Nagtitindog sa Tata nin Mas Dakulang Aktibidad

“MAYO nin espiritu nin pakipagdaogan. Mawot kan gabos na magin mapanggana an gabos,” an sabi ni Richard asin Lusia, sa pagladawan kan saindang mga kapwa estudyante sa ika-105 klase kan Paadalan sa Biblia kan Watchtower sa Gilead. “Kami gabos magkakalaen na marhay, alagad para sa samo, mahalagang marhay an lambang estudyante.” Nag-oyon an sarong kaeskuela, si Lowell, na idinugang: “Naparani kami sa lambang saro huli sa samong mga pagkakalaen.”

An klase, na naggradwar kan Setyembre 12, 1998, totoong laen-laen. An nagkapira sa mga estudyante nagpayunir sa mga lugar na dakula an pangangaipo nin mga parahayag kan Kahadean; an iba fiel na naglingkod nin mas harani sa saindang sadiring lugar. An pira, arog ki Mats asin Rose-Marie, kinaipuhan na haloy asin mahigos na maghingoa tanganing mapaoswag an saindang Ingles bago sinda nakaatender sa paadalan. An dakol sa mga estudyante nag-isip nang maglingkod bilang misyonero poon sa pagkaniaki. An sarong mag-agom 12 beses nang nag-aplay; abaang ogma ninda na makaresibi nin imbitasyon sa ika-105 klase!

An 20 semana nin sigidong pagsasanay marikason na nag-agi. Bago iyan nagamiawan kan mga estudyante, isinumitir na ninda an saindang ultimong nasusurat na eksaminasyon, asin itinao na an saindang ultimong berbal na report, asin uminabot an aldaw nin gradwasyon.

An tsirman kan programa, si Albert Schroeder, sarong miembro kan Namamahalang Grupo kan Mga Saksi ni Jehova, pinagirumdom an klase na sinda “nagtitindog sa tata nin mas dakulang aktibidad sa langtad nin edukasyon sa Biblia,” na sinusundan an labing 7,000 na iba pang naenot sa sainda sa Gilead. Sinabi nia na durante kan tig-init, an mga estudyante nagkaigwa nin daing kaagid na oportunidad na makaasosyar an haloy nang mga misyonero kan an mga ini magsongko sa pankinaban na opisina prinsipal kadungan kan internasyonal na mga kombension.

Dangan ipinamidbid ni Tugang na Schroeder si Max Larson kan Komite sa Pagpadalagan kan Bethel. Ipinaliwanag nia an temang “Edukasyon na Minagiya Pasiring sa Buhay na Daing Katapusan.” Kinotar ni Tugang na Larson an Talinhaga 1:​5, na nagsasabi: “An madonong maghihinanyog asin mag-aako nin dagdag na pagtotokdo, asin an tawong may pakasabot iyo an saro na magkakaigwa nin marahay na paggiya.” Kaipuhan an kakayahan tanganing magin epektibong misyonero. An mga tawong may kakayahan namumugtak sa atubangan nin mga hade. (Talinhaga 22:29) Pakatapos na matokdoan sa laog nin limang bulan, an mga estudyante nasangkapan nang marhay na irepresentar an kadarudakulaing mga Hade, si Jehova Dios asin si Cristo Jesus.

Si David Olson kan Departamento sa Paglilingkod sunod na nagpahayag sa temang “Tumabang na Pagayagayahon an Puso ni Jehova.” Sia naghapot: “Ano an puedeng gibohon nin bakong sangkap na mga tawo tanganing pagayagayahon an puso nin Dios?” An simbag? Puede sindang maglingkod sa saiya nin fiel, maimbod, asin may kagayagayahan. Boot ni Jehova na an saiyang banwaan maogma sa saindang paglilingkod sa saiya. Kun may kagayagayahan na ginigibo niato an kabotan nin Dios, pinaoogma niato an saiyang puso. (Talinhaga 27:11) Binasa ni Tugang na Olson an sarong surat hale sa sarong mag-agom na misyonero na naggradwar sa Gilead sa ika-104 klase. Naoogma daw sinda sa saindang bagong asignasyon? “Igwa kami nin mga 140 parahayag,” an isinurat ninda mapadapit sa saindang kongregasyon, “na may promedyong nag-aatender sa mga pagtiripon na 250 sagkod 300. An paglilingkod sa langtad an pinakamarahay na kabtang. Igwa kami nin tig-apat na inaadalan, asin an nagkapira nag-aatender na sa mga pagtiripon.”

