‘Pagtokdo . . . kan mga Bagay na Ipinagboot Ko sa Saindo’
1 Kaiba sa paggibo nin disipulo an pagtotokdo. Bago an saro magin disipulo ni Cristo, kaipuhan siang matokdoan “na otobon an gabos na bagay” na ipinagboot ni Jesus. (Mat. 28:19, 20) An pinakamarahay na paagi na magibo ini iyo an pag-adal nin Biblia sa harong.
2 Bako perming pasil na makapoon nin mga pag-adal sa Biblia, alagad dai madisganar. An kapangganahan sa pagpopoon nin mga pag-adal sa Biblia nangangaipo nin determinasyon asin nin sinserong kamawotan na ihiras an katotoohan sa iba.—Gal. 6:9.
3 Pagpapatalubo nin Interes: Sa saindong enot na pagdalaw, depende sa mga kamugtakan, sarong tract, brochure, o magasin an puwedeng iwalat sa kagharong. Puwede nindong gamiton an saro kaini sa pagpoon nin pag-adal sa Biblia sa harong. Kun an kagharong nagpapaheling nin dugang na interes sa mensahe, puwede siang darahon sa angay na publikasyon sa sunod na pagdalaw.
4 An pag-andam an liyabe sa kapangganahan. Taano ta dai nguna pumili nin teksto sa Kasuratan na kinotar sa tract, brochure, o magasin na plano nindong gamiton sa saindong pagdalaw liwat? Sa paaging iyan ikakokonektar nindo an mga komento sa publikasyon sa saindong pag-orolay. Puwede pa ngani kamong magbasa nin saro o duwang parapo na direkta sa publikasyon.
5 Puwede nindong sabihon ini:
◼ “Ihinihiras niamo an pirang impormasyon dapit sa sarong pambihirang hula na naootob na ngonyan.” Basahon an Mateo 24:3, asin isumpay an retrato asin an mga komento sa pahina 24 kan brochure na “Uya!” An siring na pagdolok puwedeng gamiton sa pag-alok kan tract na An Kinaban daw na Ini Magdadanay?
6 Kun ikinapaheling na an tunay na interes, maninigong balikan tolos ini. Hingoahon na makabalik sa laog nin sarong semana tanganing presko pa an ultimong pag-orolay sa isip kan kagharong. Sa kada pagdalaw nindo, pag-olayan an pirang parapo sa publikasyon na iwinalat nindo. Dangan, sa tamang panahon, puwede na nindong iintrodusir an librong Mabuhay Sagkod Lamang, na ipinagpapadagos an parehong paagi.
7 Ngonyan kadakol pang gibohon sa dakulang pag-aning ihinula ni Jesus. (Mat. 9:37, 38) Mantang padagos niatong tinotokdoan an mga may sadiosan na puso, igwa kitang nakapakokosog na panuga ni Jesus na sia ‘danay na nasa sato sagkod sa pagtatapos kan palakaw nin mga bagay.’