An Torrengbantayan Asin Awake!—Mga Magasin Para sa Satong Apuradong mga Panahon!
1 Mantang naheheling niato an nangyayari sa kinaban sa palibot niato asin siring man sa laog kan teokratikong organisasyon, masasabotan ta kun gurano kaapurado na ihulit ta an “maogmang bareta” kan Kahadean. (Mar. 13:10) Tinatawan kita kaini nin dahelan na gibohon an satong ministeryo na igwa nin kaigotan ngonyan na bulan nin Abril.
2 An importansia kan satong mensahe idinodoon kan espesyal na gibohon na poponan niato ngonyan na bulan. Galaga niatong hinahalat an pagluwas kan Kingdom News na iwawaras niato ngonyan na Abril asin Mayo. Tanganing madugangan an satong entusiasmo para sa gibohon na ini, magkakaigwa nin mga artikulo an Torrengbantayan asin Awake! na nagdodoon kan makahulang kahulogan kan mga pangyayari sa kinaban. Paano niato aandamon an pag-atubang na mapukaw kan interes sa mga magasin?
3 Posibleng makagibo kamo nin epektibong pag-atubang paagi sa pagsunod sa pundamental na mga tanggang ini: (1) Pumili nin artikulo sa saro sa mga magasin na makakaakit sa mga tawo sa saindong komunidad. (2) Pumili nin mga tataramon o teksto sa artikulong ini na mapukaw sa interes kan kagharong. (3) Mag-andam nin halipot na pag-atubang na kabale an makikatood na pataratara, sarong hapot o pahayag na nagtatampok nin Makakasuratan na kaisipan, asin odok na pag-agda na magsuskriber. Siring sa maheheling nindo, bako ining depisil gibohon. Taano ta dai mag-andam nin sarong pag-atubang kaiba an saro pang parahayag na nakakaiba nindo sa ministeryo?
4 Mantang an Abril 22 na “Awake!” minapalataw kan hapot na, “Are These the Last Days?,” puwede nindong repasohon an materyal sa irarom kan temang “Last Days” sa pahina 13 kan librong “Reasoning.” Puwede kamong magpoon paagi sa pagsabi:
◼ “Nagsosongko kami tanganing ipakipag-olay an kahulogan kan maribok na mga pangyayari sa palibot niato. Mangnoha an sinasabi kan artikulong ini . . . ”
5 An Abril 1 “Torrengbantayan” minapalataw kan hapot na: “Relihiyon—Saro daw na Ipinangangalad na Tema nin Orolay?” Kun iinaalok an suskripsion, puwede nindong sabihon:
◼ “Parateng sinasabi na an relihiyon sarong tema na dai maninigong pag-olayan huli ta iyan pinagdedebatehan na gayo. Ano an paghona nindo manongod kaiyan?” Dangan basahon an sarong pahayag sa artikulo.
6 Tibaad ginagamit nindo an Abril 15 “Torrengbantayan” na igwang artikulong “Puwede daw na Makamtan an Katotoohan Dapit sa Relihiyon?” Tibaad makakua kamo nin marahay na reaksion paagi sa introduksion na ini:
◼ “Huli ta kadakol kan relihiyon ngonyan, may mga tawo na naghohorophorop kun baga puwedeng makamtan an katotoohan dapit sa relihiyon. Ipinaheheling kan artikulong ini an paagi na kamo asin ako makakanompong nin nakakakontentong simbag sa hapot na ini. . . . ”
7 Mantang nagrarani an katapusan, dagdagan logod niato an satong mga paghihingoa na tabangan an mga tawo na makadulag sa Dakulang Babilonya. (Kap. 18:4) An Torrengbantayan asin Awake! igwa nin mahalagang kabtang sa nungka maootrong gibohon na ini.