Tabangan an Iba na Apresyaron an Halaga kan Biblia
1 An Lucas 24:45 nagsasabi manongod ki Jesus: “Binukas nia nin lubos an saindang isip tanganing masabotan an kahulogan kan Kasuratan.” Aram nia na kaipuhan nindang pag-adalan asin saboton an Tataramon nin Dios. (Sal. 1:1, 2) Sa satong paghuhulit, an satong pasohan makapoon nin mga pag-adal sa Biblia, kun saen kita ‘makapagtotokdo sa mga tawo na otobon an gabos na bagay na ipinagboot ni Jesus.’ (Mat. 28:20) An minasunod nagkapirang suhestion sa kun ano an puede nindong sabihon kun kamo minadalaw liwat.
2 Kun ipinakipag-olay nindo kan enot an librong “The Bible—God’s Word or Man’s?” puede nindong ipadagos an saindong pag-orolay nin siring kaini:
◼ “Boot kong ipaheling saindo an saro pang bagay na nagpapaheling kan praktikal na halaga kan hatol sa Biblia. Dakol na tawo an nadedepisilan na makasundo an iba. Ano daw an satong magigibo tanganing makapatalubo nin mas marahay na relasyon sa mga kairiba niato? [Pakasimbag, buksan sa pahina 167-8, parapo 15, asin basahon an Mateo 7:12. Idagdag an mga puntong ipinahayag sa parapo 16.] Saro pa ining halimbawa kan kadonongan na makukua sa hatol kan Biblia. Sa masunod kong pagsongko, boot kong ipaheling saindo an itinataong sadol kan Biblia sa pagtabang sa mga mag-agom na makanompong nin orog na kaogmahan sa saindang relasyon.” Makipag-areglo na bumalik tanganing ipakipag-olay an pahina 170-2 manongod sa buhay pampamilya.
3 Kun nakaolay nindo an saro na nagpaheling nin interes sa Biblia, kun siring tibaad an pag-atubang na ini puedeng magin epektibo sa pagpoon nin pag-adal:
◼ “Haros gabos na nakakaolay nindo masabi saindo na boot nindang magkaigwa nin sarong matoninong na kinaban na maiistaran. Kun iyan an gusto nin gabos, taano ta an kinaban niato pano-pano nin grabeng kadahasan? [Pasimbagon.] Ipinaheheling saindo kan New World Translation kun saen nindo manonompongan sa Biblia an simbag sa hapot na iyan.” Buksan sa pahina 1659, asin itokdo an “Bible Topics for Discussion” Num. 43a: “Who is responsible for world distress.” Basahon an 2 Corinto 4:4. Ipaliwanag kun paano lalaglagon nin Dios an Diablo asin itatao an sarong kinaban na igwa nin nagdadanay na katoninongan asin kaogmahan. Basahon an Kapahayagan 21:3, 4. Dangan iareglo an dugang pang pag-orolay sa masunod na pagsongko.
4 Kun ginamit nindo an direktang pag-atubang sa pagpoon nin pag-adal asin nagkaigwa nin marahay na reaksion, puede nindong sabihon ini sa pagbalik nindo:
◼ “Kan mag-olay kita kan nakaagi, pinag-olayan niato kun taano ta kapakipakinabang na pag-adalan an Biblia. [Basahon an Juan 17:3.] Guminibo kami nin programa nin pag-adal sa Biblia na nakatabang sa rinibo na manodan nin orog pa an dapit sa ipinanuga nin Dios asin kun paano niato sia mapaoogma.” Ipaheling an librong Mabuhay Sagkod Lamang, repasohon an titulo kan mga kapitulo, asin idemonstrar kun paano kita nagkokondukta nin pag-adal sa Biblia.
5 Kun makatatabang kamo sa sinserong mga tawo na apresyaron an halaga kan Tataramon nin Dios, dangan an kadonongan na manonodan ninda paagi sa pag-adal sa mga pahina kaiyan puedeng magin “kahoy nin buhay,” na magtatao sa sainda nin dakulang kaogmahan.—Tal. 3:18.