Si Lyman Swingle, na kabilang sa Namamahalang Grupo, nagpahayag sa temang “Panahon na Umontok nin Kadikit Asin Pensaron an Saindong mga Bendisyon.” An pagsasanay sa Gilead nagtao nin dakol na bendisyon. Tinabangan kaiyan an mga estudyante na umoswag an kaaraman, umoswag an pag-apresyar sa organisasyon ni Jehova, asin pataluboon an mahalagang marhay na mga kualidad, arog baga nin kapakumbabaan. “Nakapakukumbabang eksperyensia an magdigdi asin magtao nin panahon na maghinanyog sa pagtotokdo,” an sabi ni Tugang na Swingle, na idinugang: “Mahale kamo digdi na orog na gayong nasangkapan na pamurawayon si Jehova.”

“Kanigoan Kadakula kan Saindong Kagayagayahan​—Kaya Taano ta Maghadit?” an titulo nin pahayag ni Daniel Sydlik, miembro man kan Namamahalang Grupo. Kun lumataw an mga problema, humanap nin giya sa Kasuratan, an sadol nia. Ginagamit an piniling mga bersikulo sa ikaanom na kapitulo kan Mateo, iinilustrar ni Tugang na Sydlik kun paano ini magigibo. An kadaihan nin pagtubod puedeng magin dahelan na kita mahadit sa pan-aroaldaw na mga bagay, arog baga nin kakanon asin gubing. Minsan siring, aram ni Jehova an kaipuhan niato. (Mateo 6:​25, 30) An paghadit makakadagdag sana sa mga problema kan kada aldaw. (Mateo 6:34) Sa ibong na kampi, kaipuhan an pagpaplano. (Ikomparar an Lucas 14:28.) “An ibinabawal sa sato ni Jesus, bakong an madonong na paghorophorop para sa ngapit, kundi an bakong madonong na paghadit manongod kaiyan,” an paliwanag ni Tugang na Sydlik. “An aksion saro sa pinakaepektibong bolong sa kahaditan. Kun kita nahahadit, marahay na ponan tang makipag-olay manongod sa katotoohan.”

Panhuring Hatol kan mga Instruktor

Suminunod an mga pahayag kan tolong miembro kan mga instruktor sa Gilead. Si Karl Adams an enot na nagpahayag, sa temang “Ano an Ibabayad Nindo ki Jehova?” An saiyang pahayag basado sa ika-116 na Salmo, na tibaad iyo an inawit ni Jesus kan banggi bago sia nagadan. (Mateo 26:​30, nota sa ibaba) Ano an nagsabong sa isip ni Jesus mantang inaawit nia an mga tataramon na: “Ano an ibabayad ko ki Jehova para sa gabos na pakinabang na itinao nia sa sako”? (Salmo 116:12) Tibaad hinohorophorop nia an sangkap na hawak na inandam para sa saiya ni Jehova. (Hebreo 10:5) Sa sunod na aldaw, idodolot nia an hawak na iyan bilang atang, na pinatutunayan an rarom kan saiyang pagkamoot. Nanamitan kan mga estudyante sa ika-105 klase an karahayan ni Jehova sa laog kan nag-aging limang bulan. Ngonyan ipaheheling ninda an saindang pagkamoot sa Dios paagi sa pagmamaigot sa saindang destino sa pagmimisyonero.

Si Mark Noumair, an ikaduwang instruktor sa Gilead na nagpahayag, sinadol an mga estudyante na “Magpadagos sa Paggibo kan Tama.” Si Jose, pakapabakalan sa saiya bilang oripon sa Egipto, nagtios nin 13 taon nin bakong makatanosan na tratamiento. Tinogotan daw nia an mga sala nin iba na papondohon sia? Dai, padagos siang naggibo kan tama. Dangan, sa itinalaan na panahon nin Dios, si Jose ilinigtas sa saiyang mga kasakitan. Biglang naliwat an saiyang kamugtakan hale sa pag-erok sa sarong bilanggoan pasiring sa pag-erok sa sarong palasyo. (Genesis, kapitulo 37-​50) Hinapot kan instruktor an saiyang mga estudyante: “Kun an saindong mga linalaoman dai maotob sa saindong destino sa pagmimisyonero, mapondo daw kamo? Mapadaog daw kamo sa pagkadesesperar? O matagal daw kamo, arog ki Jose?”

Sa katapustapusi, an rehistrador kan Paadalan nin Gilead, si Wallace Liverance, pinangenotan an sarong maogmang pakipag-olay sa mga miembro kan klase dapit sa temang “Ipaisi an Hade Asin an Kahadean.” An nagkapira sa mga estudyante nagsaysay kan mga naeksperyensiahan ninda mantang naghuhulit sa harong-harong, sa mga tindahan, asin sa mga tinampo. An iba nagsaysay kun paano sinda nagpatotoo sa mga tawo na iba an lenguahe. Ipinaheling kan iba pa kun paano maghuhulit sa mga tawo na iba an relihion. An gabos na naggradwar galagang lubos na makikabtang sa ministeryo sa langtad nin pagmimisyonero.

