An Ika-101 Klase nin Gilead—Maigot sa Marahay na mga Gibo
AN SATONG Kaglalang, si Jehova Dios, maigot sa marahay na mga gibo, asin iyo man an saiyang Aki, si Jesu-Cristo. Bilang satong arogan, ipinaheling ni Jesus an kaigotan paagi sa pag-otob sa saiyang asignasyon na itinao nin Dios, na kaiba an pagtao kan “saiyang sadiri para sa sato tanganing [sia] makalinig para sa saiya man sana nin sarong banwaan na magigin saiyang sadiri, maigot sa marahay na mga gibo.” (Tito 2:14) An 48 miembro kan ika-101 klase kan Paadalan sa Biblia kan Watchtower sa Gilead tunay na ipinaheling an saindang kaigotan sa marahay na mga gibo. An programa sa graduwasyon para sa mga misyonerong ini ginibo kan Setyembre 7, 1996, sa Sentro nin Edukasyon kan Watchtower sa Patterson, Nueva York.
Praktikal na Hatol na Magdanay na Maigot
An tsirman kan programa sa graduwasyon iyo si Carey Barber, sarong miembro kan Namamahalang Grupo, na labing 70 taon na sa bilog na panahon na ministeryo. Sa saiyang pambukas na komento, dinara ni Tugang na Barber an atension sa aktibidad na paghuhulit asin pagtotokdo ni Jesus, na iyo “an ilaw kan kinaban.” (Juan 8:12) Idinoon nia na dai sinadiri ni Jesus an kagalanggalang na katongdan na iyan kundi sinadol nia an saiyang mga disipulo na pasirangon man an saindang liwanag. (Mateo 5:14-16) An pribilehiong ini nin paglilingkod nakadadagdag nin kahulogan sa buhay nin sarong Kristiano asin nagbubugtak nin magabat na paninimbagan sa abaga kan gabos na ‘naglalakaw bilang mga aki nin liwanag.’—Efeso 5:8.
Kasunod kan pambukas na komentong iyan, ipinamidbid si Don Adams na naglilingkod sa mga Opisina de Ehekutibo sa opisina prinsipal kan Brooklyn. Nagpahayag sia dapit sa temang “Naghihiro Paabante, Bakong Paatras.” Isinentro ni Tugang na Adams an atension sa Paadalan nin Gilead mismo asin sa katuyohan kaiyan—ipaabot an paghuhulit kan maogmang bareta sa ibang nasyon. Nagtaram sia dapit sa pag-oswag kan organisasyon nin Dios, na nagpupublikar nin mga babasahon sa Biblia sa bilog na kinaban sa labing 300 na tataramon. An librong Kaaraman na Minagiya Pasiring sa Buhay na Daing Katapusan, na ipinublikar kan 1995, makukua na sa 111 tataramon asin nakaiskedyul na imprentahon sa dakol pang tataramon. Nagin nang instrumento iyan sa pagtabang sa bagong mga disipulo ni Jesus na maabot an pagdusay asin bautismo sa laog sana nin nagkapirang bulan. Kaya makukua na kan bagong mga misyonero an pinakabagong mga pantabang sa pag-adal sa Biblia para sa saindang gibohon.
Sunod, si Lyman Swingle, sarong miembro kan Namamahalang Grupo, nagpahayag dapit sa temang “Padagos na Itao ki Jehova an Saindong Banal na Paglilingkod,” basado sa Kapahayagan 7:15. Huling si Jehova mismo sarong Dios na maogma, an paglilingkod sa saiya nin padagos an nagpapaogma sa saro. (1 Timoteo 1:11) Bilang resulta kan magayagayang paglilingkod na ini, an sarong dakulang kadaklan nin mga indibiduwal hale sa gabos na parte kan daga nagsamba sa saiya. Sa nag-aging mga taon, an mga sinanay sa Paadalan nin Gilead nagkaigwa nin kabtang sa pagtabang sa dakol kaini na makaabot sa tamang kaaraman kan katotoohan. Kun siring, yaon sa sato an gabos na dahelan na tumubod na padagos na bebendisyonan ni Jehova an mga isinusugo ngonyan na tiponon an dakol pang miembro kan nagdadakol na dakulang kadaklan.
“Pagpabanaag kan Kagayagayahan ni Jehova” an tema na itinampok ni Daniel Sydlik, saro man na miembro kan Namamahalang Grupo. Ipinaheling nia na yaon sa gabos na lingkod nin Dios, kabale an bagong mga misyonero, an pribilehio na tokdoan an mga tawo kan dalan nin buhay na daing katapusan asin kan dalan sa pagkamit kan pinakamarahay sa buhay ngonyan. “An pagtotokdo,” sabi ni Tugang na Sydlik, “sarong nakakokontentong propesyon. Mababanaag iyan sa lalauogon kan mga tawo na naggigibo kan pagtotokdo asin sa lalauogon kan mga tawo na nakanonood.” (Salmo 16:8-11) Kinotar nia an sarong misyonero sa Estonia na nagsabi, “Yaon sa sato an pinakadakulang mensahe sa ibabaw kan daga, asin an satong lalauogon an nagpapaheling kaiyan.” An ekspresyon kan satong lalauogon puedeng magbukas nin dakol na pinto asin pumukaw nin interes. Boot na maaraman kan mga tawo kun ano an nagpapaogma sa mga lingkod ni Jehova. “Kaya tawan nin atension an saindong lalauogon,” an hatol ni Tugang na Sydlik. “An mga tawo nawiwiling helingon an maogmang mga tawo.”
