Hapot

◼ Noarin maninigong gibohon an mga Pag-adal sa Libro kan Kongregasyon?

Parateng mas praktikal na magkaigwa nin nagkapirang grupo nin pag-adal sa libro sa burulagbulag na lugar sa bilog na teritoryo kan kongregasyon imbes na an gabos magtiripon sa Kingdom Hall. An mga pag-aradal na ini maninigong gibohon sa panahon na pinakakombenyente para sa mayoriya na iinasignar na umatender. Sa parate, ini sa banggi sa laog kan semana na mayo nin ibang pagtiripon o paglilingkod na iinareglo. Alagad, tibaad may bentaha na mag-areglo nin pag-adal sa libro sa aldaw para sa mga gurang asin nagtatrabaho sa banggi. Sa pirang kamugtakan, tibaad praktikal na magkaigwa nin pag-adal sa aldaw sa Sabado asin Domingo.

Puwedeng maghapot an mga magurang sa pagdeterminar kan mga oras nin pagtiripon na magigin “kombenyente para sa mayoriya kan mga parahayag” siring man sa mga interesado. (om p. 62) An oras na pinili maninigong sa oras na dai makaoolang sa plinanong mga areglo nin paglilingkod sa langtad.