Sarong Maogmang Okasyon—An Gradwasyon kan Ika-104 Klase kan Gilead

“INI sarong maogmang aldaw, asin kita gabos naggagayagaya.” Paagi sa mga tataramon na iyan binuksan ni Carey Barber, sarong miembro kan Namamahalang Grupo kan Mga Saksi ni Jehova, an magayagayang programa sa gradwasyon kan ika-104 klase kan Paadalan sa Biblia kan Watchtower sa Gilead kan Marso 14, 1998. An 4,945 nag-atender inagdang ponan an okasyon paagi sa pagkanta kan awit na pan-Kahadean numero 208, na may titulong “Sarong Awit nin Paggayagaya.”

Praktikal na Hatol na Magdanay na Maogma

An enot na kabtang kan programa, na serye nin limang haralipot na diskurso na basado sa Biblia, nagtao nin praktikal na hatol sa kun paano papagdadanayon an magayagayang espiritu na namatean sa aldaw kan gradwasyon.

An enot na pahayag itinao ni Joseph Eames kan Departamento nin Pagsurat. Sia nagpahayag sa temang “Arogon an Espiritu kan mga Maimbod,” na basado sa pagkasaysay sa Biblia na nasa 2 Samuel kapitulo 15 asin 17, na dian si Absalon, na aking lalaki ni David, nakipagkasapakat tanganing agawon an itinao nin Dios na kahadean kan saiyang ama paagi sa pagsutsut nin rebelyon. Minsan siring, igwa nin mga nagdanay na maimbod sa linahidan ni Jehova, si Hadeng David. Anong leksion an manonodan digdi kan bagong mga misyonero? “Saen man kamo magduman sa saindong destino sa pagmimisyonero, maimbod na paoswagon an espiritu nin kooperasyon asin paggalang sa teokratikong autoridad. Tabangan an iba na gibohon man iyan,” an pagtapos ni Tugang na Eames.

An suminunod sa programa iyo si David Sinclair, na sinumaryo an sampulong kahagadan, na nasambitan sa Salmo 15, sa pagigin mga bisita sa ‘tolda ni Jehova.’ An saiyang pahayag, na may titulong “Magpadagos Bilang mga Bisita sa Saindong Tolda nin Pagmimisyonero,” inenkaminar an magradwar na mga estudyante na iaplikar an salmong ini sa saindang destino sa pagmimisyonero, na duman sinda magigin mga bisita. Itinampok ni Tugang na Sinclair an halaga nin pamumuhay sono sa diosnon na mga pamantayan sa gabos na panahon. An resulta kaini? An Salmo 15:5 nagsasabi: “Sia na naggigibo kan mga bagay na ini dai noarin man matatanyog.”

Suminunod si John Barr, sarong miembro kan Namamahalang Grupo, asin dinara an atension sa nakapakokosog na epekto kan pagkanta sa Kristianong mga pagtiripon. Alagad ano an pinakamagayagayang awit na kinakanta sa bilog na daga ngonyan? Iyan an maogmang bareta kan Mesiyanikong Kahadean nin Dios. Ano an ibinubunga kan gabos na pagkantang ini, o paghuhulit manongod sa Kahadean? An ikaduwang estropa kan awit numero 208 sinasabi ini sa malinaw asin halipot na pananaram: “Sa katokdoan kan Kahadean, an dakol ki Jehova minaiba. Sa kaogmahan nag-aawitan, ipinadadangog ninda talaga!” Iyo, kada aldaw mga 1,000 bagong disipulo an nababautismohan. Si Tugang na Barr nagtapos: “Bako daw na marahayon na isipon, mga tugang, na kamo isinusugo sa mga teritoryo tanganing tagboon an klase nin mga tawo na naghahalat na sanang magdangog sa saindong awit nin pag-omaw?”

