Mga Hobenes—Ekspertong Giyahan an Saindong mga Lakad
1 An satong Ama, si Jehova, may personal na interes sa espirituwal na pagtalubo kan mga hobenes. Paagi sa madonong na paghinanyog sa saiyang mamomoton na mga pagboot, tinotogotan nin mga hobenes na magtao si Jehova nin ekspertong giya para sa saindang mga lakad.—Tal. 16:9.
2 Si Cristo Jesus nagtao nin halimbawa sa saiyang pagkahoben bilang saro na nag-ako kan pag-oyon kapwa nin Dios asin nin mga tawo. (Luc. 2:52) Sa edad na 12, midbid si Jesus sa saiyang kamawotan na ipakipag-olay sa iba an manongod ki Jehova. (Luc. 2:46, 47) An mga hobenes ngonyan nagpapaheling nin kaparehong pagmawot na ipaliwanag sa iba an saindang pagtubod.—w90-E 7/1 p. 29-30; w87-E 12/1 p. 21.
3 Ano daw an magigibo nindo ngonyan mismo mga hobenes na “tawan nin onra si Jehova paagi sa saindong mahahalagang bagay”? (Tal. 3:9) Taano ta dai dugangan an oras na dati nindong ginagamit sa paghuhulit asin pagtotokdo kan maogmang bareta, tibaad bilang auxiliary payunir? Matao ini saindo nin oportunidad na makapaglingkod sa langtad kaiba nin mas dakol na parahayag. Puwede nindo ining ponan tolos ngonyan paagi sa pag-agda nin saro o duwang eksperyensiadong parahayag na ibanan kamo ngonyan na Sabado asin Domingo.
4 An mga magurang makatatao nin dakulang pagpakosog asin tabang sa saindang mga aki paagi sa pagpraktis apuwera sa pag-iba sa sainda sa ministeryo. An iba pang mga maygurang sa kongregasyon puwedeng iyo an enot na humiro paagi sa pag-agda sa mga hobenes na umiba sa sainda sa pagharongharong asin sa pagdalaw liwat patin pag-adal sa Biblia. An dayupot na pakiiiba sa siring na mga parahayag na makosog sa espirituwal magpaparigon sa mga hobenes asin matabang sa sainda na ‘magpadagos sa pagkamaygurang.’—Heb. 6:1.
5 Nag-aandam daw kamo nin marhay mga hobenes kun nagkakapribilehiyo kamong maasignaran na magpahayag sa Paadalan sa Teokratikong Pagmiministro? May regular na iskedyul daw kamo sa pagbasa asin personal na pag-adal siring man sa paghorophorop? Nag-aandam daw kamo nin marhay para sa mga pagtiripon tanganing masabotan nindo nin lubos an materyal asin magin andam na makakomento? Nagkukua daw kamo nin nota kan kapakipakinabang na mga punto na ipinahahayag sa pagtiripon asin naghihingoa na gamiton an mga suhestion sa An Satong Ministeryo sa Kahadean?
6 Dai palihison an oportunidad na makikabtang sa paglinig sa Kingdom Hall asin makatabang sa mga maedad na o naghehelang na mga tugang na lalaki asin babae sa mga gibohon o sa iba pang praktikal na paagi. Dai pabayaan an saindong regular na mga kontribusyon tanganing makatabang sa mga gastos sa Kingdom Hall asin sa pambilog na kinaban na gibohon kan Sosyedad.
7 Kun kita ‘mag-iingat sono sa tataramon ni Jehova’ asin totogotan sia na giyahan an satong mga lakad, gigiyahan nia kita sa kaogmahan asin sa dugang pang pribilehiyo nin paglilingkod.—Sal. 119:9.