An Tataramon nin Dios Igwang Puwersa
1 An Biblia nakaimpluwensiang gayo sa buhay nin minilyon. An sinasabi kaiyan mas nakakamotibar kisa sa ano man na bagay na kayang produsiron nin tawo. (Heb. 4:12) Helinga an ginibo kaiyan para sa sato. Tunay nanggad, an halaga kaiyan dai ikakokomparar.
2 An mga Saksi ni Jehova iyo an pangenot na mga estudyante sa Biblia. Maninigo tang mansayon an pagbasa sa Biblia bilang sarong mahalagang kabtang kan satong regular na iskedyul, na tinatawan iyan nin pangenot na lugar kisa sa telebisyon asin sa gabos na iba pang pag-aling-aling.
3 Ugaleon Iyan nin Regular: An banwaan ni Jehova inaapresyar an mapuwersang impluwensia kan regular na pagbasa sa Biblia. An sarong karatula sa saro sa satong mga edipisyo nin pabrika sa Brooklyn nagsasadol sa mga tawo na “Basahon an Tataramon nin Dios na an Banal na Biblia Aroaldaw.” An bagong mga miembro kan pamilyang Bethel hinahagadan na basahon an bilog na Biblia durante kan saindang enot na taon sa Bethel. Sinusundan daw nindo an semanal na babasahon sa Biblia sa Teokratikong Paadalan sa Pagmiministro?
4 Kun nadedepisilan kamong gibohon ini, taano ta dai ini itanos sa Nobyembre? An pagbasa sa Biblia para sa bilog na bulan iyo an Salmo 95-109, na nangangahulogan nin pagbasa nin tolo o apat na pahina kada semana. An iba nagbabasa nin kadikit kada aldaw, tibaad sa amay na aga o bago magtorog sa banggi. An importante iyo na inaani nindo an mga pakinabang nin regular na pagbasa sa Tataramon nin Dios.
5 Ialok an Biblia Ngonyan na Nobyembre: Dakol na tawo an minagalang pa sa Biblia asin andam na magdangog sa sinasabi kaiyan. Ngonyan na Nobyembre iaalok niato an New World Translation (o Ang Banal na Kasulatan) asin an librong The Bible—God’s Word or Man’s? Ipapaheling kaini sa mga sadiosan an puso an halaga kan Tataramon nin Dios. Magin entusiastiko sa paggibo kaiyan.
6 Mag-andam nin nagkapirang komento sa ekselenteng mga tampok kan New World Translation na mapahiro sa mga tawo na kumua kaiyan. Puwede nindong gamiton an saro sa mga topiko sa seksion na “Bible Topics for Discussion” asin ikonektar iyan sa librong The Bible—God’s Word or Man’s? O puwede nindong ipaheling an halaga kan 92 na pahinang indese kan mga tataramon sa Biblia sa paghanap kan pamilyar na mga teksto. An ibang parahayag puwedeng boot na itampok an “Table of the Books of the Bible” asin ipaheling an halaga kaiyan sa pag-adal sa Biblia.
7 Siertohon na idoon na an New World Translation nasa modernong Ingles, na minagibong pasil na masabotan iyan. An nagkapirang interesanteng mga pagkokomparar sa King James Version iyo an 1 Corinto 10:25 asin 16:22. An New World Translation ginagamit an ngaran nin Dios na Jehova nin 7,210 na beses.
8 Iyo, an Biblia Tataramon nin Dios. Kun binabasa ta iyan asin iinaaplikar sa satong buhay an sadol kaiyan, mag-aani kita nin dakulang mga pakinabang. (Roma 15:4) Mahalaga na basahon niato iyan aroaldaw asin gamiton iyan sa pagtokdo sa iba.