Magin mga Paratokdo kan Tataramon nin Dios—na Ginagamit an mga Brochure
1 An lambang dusay na lingkod ni Jehova kaipuhan na magin paratokdo kan Tataramon nin Dios. Inasignaran kita ni Jesus na ‘gumibo nin mga disipulo sa mga tawo kan gabos na nasyon, na tokdoan sinda.’ (Mat. 28:18-20) Kaya, an pakikikabtang sa paghuhulit kan maogmang bareta naghahagad na kita magin mga paratokdo!—2 Tim. 2:2.
2 Ngonyan na Agosto puede niatong gamiton an satong mga abilidad sa pagtokdo kun nag-aalok nin mga brochure. Puede kitang pumili dian nin nagkapirang interesanteng Makakasuratan na punto asin mag-adam nin pirang komento na matabang sa sato na makapoon nin orolay.
3 Kun iinaalok an brochure na “An Dios daw Talagang May Pagmakolog sa Sato?” puede nindong sabihon:
◼ “Nanompongan mi na dakol sa saindong kataraed an nahahadit manongod sa marikas na pagdakol nin krimen, terorismo, asin kadahasan. Sa saindong opinyon, taano daw ta ini nagin dakulang problema? [Pasimbagon.] Mahalagang mangnohon na ihinula kan Biblia na mangyayari ini. [Basahon an 2 Timoteo 3:1-3.] Mangnohon nindo na ini mangyayari sa ‘huring mga aldaw.’ Nangangahulogan ini na may matatapos. Sa paghona nindo ano daw iyan?” Pasimbagon. Buksan sa pahina 22, itokdo an ilustrasyon, asin ipaliwanag an saro o duwang teksto na kinotar sa pahinang iyan. Makipag-areglo na mabalik kamo.
4 Tibaad boot nindong gamiton an paaging ini kun iinaalok an brochure na “What Is the Purpose of Life—How Can You Find It?”:
◼ “Dakol na tawo an nadedepisilan na makanompong nin tunay na katuyohan sa buhay. Minsan ngani an nagkapira medyo maogma, an buhay kan kadaklan pano nin pagkadisganar asin pagsakit. Sa paghona daw nindo arog kaini an boot nin Dios na magin buhay niato? [Pasimbagon.] Ipinaheheling kan Biblia na boot nin Dios na kita mabuhay sa sarong kinaban na arog kaini.” Ipaheling an ilustrasyon sa pahina 21, dangan buksan an pahina 25 asin 26, parapo 4-6. Palatawon an hapot na ini na mapag-oolayan pagbalik nindo: “Paano daw kita makasisierto na ootobon nin Dios an saiyang mga panuga?”
5 Puede nindong ialok an brochure na “Enjoy Life on Earth Forever!” paagi sa pagpaheling kan bilog na retrato sa atubangan asin likod na tutob asin paghapot:
◼ “Gusto daw nindong mabuhay sa sarong kinaban na arog kaini? [Pasimbagon.] Sinasabi sa sato kan Biblia na an Dios may pagkamoot sa mga tawo asin boot nia na sinda mabuhay sagkod lamang sa kaogmahan digdi sa daga.” Buksan an retrato numero 49, asin basahon an saro sa sitadong mga teksto. Dangan, sa retrato numero 50, ipaheling kun ano an dapat niatong gibohon tanganing mabuhay sa Paraiso. Alokon na mabalik kamo para sa dugang pang pag-orolay.
6 Naoogma si Jehova kun ‘ipinahahayag niato an satong pag-oswag paagi sa pag-atender sa satong pagtotokdo.’ (1 Tim. 4:15, 16) An satong mga brochure tunay na makatatabang sa sato sa satong mga paghihingoa na tabangan an mga naghihimuyawot na makadangog nin “maogmang bareta dapit sa orog karahay.”—Isa. 52:7.