Ibalik an Kaigotan Paagi sa Pag-aplikar kan mga Suhestion sa Torrengbantayan
1 Si Cristo Jesus an sangkap na halimbawa nin maigot na parahulit kan maogmang bareta. An saiyang ministeryo buhay, asin may resulta. An ministeryo nakarepresko sa saiya. Ibinilang nia iyan na “kakanon” na nagpapakosog sa saiya. (Juan 4:34) Nagpahayag sia sa iba nin mga tataramon na ikaliligtas mantang hinahaman an isinugo sa saiya kan saiyang ama. Ini nagtao nin kahulogan asin katuyohan sa saiyang buhay.
2 An mga apostol asin iba pang parasunod ni Cristo Jesus kan enot na siglo nag-arog sa saiyang kaigotan para sa ministeryo. (Gibo 5:28-32; 8:1, 4) Iyo man ngonyan. An maogmang bareta ihinuhulit sa haros gabos na kanto kan daga nin mga tawo na nag-aarog ki Jesu-Cristo. Bilang mga Saksi ni Jehova, sinda perming “maigot sa marahay na mga gibo.”—Tito 2:14.
3 Kun kulang kita nin kaigotan, an satong trabaho nagigin mekanikal. Tibaad dai na kita naoogma sa satong paglilingkod. Kun manompongan niato an satong sadiri sa kamugtakan na ini, kaipuhan na humanap kita nin mga paagi na ibalik an satong kaigotan asin akoon an mga angat na itinatao kan ministeryo sa langtad. An artikulo sa Agosto 1, 1988 Torrengbantayan na may titulong “Pirme Mong Atenderan an Saimong Pagtotokdo” (Hunyo 15, 1988 sa Watchtower) nagtampok nin praktikal na mga suhestion tanganing tabangan kitang mapakosog o ikabalik an satong kaigotan sa paglilingkod sa Kahadean.
MGA ANGAT NA INAATUBANG NIATO
4 Sa dakol na parte kan kinaban, kakadikit kan bago o bihirang mahulitan na teritoryo. Sa mga siudad, bakong pambihira na an mga kongregasyon mahulitan an saindang teritoryo nin makasaro kada bulan o kada semana pa ngani. Ini puwedeng magin angat ta an dakol na kagharong dati na kitang midbid asin parateng nagpoprobar na pondohon an orolay bago kita makapagtaram. Tibaad magreklamo sinda na ‘may nagdigdi nang Saksi kan nakaagi pa sanang semana.’ Tibaad marisa niato na an mga tawo sa satong teritoryo indiperente. Ini gabos puwedeng magpaluya nin boot. Alagad iinaplikar na daw nindo an mga suhestion na itinatao sa parapo 4-7 kan nasabing artikulo sa Torrengbantayan?
5 Minilyon na an natipon sa “dakulang kadaklan” kan “ibang karnero,” asin minilyon pa an nagdadangog sa maogmang bareta kan Kahadean. (Kap. 7:9; Juan 10:16) Minsan siring, an mga pag-aatubang na mapanggana kan mga nakaagi tibaad dai na makapukaw nin interes sa satong teritoryo. Kaipuhan na alisto kita sa klase, kuwalidad, asin pagkaepektibo kan satong mga pag-aatubang asin magin andam na gumibo kan kinakaipuhan na mga pagliliwat.
6 Sa pagpaliwanag kan temang ini, an Torrengbantayan nagtao nin kawiliwiling mga rekomendasyon kun paano pakakarhayon an satong ministeryo. Iinaaplikar daw niato an mga suhestion na ini? Inaaprobetsaran daw niato an mga instrumentong yaon tanganing magibo ini? An pagkuyog sa itinaong mga suhestion makatatabang sato na makatao nin lubos na patotoo sa satong teritoryo, mapupukaw an satong isip asin magigin lubos an atension niato sa ministeryo.
7 Huli sa presenteng mga kamugtakan sa kinaban, risang marhay na harani na an dakulang kahorasaan. Magin kitang maigot sa pag-aplikar kan mga suhestion na inako niato asin sa siring dugangan an satong kaigotan sa ministeryo.