Maogmang Haloy Nang mga Misyonero

An sunod na kabtang, na may titulong “An Magayagayang mga Resulta kan Paglilingkod Bilang Misyonero,” iinatubang ni Robert Wallen asin igwa nin mga interbio sa apat na tugang na lalaki hale sa mga tawohan sa opisina prinsipal na dai pa sana nahahaloy na nagkaigwa nin nakaparirigon na pakikiasosyar sa eksperyensiadong mga misyonero. Daing pag-alangan na inadmitir kan mga misyonerong idto na bakong pasil para sa sainda na mag-adal nin bagong lenguahe, na makibagay sa ibang kultura, o matuod sa laen na klima. Dangan yaon an mga kolog nin kapungawan na dapat labanan. Kun beses, minalataw an mga problema sa salud. Alagad sa ibong kan gabos na iyan, an mga misyonero nagpadanay nin positibong kaisipan, asin binendisyonan an saindang pagmamaigot. An nagkapira dakol na tawo an nadara sa kaaraman dapit ki Jehova. An iba nakakontribwir sa laen-laen na paagi sa kabilogan na pag-oswag kan gibohon na pan-Kahadean sa saindang nasyon.

An ultimong nagpahayag iyo si Carey Barber, sarong miembro kan Namamahalang Grupo. Rinepaso nia an tampok na mga kabtang sa programa kan “Sa Dios na Dalan nin Buhay” na kombension. “Ano an nagin epekto kan programa sa kombension sa saindong relasyon ki Jehova?” an hapot nia sa mga nagdadangog. Ipinaheling kan espiker an kalaenan kan may bendisyon na mga resulta kan pagsunod sa dalan nin Dios asin kan kapahapahamak na kaaabtan kan mga nagsusunod sa dalan kan kinaban. Nasasambitan an paglapas ni Moises sa Meriba, sia nagpatanid: “Dawa pakatapos na an saro fiel na maglingkod nin dakol na taon, dai iniignoro ni Jehova an maski sadit na paglapas sa Saiyang makatanosan na mga ley.” (Bilang 20:​2-​13) Logod na an gabos na lingkod nin Dios sa gabos na lugar danay na pangaptan nin higot an saindang mahalagang marhay na mga pribilehio nin paglilingkod!

Uminabot an oras na akoon kan mga estudyante an saindang diploma. Dangan, binasa kan sarong representante kan klase an sarong surat nin apresasyon para sa pagsasanay na inako kan mga estudyante. Pakatapos nin pantapos na awit asin odok sa pusong pamibi, natapos an programa sa gradwasyon. Alagad, para sa ika-105 klase, kapinonan sana ini, huli ta an bagong mga misyonero “nagtitindog sa tata nin mas dakulang aktibidad.”

[Kahon sa pahina 23]

Estadistika kan Klase

Bilang nin mga nasyon na irinepresentar: 9

Bilang nin mga nasyon na inasignaran: 17

Bilang nin mga estudyante: 48

Bilang nin mga mag-agom: 24

Promedyong edad: 33

Promedyong taon sa katotoohan: 16

Promedyong taon sa bilog na panahon na ministeryo: 12

[Kahon sa pahina 24]

Pinili Ninda an Bilog na Panahon na Paglilingkod

“Kan ako aki pa, mayo akong plano na magpayunir,” an sabi ni Ben, sarong naggradwar sa ika-105 klase. “Paghona ko idto sanang may espesyal na mga kakayahan asin pinakamarahay na mga kamugtakan an puedeng magpayunir,” an sabi pa nia. “Alagad talagang pinag-adalan ko na kamotan an paglilingkod sa langtad. Dangan sarong aldaw biglang nagsabong sa isip ko na an pagigin payunir nangangahulogan sana nin pagkaigwa nin mas dakulang kabtang sa ministeryo. Kaidto ko narealisar na puede akong magpayunir.”

“Pirmeng pinahahalagahan na marhay sa samong harong an bilog na panahon na mga lingkod,” an sabi ni Lusia. Nagigirumdoman nia an pagkaogma kan saiyang kongregasyon sa kada pagsongko kan mga misyonero. “Kan ako nagdadakula na,” sabi nia, “nasabotan ko na an bilog na panahon na paglilingkod magigin kaiba sa mga plano ko.”

An ina ni Theodis nagadan kan sia 15 anyos. “Kan panahon na idto, talagang dinamayan ako kan kongregasyon,” sabi nia, “kaya hinapot ko an sakong sadiri, ‘Ano daw an magigibo ko tanganing ipaheling an sakong apresasyon?’” Nagmotibar ini sa saiya na lumaog sa bilog na panahon na paglilingkod asin ngonyan sa pagmimisyonero.

[Retrato sa pahina 25]

Ika-105 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.