An “Hinanyogon an mga Tingog nin Eksperyensia” iyo an titulo kan sunod na diskurso na itinao ni James Mantz kan Departamento nin Pagsurat. Sinabi nia na an nagkapirang bagay manonodan sana paagi sa personal na eksperyensia. (Hebreo 5:8) Minsan siring, an Talinhaga 22:17 ineenkaminar kita na ‘ikiling an satong talinga asin maghinanyog sa mga tataramon kan mga madonong,’ o mga dakol nang eksperyensia. Dakol na manonodan an magradwar na mga estudyante sa mga naenot sa sainda. “Tatao sindang tumawad sa lokal na mga paratinda. Aram ninda kun arin na mga lugar sa siudad an dapat na likayan huli sa pisikal o moral na mga peligro. Aram ninda kun sa ano sensitibo an mga tagaduman. Aram kan haloy nang mga misyonero kun ano an kaipuhan nindo tanganing magin maogma asin mapanggana sa saindong destino,” sabi ni Tugang na Mantz.

Sa pagpahayag sa temang “Pahalagahan an Saindong Teokratikong Asignasyon,” ipinaliwanag ni Wallace Liverance, an rehistrador sa Paadalan nin Gilead, na minsan ngani an nagkapirang misyonero, arog baga ki apostol Pablo, Timoteo, asin Bernabe, nag-ako kan saindang mga asignasyon hale sa Dios paagi sa banal na espiritu o sa sarong milagrosong kapahayagan, an mga misyonerong sinanay sa Gilead inaasignaran nin lugar sa pambilog na kinaban na langtad kan “fiel asin madonong na oripon.” (Mateo 24:​45-​47) Iinagid nia an mga destino kan mga misyonero sa mga lugar na inasignar ni Gedeon sa saiyang mga tawohan na makikilaban kaidto sa mga Midianita. (Hokom 7:​16-21) “Pahalagahan an saindong teokratikong asignasyon sa pagmimisyonero. Kun paanong an mga soldados ni Gedeon ‘padagos na nagtirindog an lambang saro sa saiyang lugar,’ mansayon nindo an saindong destino bilang saindong lugar na namumugtakan. Magtubod kamo na puede kamong gamiton ni Jehova kun paanong ginamit nia an tolong gatos ni Gedeon,” an sadol ni Tugang na Liverance.

An Pagigin Interesado sa mga Tawo Nagbubunga nin Kaogmahan

An The Watchtower sarong beses nagkomento: “Imbes na isentro an satong intereses asin buhay sa minanupakturang mga gamit asin kasangkapan kan presenteng palakaw na ini, mga bagay na daing kasegurohan na magpapadagos, gurano kamas marahay asin madonong na kita magkaigwa nin tunay na interes sa mga tawo asin makanood na makanompong nin tunay na kagayagayahan sa pagtabang sa iba.” Kaoyon kaiyan, ipinakipag-olay ni Mark Noumair, saro sa mga instruktor sa Paadalan nin Gilead, sa sarong grupo nin mga estudyante an saindang mga eksperyensia sa paglilingkod sa langtad asin nagkomento: “An pagpaheling nin personal na interes sa iba an magibo sa saindo na marahay na mga misyonero.”

Mga Liabe sa Kaogmahan sa Langtad sa Ibang Nasyon

Ano an nagkapirang liabe sa kapangganahan asin kaogmahan sa pagmimisyonero? Si Tugang na Charles Woody kan Departamento sa Paglilingkod asin si Tugang na Harold Jackson, sarong dating misyonero sa Latin Amerika asin nagtatabang sa Komite sa Pagtotokdo, ininterbio an mga miembro kan laen-laen na Komite kan Sanga na nag-aatender sa ikasiyam na klase kan paadalan para sa mga personahe kan sanga. Uya an sarong sampol kan hatol na itinao kan mga ini:

Si Albert Musonda hale sa Zambia nagkomento: “Kun an misyonero nagsasadiring boot na ranihon asin taratarahon an mga tugang, iyan nagpapatalubo nin nakapakokosog na espiritu huli ta mapaparani an boot kan mga tugang sa misyonero, asin mapaparani an boot kan misyonero sa sainda.”

