumalik hale sa pagkabihag sa Babilonya kan 537 B.C.E. Igwa iyan nin nagpapadagos na espirituwal na kaotoban ngonyan poon kan pagkatalingkas kan espirituwal na Israel sa pagkabihag sa Dakulang Babilonya. Asin magkakaigwa iyan nin ikatolong kaotoban may koneksion sa pag-asegurar kan Biblia dapit sa literal na paraisong mga kamugtakan digdi sa daga. (Salmo 37:​10, 11; Kapahayagan 21:​4, 5)​—2/15, pahina 16, 17.

◻ Paano an personal na interes nin Dios sa mga tawo ipinaheling sa mga milagrong ginibo kan saiyang Aki, si Jesus?

Huling si Jesus “dai makagigibo nin ano man sa saiyang sadiring boot, kundi an saiya sanang naheheling na ginigibo kan Ama,” an saiyang pagdamay nag-iilustrar kan pagmakolog ni Jehova sa lambang saro kan saiyang mga lingkod. (Juan 5:19)​—3/1, pahina 6.

◻ Ano an isinusuherir kan ekspresyon ni Jesus na “mga lolobngan nin girumdoman” na ginamit sa Juan 5:​28, 29?

An Griegong termino na mne·mei’on (lolobngan nin girumdoman) na ginamit digdi nagsusuherir na nagigirumdoman ni Jehova an rekord kan tawong nagadan, kabale an saiyang minanang mga karakteristiko asin kompletong memorya. Nagtatao ini nin makosog na prueba na an Dios nagmamakolog sa mga tawo indibiduwalmente!​—3/1, pahina 6.

◻ Anong nagpapatanid na mensahe sa hula ni Sofonias an may praktikal na tabang sa sato?

Bakong panahon ngonyan na togotan an mga pagduwaduwa na makagamot sa satong puso asin idigson sa satong isip an pagdatong kan aldaw ni Jehova. Siring man, kita maninigong mag-ingat tumang sa nakapanluluyang mga epekto nin pagkaindiperente. (Sofonias 1:​12, 13; 3:8)​—3/1, pahina 17.

◻ Taano an kaimbodan sa Dios ta nag-aatubang nin angat?

Huli ta an kaimbodan kontra sa paslong mga tendensia na minana niato sa satong mga magurang. (Genesis 8:21; Roma 7:19) Orog na importante, si Satanas asin an saiyang mga demonyo determinadong gibohon kitang bakong maimbod sa Dios. (Efeso 6:12; 1 Pedro 5:8)​—3/15, pahina 10.

◻ Sa anong apat na bagay dapat niatong atubangon an angat nin kaimbodan, asin ano an matabang sa sato na gibohon iyan?

An apat na bagay iyo an kaimbodan ki Jehova, sa saiyang organisasyon, sa kongregasyon, asin sa satong agom. An sarong pantabang sa pag-atubang sa mga angat na ini iyo an pagsabot na an angat nin kaimbodan konektadong marhay sa pagbindikar kan soberaniya ni Jehova.​—3/15, pahina 20.

◻ Anong leksion an manonodan niato sa eksperyensia ni David sa pagmamaigot na darahon sa Jerusalem an kaban kan tipan? (2 Samuel 6:​2-7)

Inignoro ni David an mga instruksion na itinao ni Jehova mapadapit sa pagdara kan Kaban, asin ini nagdara nin kalamidad. An leksion iyo na dai niato noarin man maninigong basolon si Jehova huli sa mga problema na ibinubunga kun iniignoro niato an saiyang malinaw na mga instruksion. (Talinhaga 19:3)​—4/1, pahina 28, 29.