Tokdoan an Iba kan Kahagadan nin Dios
1 Dakol pang tawo ngonyan an dai pa ‘nakadadangog kan mga tataramon ni Jehova.’ (Amos 8:11) Mantang may mga naniniwala na nag-eeksister an Dios, dai ninda aram an saiyang katuyohan asin mga kahagadan. Sa siring, kaipuhan na tokdoan niato sinda kan katotoohan kan Kahadean. Paagi sa pagigin nasangkapan nin tama asin andam na magpatotoo sa gabos na oportunidad, maaabot niato an mga boot na makanood kan kahagadan ni Jehova.
2 Ngonyan na Abril asin sa Mayo, may ididistribwir kitang napapanahon na marhay na mga luwas kan An Torrengbantayan asin Awake! Dugang pa, sa kaenot-enote, itatampok niato an brosyur na Ano an Kahagadan sa Sato nin Dios? An magayon na mga ilustrasyon kaiyan asin nakapupukaw sa isip na mga hapot nakaaakit sa gabos na klase nin tawo. Itinatao an minasunod na mga suhestion tangani na tabangan kita na gamiton nin epektibo an satong mga publikasyon.
3 Paghanap sa mga Tawo: Sa mga lugar na kun saen dakol na tawo an mayo sa harong kun kita naghaharongharong, kapakipakinabang na hanapon asin kaolayon an mga tawo saen man sinda manompongan. An Setyembre 1996 na suplemento kan An Satong Ministeryo sa Kahadean pinarigon an boot niato na ihulit an maogmang bareta sa gabos na lugar—sa tinampo, pampublikong sasakyan, asin mga parke, paradahan, patin lugar nin negosyo. Pinangyari man kita kaiyan na magin mapagrisa sa pangangaipo na gumibo nin mga oportunidad tangani na makapaghulit sa impormal. Bilang halimbawa kaini, an sarong payunir na tugang na babae nagduman sa su asin sia nagdara nin suplay kan Agosto 8, 1996 na Awake! na may seryeng “Endangered Species—Why Be Concerned?” Sa laog nin sarong oras, nakapasakamot sia nin 40 kopya sa nagkapirang mapag-apresyar na marhay na mamomoton sa hayop! An Torrengbantayan asin Awake! siring man an brosyur na Kahagadan nangorognang angay sa gabos na klase nin pagpatotoo, huling itinatampok kaiyan an impormasyon na nakaaapektar sa buhay nin mga tawo asin nakapupukaw sa abilidad na mag-isip.
4 Pagpoon nin mga Pakikipag-olay: An likod na pahina kan Oktubre 1996 na An Satong Ministeryo sa Kahadean nagpaliwanag kun paano aandamon an saindong sadiring pag-atubang para sa mga magasin na Torrengbantayan asin Awake! An iyo man sanang mga suhestion magigin epektibo kun nag-aandam kan saindong pag-atubang para sa brosyur na Kahagadan. An satong mga komento puedeng pira sanang mga tataramon o tamang-tama sanang iiba an sarong punto sa Kasuratan. Mahalaga na maingat na pilion an pambukas na mga tataramon, huling puedeng magdeterminar iyan kun baga an saro padagos na mahinanyog. An nagkapira nagin mapanggana sa pambukas na komentong ini: “May nabasa akong sarong artikulo na nakaenkaminar sa sako, asin boot kong ihiras iyan sa saindo.” O, puedeng palatawon an sarong interesanteng hapot tangani na madagka an saro na makipag-olay.
5 Kun angay sa saindong lugar, puede nindong probaran na ihapot sa saindong mga pag-atubang ngonyan na bulan an siring sa minasunod:
◼ “Ngonyan nakaheheling kita nin kadakoldakol na surat-surat sa lanob, basura, asin polusyon. Ano sa paghona nindo an kaipuhan tangani na malinigan an daga asin gibohon iyan na mas marahay na lugar na istaran?” Pasimbagon, dangan sambiton na igwa kamong impormasyon na nagpapaliwanag kun paano asin noarin magigin sarong panglobong hardin an daga. Ipaheling an sarong espesipikong komento, halipot na teksto, asin makolor na ilustrasyon sa sarong magasin, dangan ialok iyan sa indibiduwal. Bago nindo taposon an pag-orolay, pagmaigotan na iareglo an pagdalaw liwat.
◼ “Sa paghona daw nindo katuyohan nin Dios na kita mabuhay na napapalibotan nin mga problema siring kan kamugtakan niato ngonyan?” Pakasimbag nia, puede nindong sabihon: “Posibleng pamilyar kamo sa pamibi na itinokdo ni Jesus sa saiyang mga parasunod na ipamibi, na hinahagad na dumatong logod an Kahadean nin Dios. Napag-isip-isip na daw nindo kun ano talaga an boot sabihon kan Kahadean nin Dios?” Buksan sa leksion 6 kan brosyur na Kahagadan, asin basahon an mga hapot sa kapinonan kan leksion. Dangan, mantang binabasa nindo an parapo 1, itokdo an simbag sa enot na hapot. Ipaliwanag na an iba pang mga hapot sinisimbag man nin diretso sa punto. Ialok an brosyur, asin alokon na masongko liwat na dara an dakol pang impormasyon manongod sa Kahadean.
◼ “Dakol na madonong na tawo an nagpoon nang mansayon an mga relihion kan kinaban bilang iyo an causa kan mga problema nin tawo imbes na an solusyon. Ano an paghona nindo dapit kaiyan?” Pakahinanyoga sa saiyang punto de vista, ipaheling an sarong bagay sa saro kan bagong mga magasin na puedeng makapukaw kan saiyang interes manongod sa pagkasudya kan falsong relihion. Hapoton sia kun boot niang basahon iyan. Makipagmidbidan, asin alokon na makaolay sia liwat tangani na ikapaliwanag nindo kun taano an tunay na relihion ta dai nagkulang sa katawohan.
◼ “Huli sa kadakoldakol na problema sa buhay pampamilya ngonyan, napaghorophorop na daw nindo kun ano an sekreto sa kaogmahan nin pamilya?” Halaton an simbag, dangan ipaliwanag na sa Biblia ihinahayag nin Dios an tunay na sekreto sa kaogmahan nin pamilya. Tibaad puede nindong basahon an Isaias 48:17. Dangan buksan sa leksion 8 kan brosyur na Kahagadan, asin ipaheling an nagkapirang bersikulo sa Biblia na nagtataong giya sa kada miembro kan pamilya. Basahon an lista nin mga hapot sa kapinonan kan leksion. Hapoton sia kun boot niang basahon an mga simbag. Kun iyo, ialok sa saiya an brosyur. Alokon na mabalik sa ibang panahon tangani na pag-olayan an dakol pang praktikal na giya para sa maogmang buhay pampamilya.
6 An suplemento sa Marso 1997 An Satong Ministeryo sa Kahadean nag-eenkaminar sa sato na magkaigwa nin kapusoan na gumibo nin mga pagdalaw liwat. Irinekomendar kaiyan an paggamit kan bagong brosyur tangani na makapoon nin mga pag-adal sa Biblia, kun bakong sa enot na pagsongko, sa panahon kan pagdalaw liwat. An pinakadakulang pangangaipo kan katawohan iyo na manodan an kahagadan nin Dios dangan gibohon iyan. (Col. 1:9, 10) Dakula an pakinabang na ikatatao niato sa iba ngonyan na Abril asin sa Mayo kun mapoponan niato sindang tokdoan kan aram niato manongod sa mga kahagadan ni Jehova para sa buhay.—1 Cor. 9:23.