“Kun Para sa Sako Asin sa Sakong Pamilya . . . ”
1 “Kun para sa sako asin sa sakong pamilya, kami maglilingkod ki Jehova.” (Jos. 24: 14, 15) An siring na determinasyon ni Josue asin kan iba pang payo nin pamilya kaipuhan tanganing mapaglabanan nin mga pamilyang Israelita an falsong pagsamba sa daga nin Canaan. Siring man ngonyan, kaipuhan kitang magin determinado sa satong paninindogan para sa tunay na pagsamba tanganing mapaglabanan kan satong pamilya an maraot na mga impluwensia kan palakaw nin mga bagay na nakapalibot sa sato.
2 Paninimbagan kan mga payo nin pamilya na magtagama para sa saindang pamilya. (1 Tim. 5:8) Ini totoo nangorogna sa espirituwal na paagi. Mga payo nin pamilya, igwa daw kamo nin programa nin pampamilyang pagsamba, kaiba na an pagtotokdo sa Biblia, asin kamo daw nangengenot kaiba kan saindong pamilya sa ministeryo sa langtad?
PAG-OROLAY KAN PAMILYA SA BIBLIA
3 Mantang an mga gibo nin mamomoton na kabootan ni Jehova “bago kada aga,” bako daw na maninigo na pag-olayan ini kan bilog na pamilya aroaldaw? (Lam. 3: 22, 23) An sarong marahay na paagi na magibo ini iyo an pag-oorolay sa teksto kan aldaw gikan sa Pagsiyasat sa Kasuratan Aroaldaw.
4 Dugang pa, an dakol na teokratikong pamilya igwa nin regular na oras para sa pampamilyang pag-adal. (Deut. 4: 9; 6: 1, 2) Tanganing makatabang digdi, an mga publikasyon kan Sosyedad nagtao nin mga suhestion na maninigong sunodon kan lambang payo nin pamilya. —Helingon an Torrengbantayan, Nobyembre 1, 1986, p. 21 (sa Ingles, p. 24); School Guidebook, p. 36-8.
PAGLILINGKOD SA LANGTAD KAN PAMILYA
5 Mantang an ministeryo sa langtad mayor na kabtang kan satong pagsamba, an pamilya maninigong iribang makikabtang digdi. (Heb. 13:15) An mga payo nin pamilya mapaooswag an pagkasararo kan pamilya asin maparirigon an espirituwal na kosog paagi sa pag-iba sa kada miembro kan pamilya sa paglilingkod. (Tal. 22:6) Kun beses, tibaad booton nin mga magurang na sia an tumao kan introduksion dangan pabayaan an aki na bumasa nin sarong teksto o ipaheling an librong iinaalok. Dai pagmenuson an abilidad nin mga aki sa ministeryo! Parate na minahanga an mga kagharong sa mga aki na matibay na magpaliwanag. —Mat. 21:16.
6 Kamo daw, kapareho ni Josue, determinado na kamo asin an saindong pamilya maimbod na maglilingkod ki Jehova? Arangon an paggiya ni Jehova mantang iinaaplikar nindo an mga suhestion na itinao sa itaas. Bebendisyonan nia an saindong determinadong mga paghihingoa na maimbod na maglingkod sa saiya.