Navidad—Sekular na Piesta Opisyal o Relihiosong Aldaw nin Piesta?
SA Tsina inaapod siang Gurang na Lalaki nin Navidad. Sa United Kingdom, sia midbid na Papa Navidad. An mga taga-Rusya ginagamit an ngaran na Lolo Yelo, asin sa Estados Unidos, sia inaapod na Santa Klaus.
An dakol ibinibilang an magayagayang gurang na lalaking ini na orgolyoso sa saiyang dakulang tulak asin garo niebe kaputing barabas na an mismong ladawan kan Navidad. Alagad aram na aram man na eroestorya sana si Santa Klaus, sarong leyenda na basado sa mga tradisyon na konektado sa sarong obispo kan ikaapat na siglo na taga-Mira (sa presenteng Turkiya).
An mga kostumbre asin tradisyon pirmeng makosog an impluwensia sa mga selebrasyon, asin an Navidad bakong eksepsion. An eroestorya dapit ki Santa saro sanang halimbawa nin osipon na konektado sa sarong popular na piesta opisyal. Minsan ngani hinihingako nin nagkapirang tawo na an mga kostumbre sa Navidad basado sa mga pangyayari na nakarekord sa Biblia, sa katunayan an kadaklan kan mga kostumbreng ini pagano an ginikanan.
An dugang pang halimbawa iyo an Christmas tree. An The New Encyclopædia Britannica nagsasabi: “An pagsamba sa kahoy, na uso sa tahaw kan paganong mga taga-Europa, nagdanay pakatapos na sinda makombertir sa Kristianismo sa mga kostumbre sa Scandinavia na pagbugtak nin dekorasyon na mga kahoy na pirmeng berde sa harong asin kamalig kun Bagong Taon tanganing padulagon an diablo asin pagpatindog nin sarong kahoy para sa mga gamgam sa panahon nin Navidad.”
An paggibo nin mga sinaralapid na koronang holly o iba pang mga kahoy na pirmeng berde saro pang popular na tradisyon nin Navidad. Ini man nakagamot nin hararom sa paganong pagsamba. An suanoy na mga taga-Roma naggamit nin mga sanga nin holly na pansamno sa mga templo durante nin Saturnalia, na pitong aldaw na kapiestahan sa kabangaan nin tiglipot na idinusay ki Saturno, an dios nin agrikultura. An paganong kapiestahan na ini espesyalmenteng midbid huli sa daing pakundangan na sobrang kaorogmahan asin pagigin sobra kainmoral.
An kostumbre sa Navidad na paghadokan sa sirong nin sarong sanga nin mistletoe (na ilinaladawan digdi) tibaad garo romantiko para sa nagkapira, alagad iyan komun na bagay kan Edad Media. An mga Druid sa suanoy na Britania naniniwala na an mistletoe may mahikong mga kapangyarihan; huli kaini, iyan ginagamit bilang proteksion tumang sa mga demonyo, engkanto, asin iba pang klase nin maraot. Pag-abot nin panahon, nagkaigwa nin superstisyon na an paghadokan sa sirong nin mistletoe magiya sa pag-agoman. An kaugalean na ini popular pa man giraray sa tahaw nin nagkapira sa panahon nin Navidad.
Nagkapira sana ini sa mga tradisyon nin Navidad sa presente na impluwensiado kan o direktang hale sa paganong mga katokdoan. Pero tibaad isip-isipon nindo kun paano nangyari an gabos na ini. Paanong an sarong piesta opisyal na hinihingakong nagtataong onra sa pagkamundag kan Cristo nagin konektadong marhay sa mga kostumbre kan mga bakong Kristiano? Orog pang mahalaga, ano an pagmansay nin Dios sa bagay na iyan?
[Picture Credit Lines sa pahina 2]
Pahina 3: Santa Klaus: Thomas Nast/Dover Publications, Inc., 1978; mistletoe sa pahina 3 asin ilustrasyon sa pahina 4: Discovering Christmas Customs and Folklore ni Margaret Baker, ipinublikar kan Shire Publications, 1994