Gumibo nin Progresibong mga Pag-adal sa Biblia
1 An mga pag-adal sa Biblia maninigong ponan asin gibohon na nasa isip an klarong katuyohan, an pagtabang sa inaadalan na magin mabungang disipulo ni Cristo Jesus. (Mat. 13:23) Tabangan an inaadalan na makasabot na an pag-adal gigibohon serosemana tanganing tabangan sia na magkaigwa nin pundamental na kaaraman sa Tataramon nin Dios. Siring man, maboot na idoon an kasibotan kan paggibo nia nin tunay na pag-oswag paagi sa pag-aplikar kan saiyang nanonodan. (Tal. 22:17; Fil. 3:16) Alagad sa anong espisipikong mga bagay maninigong maheling an pag-oswag?
2 Sa panapanahon maninigong horophoropon kan parahayag an pag-oswag kan inaadalan sa Biblia. Ihapot sa saindong sadiri: Patienot daw niang inaandam an saiyang leksion, na binabasa an mga teksto sa Kasuratan na sinitar pero dai kinotar? (Gibo 17:11; 1 Tes. 2:13) An saiya daw na mga komento itinatao sa sadiri niang mga tataramon? (Tal. 2:1-6) Angay daw na dagkahon sia na gumibo nin dagdag na pagbasa sa Tataramon nin Dios? May suskripsion daw sia sa Magmata! asin Torrengbantayan? Nag-oswag na daw sia sagkod sa punto na aapresyaron nia an teksto sa aroaldaw?
3 Ipinaheheling daw nia sa saiyang pagtaram, kaisipan, asin gawe na iinaaplikar nia an pamantayan sa moralidad kan Biblia? (1 Cor. 6:9, 10) Ginigibo daw nia an mga pagliliwat sa personalidad? (Efe. 4:22-24) Nakikipag-olay daw sia nin impormal sa mga paryentes, katrabaho, o pagtaraed manongod sa mga nanonodan nia? (Luc. 6:45) Ginigibo daw niang ugale an pag-atender sa mga pagtiripon kan kongregasyon? (Heb. 10:22-25) An paghorophorop sa pag-oswag kan inaadalan sa mga bagay na ini makatatabang na madeterminaran kun gurano an saiyang ‘pag-ako na may kahoyoan kan pagtatanom kan tataramon.’—Sant. 1:21.
PAGPONDO KAN MGA INAADALAN NA DAING BUNGA
4 Kun an inaadalan dai nin makahulogan na pag-oswag pakalihis nin rasonableng lawig nin panahon, tibaad madonong na ipondo an pag-adal. Ipaliwanag sa kagharong na mantang nanonodan an mga katotoohan sa Biblia iyan maninigong iaplikar. Ginagamit an parabola ni Jesus sa parasabwag, puwede nindong ipakipag-olay an kada saro sa apat na klase nin daga dangan ipaliwanag kun paano an ilustrasyon na ini nagdodoon kan pangangaipo na positibong kumuyog sa mensahe kan Kahadean. Magin maboot, pero prangka asin klaro. (1 Cor. 14:8, 9) Ipaaram sa saiya na an pag-adal puwedeng ibalik kun nagibo na an kinakaipuhan na mga pagliliwat. Mientras tanto, masongko kamo sa panapanahon tanganing pakosogon sia.
5 Kun nakakanompong nin mga tawo sa teritoryo na dating nag-aadal, madonong na ipakipag-olay sa dating nakikipag-adal saiya asin sa paraataman sa paglilingkod kun taano ta ipinondo an pag-adal. Posible na may mga bagay na dai nindo aram. May mga tawo na nakipag-adal sa kadakol na laen-laen na parahayag sa nakaaging mga taon na dai man nag-ooswag. Kaipuhan kitang magtao nin panahon sa mga nagpapaheling nin tunay na interes sa katotoohan.
6 Mantang pinaooswag niato an satong abilidad sa paggibo nin progresibong mga pag-adal sa Biblia, dai mabilang pa an tibaad matabangan na makanood, umako, asin gumibo kan katotoohan. Ini puwedeng magbunga kan pagkakamit ninda nin inooyonan na relasyon ki Jehova Dios asin, sa huri, nin buhay na daing katapusan.—Fil. 4:9; Juan 17:3.