Si Rolando Morales na taga-Guatemala nagsuherir na kun an mga misyonero inaalokan nin maiinom kan makikatood na mga tawo, sinda puedeng sumimbag sa maboot asin mataktikang paagi: “Bago lang po ako digdi sa nasyon. Gusto ko kutana iyan, alagad an sakong hawak mayo kan natural na mga pandepensa na arog kan sa saindong hawak. Logod man na pag-abot nin panahon maiinom ko na iyan, asin maoogma akong gibohon iyan.” Ano an mga pakinabang sa arog kaiyan na simbag? “Dai maraot an boot kan mga tawo, asin an mga misyonero magigin maboot sa iba.”

Ano an makatatabang sa mga misyonero na makatagal sa saindang mga destino? Ini an komento ni Tugang na Paul Crudass, sarong gradwado sa ika-79 klase kan Gilead, na 12 taon nang naglilingkod sa Liberia: “Aram ko na totoo na hinihidaw nin mga magurang an saindang mga aki. Alagad may mga panahon na an misyonero nagmamaigot na matuod sa nasyon, mga kamugtakan kan palibot, kultura, mga tawo. Tibaad makamate sia na gusto na niang magpuli. Kun makaresibi sia nin surat hale sa harong na nagsasabi, ‘Pungaw na kaming marhay sa saimo; dai mi aram kun ano an gigibohon mi kun mayo ka,’ tibaad dahelan sana dian mag-impake na sia asin magpuli. Mahalagang marhay na girumdomon iyan kan mga paryente ninda na uya digdi ngonyan.”

Pakatapos kan mga interbio, an pangultimong pahayag sa programa iinatubang ni Theodore Jaracz, sarong miembro kan Namamahalang Grupo. An saiyang tema: “Papagdanayon na Pangenot sa Saindong Buhay an Kahadean.” Paano makapagdadanay na nakatorohok an mga misyonero asin dai maparayo an atension sa saindang gibohon? Inenkaminar nia sinda na magkaigwa nin iskedyul para sa personal na pag-adal sa Biblia, na matabang sa sainda na papagdanayon na pangenot sa buhay an intereses kan Kahadean. Asin uni an napapanahon na pagirumdom: “May mga misyonero na napabayaan an personal na pag-adal huli ta sinda nabangkag sa elektronikong mga kasangkapan, E-mail, asin komputer. Maninigo kitang magkaigwa kan tamang kaisipan tanganing magin timbang sa paggamit nin ano man na kasangkapan asin dai gumamit nin sobrang panahon sa sarong bagay na puedeng makaagaw sa satong personal na pag-adal kan Tataramon nin Dios.”

Kasunod kan diskurso ni Tugang na Jaracz an pagtao kan mga diploma asin an pagbasa sa surat nin apresasyon hale sa klase. Siring kaini an pagkapahayag kan representante kan klase sa saboot kan gabos: “Naheling mi an aktuwal na ebidensia kan pagkamoot na sinabi ni Jesus na magpapamidbid kan saiyang mga disipulo, asin pinakosog liwat kaini an samong boot na magsaen man kami, yaon an mainit, mamomoton, arog sa ina na organisasyon na nagsusuportar sa samo. Paagi sa pagsuportar na iyan, andam kaming magduman sa kaporoporohi kan daga.” Idto sarong nakapahihirong pagtatapos nin maogmang aldaw nin gradwasyon para sa ika-104 klase kan Gilead.

[Kahon sa pahina 24]

Estadistika kan Klase

Bilang nin mga nasyon na irinepresentar: 9

Bilang nin mga nasyon na inasignaran: 16

Bilang nin mga estudyante: 48

Bilang nin mga mag-agom: 24

Promedyong edad: 33

Promedyong taon sa katotoohan: 16

Promedyong taon sa bilog na panahon na ministeryo: 12

[Retrato sa pahina 25]

Ika-104 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Retrato sa pahina 26]

Brothers who shared in instructing the 104th class: (from left) W. Liverance, U. Glass, K. Adams, M. Noumair