Magin Pamilyar sa Bagong mga Ilinuwas sa Kombension
1 Duwang bagong ilinuwas an idinugang sa satong mayaman na suplay nin espirituwal na kakanon. Ilinuwas sa “Malinig na Tataramon” na Pandistritong mga Kombension, an bagong mga publikasyon na ini makatatabang sa sato gabos na magtaram kan malinig na tataramon na mas nalalaen.—Sof. 3:9.
2 Kan ilinuwas an bagong brochure manongod sa dugo, sinabi kan nagpahayag: “Sa ministeryo sa langtad parate kitang hinahapot kun taano ta dai kita magamit nin dugo. Tanganing matabangan kamo na masimbag an hapot na iyan, sarong kaogmahan na iluwas an bagong publikasyon. Ini siring kadakula nin magasin na brochure, How Can Blood Save Your Life?” Nabasa na daw nindong maingat an brochure na ini? Mahalagang gibohon an siring tanganing maparigon an saindo mismong pagtubod asin magin andam na tabangan an iba na masabotan an Kristianong punto-de-vista sa dugo.—Gibo 15:28, 29.
3 An brochure na ini masangkap saindo na ipaliwanag an saindong paninindogan sa kiisay man na doktor. Alagad, bako iyan pangenot na para sa mga doktor o mga abogado. Iyan dinisenyo para sa publiko. Isinusuherir na magdara kamo nin saro o duwang kopya sa langtad. Gamiton nin lubos an mahalagang impormasyon na ini para sa saindong personal na pakinabang asin tabangan an iba na magpaheling nin tamang paggalang sa dugo.
AN BAGONG LIBRO
4 Imahinaron sana an halaga kan bagong librong Mankind’s Search for God sa satong ministeryo. Iyan matabang sato na magin mas nasasangkapan na maghulit sa mga tawo kapwa sa Kakristianohan asin sa mga may ibang relihiyon. Huli sa pagbalyo nin istaran kan mga tawo sa ika-20 siglong ini, makanonompong kita nin mga tawo na may manlaenlaen na tataramon asin relihiyon sa satong teritoryo. Sa tabang kan librong ini, maninigong dai kita makamateng dai andam kun mapaatubang kita sa mga tawo na may manlaenlaen na relihiyosong pinaghalean.
5 An impormasyon sa bagong librong ini siniyasat asin rinepaso nin mga indibiduwal na pamilyar sa mga temang kinonsiderar. Kaya, makatataram kita na may autoridad kun naggagamit kan mga tataramon sa librong ini. Sierto nanggad, an pagtao kan librong ini sa panahon na ini saro pang ebidensia kan dakulang pagkamoot ni Jehova sa mga tawo sa gabos na nasyon. Epektibong gamiton niato ini sa pagbalangibog kan maogmang bareta sa gabos na klase nin tawo sa satong teritoryo.—Mat. 28:19, 20; Tito 2:11.