Si Ulysses Glass, na nakikabtang sa pagtotokdo sa mga estudyante sa Gilead poon pa sa ika-12 klase kaidtong 1949, nagpahayag sa mga nagdadangog dapit sa temang “Paagi sa Pagpapasensia, Ingatan an Saindong Kalag.” Ano an pagpapasensia? Iyan nagtatao kan ideya nin kalmadong paghalat sa sarong bagay, pagpaheling nin pagpopogol kun napaaanggot o may tension. An tawong mapasensia nagdadanay na kalmado; an bakong mapasensia nagigin pabiglabigla asin aranggoton. “Dakol an naghohona na an pagpapasensia nagpaparisa nin kaluyahan o pag-urong-sulong,” sabi ni Tugang na Glass, alagad “para ki Jehova iyan tanda nin kakosogan asin katuyohan.” (Talinhaga 16:32) Ano an mga balos sa pagpapasensia? “An pagpapasensia kun naaanggot ililikay kamo sa sanggatos na aldaw nin labi-labing kamondoan,” sabi nin sarong sarabihon na Intsik. “Pinagagayon kan pagpapasensia an personalidad nin saro,” an komento ni Tugang na Glass. “Garo man sana pinapahidan kaiyan nin permanenteng barnis an iba pang marahay na mga kualidad. Ginigibo kaiyan na kawiliwili an pagtubod, na nagdadanay an katoninongan, asin na dai nanluluya an pagkamoot.”
“Sarong pribilehio na umako nin asignasyon hale ki Jehova Dios paagi sa saiyang organisasyon,” an sabi ni Mark Noumair, na naglingkod bilang misyonero sa Kenya sa laog nin 11 taon asin ngonyan saro nang instruktor sa Gilead. Mantang ipinaliliwanag nia an temang “Apuera Sana kun May Pagtubod Kamo, Dai Kamo Matagal,” dinara ni Tugang na Noumair an atension sa halimbawa ni Hadeng Acaz nin Juda. Sinierto ni Isaias sa hade an pagsuportar ni Jehova sa saiyang asignasyon, alagad ta si Acaz dai pa giraray nagtiwala sa Saiya. (Isaias 7:2-9) Dangan idinoon ni Tugang na Noumair na an mga misyonero—iyo nanggad, kita gabos—kaipuhan na magkaigwa nin pagtubod ki Jehova tanganing makatagal sa saindang teokratikong mga asignasyon. An partikular na mga angat sa asignasyon na pagmimisyonero nagkakaipo nin makosog na pagtubod. “Perming girumdomon na mayo nin sangkap na situwasyon sa palakaw na ini nin mga bagay,” an sabi ni Tugang na Noumair.
Mga Eksperyensia na Nag-aanimar nin Maigot na Aktibidad
Durante kan saindang pagsasanay sa Gilead, kada katapusan nin semana an mga estudyante nasa pampublikong ministeryo, na iyo man an magigin pangenot sa saindang mga asignasyon sa pagmimisyonero. Si Wallace Liverance, sarong miembro kan mga instruktor sa Gilead, ininterbio an 15 estudyante, na nagsaysay kan saindang mga eksperyensia. Dangan si Leon Weaver kan Service Department Committee asin si Lon Schilling kan Bethel Operations Committee ininterbio an mga miembro kan komite kan sanga hale sa Aprika asin Latin Amerika, na nagsaysay nin mga eksperyensia hale sa langtad nin pagmimisyonero asin nagtao man nin marahay na mga hatol sa magraduwar na mga misyonero. Sa Sierra Leone, an paliwanag, mga 90 porsiento kan mga binautismohan durante kan 1995 taon nin paglilingkod an tinabangan kan mga misyonero. Kanigoan karahay na rekord nin maigot na aktibidad!
Sa katapustapusi, si Milton Henschel, an presidente kan Sosyedad, nagpahayag sa 2,734 nagdadangog dapit sa temang “Pambihira an Naheheling na Organisasyon ni Jehova.” Ano an minagibo sa organisasyon nin Dios na sarong bagay na daing kapareho? Bakong an kadakulaan kaiyan ni an kapangyarihan kaiyan kundi an katunayan na iyan ginigiyahan kan matanos na mga reglamento asin hudisyal na mga desisyon nin Dios. Kan suanoy na mga panahon an banwaan ni Jehova, an nasyon nin Israel, an pinaniwalaan kan saiyang banal na mga kapahayagan, na guminibo sa nasyon na iyan na magin pambihira. (Roma 3:1, 2) Ngonyan, sararo an organisasyon ni Jehova mantang iyan naghihiro sa irarom kan paggiya ni Jesu-Cristo. (Mateo 28:19, 20) Iyan nag-ooswag, nagtatalubo. Igwa daw nin iba pang organisasyon digdi sa daga na an Namamahalang Grupo nagkokonsulta sa Tataramon nin Dios, an Biblia, bago gumibo nin mahalagang mga desisyon? Digdi asin sa iba pang mga paagi, tunay na pambihira an naheheling na organisasyon ni Jehova.
Sarong makawiwiling programa an natapos paagi sa pagtao kan mga diploma asin pagbasa sa sarong surat hale sa klase na nagpapahayag nin apresasyon sa espesyal na pagsasanay.
[Kahon sa pahina 22]
Estadistika kan Klase
Bilang nin mga nasyon na irinepresentar: 9
Bilang nin mga nasyon na inasignaran: 12
Bilang nin mga estudyante: 48
Promedyong edad: 31.7
Promedyong taon sa katotoohan: 13.8
Promedyong taon sa pambilog na panahon na ministeryo: 9.8
[Retrato sa pahina 23]
Ika-101 Naggraduwar na Klase kan Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.