An Mapangganang mga Pagdalaw Liwat Nagkakaipo nin Epektibong Pagtotokdo
1 Taano ta maninigo kitang maghingoa na balikan an mga interesado? An ngaran ni Jehova ikinapamimidbid paagi sa gibohon na ini nin paggibo nin mga disipulo, asin an mga matatakton sa Dios natatabangan sa dalan pasiring sa buhay. (2 Cor. 2:17–3:3) An pakaaram kaini maninigong magpahiro sa sato na mag-andam na marhay bago bumalik.
2 An sarong marahay na paratokdo tatabangan an estudyante na dagdagan an dati nang ibinugtak na pundasyon. Kun paanong dinadagdagan nin sarong maestro an kaaraman na nakukua kan mga estudyante sa aroaldaw, sa parate maninigo niatong balikan an enot niatong nakaolay paagi sa dugang pang mga komento dapit sa iyo man sanang tema.
3 Pagbalik nindo pakalihis na ikapasakamot an brochure na “An Dios daw Talagang May Pagmakolog sa Sato?” tibaad manompongan nindong epektibo ini:
◼ “Kan nakaagi kong pagsongko, pinag-olayan niato an ‘huring mga aldaw.’ Tibaad iniisip nindo kun paano mi naaaraman na kita nabubuhay na sa huring mga aldaw. (2 Tim. 3:1) Gustong-gusto man na maaraman ini kan mga disipulo ni Jesus. [Basahon an Mateo 24:3.] Sa saiyang simbag, isinabi ni Jesus an mga kamugtakan na naheheling niato ngonyan.” Itokdo an kabtang kan tanda na ipinaliliwanag sa parapo 3 asin 4 sa pahina 19. Kun marahay an reaksion, ipadagos sa parapo 5-8 sa pahina 20. Alokon na mabalik kamo asin sisimbagon an mga hapot na pinalataw sa tutob kan brochure.
4 Sa pagdalaw liwat sa mga interesado sa brochure na “What Is the Purpose of Life—How Can You Find It?” puede nindong sabihon:
◼ “Gustong-gusto ko na ipadagos an satong pag-oolay manongod sa katuyohan kan satong buhay. Daing duwa-duwa na pareho kita minaoyon na katuyohan nin Dios na kita mabuhay sa maogma asin matoninong na mga kamugtakan imbes na sa naeeksperyensiahan niato ngonyan. Sa paghona daw nindo ootobon nia an saiyang panuga?” Pasimbagon. Basahon an Isaias 55:11, dangan ipakipag-olay an parapo 25 sagkod 27 sa pahina 30. Irekomendar an personal na pag-adal sa Biblia bilang an pinakamarahay na paagi na makanompong nin tunay na katuyohan sa buhay.
5 Sa pagdalaw liwat sa nakaaging interes na ipinaheling sa brochure na “Enjoy Life on Earth Forever!” puedeng ipaheling giraray nindo iyan asin sabihon:
◼ “Pinag-olayan niato an manongod sa magayon na kinaban na ilinaladawan digdi sa brochure; boot kong sabihon sa saindo kun taano an pagtubod ki Jesu-Cristo ta mahalagang marhay para sa mga tawo na gustong mabuhay dian.” Buksan an retrato 41, asin basahon an Isaias 9:6. Itokdo an retrato 62, asin basahon an Juan 3:16, na idinodoon an pangangaipong kumuyog. Ipaliwanag na tinatabangan kan Mga Saksi ni Jehova an mga tawo na maggibo nin pagtubod paagi sa pag-adal sa Biblia asin paghihingoang mamuhay sono dian.
6 Pakatapos kan kada pagdalaw liwat, hapota an saindong sadiri: May depinido daw akong nasa isip na sabihon? Pinapagdanay ko daw an atension na nakasentro sa Biblia? Dinagdagan ko daw an pundasyon na ibinugtak sa enot na pagsongko? An pag-atubang ko daw sinadya na magbunga nin pag-adal sa Biblia? An mga simbag na iyo minasierto na kamo nagmamaigot na magin marahay na paratokdo kan Tataramon nin Dios.